ខេត្តបន្ទាយមានជ័យ ៖ នៅច្រកទ្វាអន្តរជាតិប៉ោយប៉ែត គេសង្គេតឃើញថាក្នុងរយៈពេលប៉ុន្មានថ្ងៃនេះ អាជីវករខ្មែរដែលបានចូលទៅរកទទួលទាននៅក្នុងផ្សាររោងក្លឿ ប្រទេសថៃមានការត្អូញត្អែរឿងដោះដូរសំបុត្រ ។ បន្ទាប់ពីពួកគាត់បានទទួលដំណឹងនិងបានឃើញការបិទប្រកាសនូវសេចក្តីជូនដំណឹងមួយនៅមុខស្នាក់ការចែកចាយសំបុត្រជូនទៅអាជីវករខ្មែរដែលទៅលក់ដូរក្នុងផ្សារោងក្លឿសព្វថ្ងៃនេះ ។
សូមជំរាបដែរថា ៖នៅក្នុងសេចក្តីជូនដំណឹងនោះបានបញ្ជាក់ថា៖អាជីវករទាំងអស់ត្រូវទិញសំបុត្រក្នុងមួយសន្លឹកតម្លៃ១០០រៀលដើម្បីទៅធ្វើអាជីវកម្ម លក់ដូរដូចធម្មតានៅក្នុងផ្សាររោងក្លឿ។សេចក្តីជូនដំណឹងដដែរបន្តថា៖ចាប់ពីថ្ងៃទី១ខែកុម្ភៈឆ្នាំ២០១៨ គឺលក់សំបុត្រជូនអាជីវករខ្មែរក្នុងមួយសន្លឹកតម្លៃ១០០រៀលរហូតដល់ថ្ងៃទី១ខែសីហាឆ្នាំ២០១៨ លុះដល់ថ្ងៃទី១ខែកញ្ញាឆ្នាំ២០១៨គឺគេឈប់លក់ដូរសំបុត្រតទៅទៀតហើយ ដោយតម្រូវឲ្យអាជីវករទាំងអស់ប្រើប្រាស់ប័ណ្ណឆ្លងដែនវិញម្ដង។
គួរបញ្ជាក់ដែរថា ៖ រយៈពេលកន្លងមក ក្រុមអាជីវករទាំងអស់ដែលចូលលក់ដូរក្នុងផ្សាររោងក្លឿ ប្រទេសថៃ ត្រូវយកសំបុត្រពណ៌លឿងមួយសន្លឹកចូលទៅប្រទេសថៃដោយឥតគិតថ្លៃ ស្រាប់តែពេលថ្មីៗនេះមានសេចក្តីជូនដំណឹងពីអាជ្ញាធរខេត្តនិងក្រុងដោយបានឯកភាពជាមួយប៉ូលិសអន្តោប្រវេសន៍ស្នាក់ការច្រកទ្វារអន្តរជាតិប៉ោយប៉ែតលក់សំបុត្រតំលៃ១០០រៀលទៅវិញ ។
ទាក់ទិនទៅនឹងករណីដោះដូរសំបុត្រចូលទៅផ្សារថៃនោះដែរ មានអាជីវករជាច្រើនបានរអ៊ូរមិនដាច់ពីមាត់ថា កាលពីឆ្នាំមុនៗ គឺគេលក់សំបុត្រជូនអាជីវករខ្មែរដែលចូលទៅលក់ក្នុងផ្សាររោងក្លឿ ប្រទេសថៃក្នុងតម្លៃមួយសន្លឹកដប់បាតស្មើនឹង១២០០រៀល ក្រោយមកក៏គេចែកសំបុត្រព្រីមិនយកលុយ តែឥឡូវនេះបែរជាគេនឹកឃើញយ៉ាងណាបានេជាមកលក់សំបុត្រវិញយ៉ាងដូច្នេះ ហើយការលក់សំបុត្រក្នុងតម្លៃ១០០ រៀលនោះគឺវាមានរយៈពេលត្រឹមតែពីរបីខែប៉ុណ្ណោះ ហើយបន្ទាប់ពីនេះតម្រូវឲ្យអាជីវករទាំងអស់ប្រើប្រាស់លិខិតឆ្លងដែនទៅវិញ ។
ក្រុមអាជីវករទាំងនោះបានបន្តទៀតថា៖ អ្វីដែលអាជ្ញាធរនិងសមត្ថកិច្ចធ្វើនោះគឺធ្វើឲ្យពួកគាត់មួយចំនួនធំជួបការលំបាកជាមិនខានឡើយ ព្រោះថាមានអាជីវករខ្លះពុំទាន់បានធ្វើលិខិតឆ្លងដែនពីអាជ្ញាធរខេត្តនៅឡើយទេដោយគេសំអាងថាកន្លងទៅគេធ្លាប់តែយកសំបុត្រព្រីពីសមត្ថកិច្ចចែកអោយរួចចូលទៅលក់ក្នុងផ្សារថៃតែម្ដង គឺវាជាកត្តាមួយដែលធ្វើឲ្យពួកគាត់ងាយស្រួលក្នុងការចេញចូលទៅមកពីផ្សារថៃមកក្រុងប៉ោយប៉ែត។
ក្រុមអាជីវករដដែលបានបង្ហើបឲ្យដឹងទៀតថា៖ ការតម្រូវឲ្យពួកគាត់ធ្វើលិខិតឆ្លងដែននោះគឺវាពិតជាបង្កឲ្យពួកគាត់ជួបការលំបាកបំផុតត្រង់ថាមានអាជីវករមួយចំនួនធំគឺពុំទាន់មានលិខិតសំគាល់ខ្លួននៅឡើយ ជាពិសេសគឺសំបុត្រកំណើត សៀវភៅគ្រួសារ និងអត្តសញ្ញាណប័ណ្ណសំគាល់ខ្លួនជាដើម។
ជាចុងក្រោយ ពួកគាត់បានសុំណូមពរដល់អាជ្ញាធរខេត្តនិងក្រុងមេត្តាមានវិធានការនិងជួយសម្រួលយ៉ាងណា ដើម្បីឲ្យអាជីវករខ្មែរដែលចូលទៅលក់ដូរនៅផ្សាររោងក្លឿ ប្រទេសថៃមានការងាយស្រួលក្នុងការចេញចូល៕
