អាជ្ញាធរខេត្តកណ្ដាលនិងក្រុមការងារចម្រុះបានចុះពិនិត្យទីតាំងរណ្ដៅដីមួយកន្លែងនៅស្រុកខ្សាច់កណ្តាល
(ខេត្តកណ្តាល)៖ នារសៀលថ្ងៃទី២៧ ខែឧសភា ឆ្នាំ២០២៣ ឯកឧត្តម ណុប ដារ៉ា អភិបាលរងខេត្តកណ្តាល តំណាង ឯកឧត្តម គង់ សោភ័ណ្ឌ អភិបាលខេត្តកណ្តាល បានដឹកនាំក្រុមការងារចម្រុះរួមមាន មន្ទីរជំនាញពាក់ព័ន្ធ និងអាជ្ញាធរស្រុក ចុះមកពិនិត្យដល់ទីតាំងជាក់ស្ដែង នៃរណ្តៅដីមួយកន្លែង ដែលមានទីតាំងស្ថិតនៅក្នុង ភូមិពុកឫស្សីកណ្ដាល ឃុំពុកឫស្សី ស្រុកខ្សាច់កណ្តាល ដើម្បីត្រួតពិនិត្យ លើលក្ខណៈបច្ចេកទេស ការអនុវត្តតាមវិធានការច្បាប់ និងអាជ្ញាប័ណ្ណជាដើម។
ក្នុងការចុះមកពិនិត្យនេះ ក្រុមការងារបានពិនិត្យឃើញថា ទីតាំងរណ្តៅដីកំពុងធ្វើសកម្មភាពដឹកជញ្ជូនយ៉ាងសកម្ម ហើយទីតាំងនេះមិនមានអាជ្ញាប័ណ្ណឡើយ និងធ្វើអោយមានផ្តល់ប៉ះពាល់ដល់ប្រជាពលរដ្ឋ និងសត្វផងដែរ។ ក្រុមការងារចម្រុះ របស់អាជ្ញាធរខេត្ត បានតម្រូវឱ្យ ការដ្ឋាននេះ ត្រូវផ្អាកអាជីវកម្ម និងប្រគល់ជូន មន្ទីររ៉ែ និងថាមពលខេត្ត ធ្វើតាមនីតិវិធី។
ក្នុងករណីម្ចាស់អាជីវកម្មនៅបន្តធ្វើសកម្មភាព ក្រុងការងារនិងចុះកសាងសំណុំរឿងនិងអនុវត្តតាមនីតិវិធីច្បាប់។ ហើយម្ចាស់អាជីវកម្មត្រូវធ្វើការបង់សួយសារទៅតាមបរិមាណអាចម៌ដីដែលបានធ្វើអាជីវកម្មកន្លងមក៕
