កែប ៖ ក្រោយពីមានសារព័ត៌មានក្នុងស្រុក ចុះផ្សាយពីករណីចោទប្រកាន់ អាជ្ញាធរនិងជំនាញ អនុញ្ញាតឲ្យមានគ្រឿងចក្រជីកកកាយដីភ្នំព្រះ ស្ថិតក្នុងភូមិដំណាក់ចង្អើរ សង្កាត់ព្រៃធំ ក្រុង-ខេត្តកែបនោះ ជំនាញបានបញ្ជាក់អះអាងថា ទីតាំងនេះសុទ្ធតែមានអាជ្ញាប័ណ្ណត្រឹមត្រូវ ប៉ុន្តែត្រូវបានបោះបង់ចោលដោយសារជើងភ្នំខាងលើពោរពេញទៅដោយគ្រួសថ្មធ្វើអាជីកម្មមិនបាន។ប៉ុន្តែមានចំណុចខ្លះក៏នៅតែបន្តអាជីវកម្មរបស់ខ្លួននៅឡើយមកដល់សព្វថ្ងៃនេះ។
ជាមួយនេះដែរ ប្រភពពីប្រជាពលរដ្ឋបានបង្ហើបថា ទីតាំងភ្នំព្រះកាលពីជាង១០ឆ្នាំមុនគឺមានក្រុមហ៊ុនមកជីយកអាចម៍ដីជាបន្តបន្ទាប់ ដោយបានបន្សល់ស្លាកស្នាមរណ្តៅរហូតមកដល់បច្ចុប្បន្ន ប៉ុន្តែរយៈពេលចុងក្រោយនេះពុំសូវមានសកម្មភាពគគ្រឹកគគ្រេងនោះទេ ។ ដោយឡែក អាជ្ញាធរក្រុងកែប បន្ទាប់ពីមានព័ត៌មានដ៏រសើបនេះក៏បានដឹកនាំមន្ត្រីចុះទៅពិនិត្យទីតាំងភ្នំព្រះនេះ ដើម្បីស្វែងរកការពិតផងដែរ។
ពាក់ព័ន្ធនឹងករណីដូចខាងលើ លោកស្រី ទិត សុខា អភិបាលនៃគណៈអភិបាលក្រុងកែប បានប្រាប់ឲ្យដឹងនៅព្រឹកថ្ងៃទី៣០ខែមករា ឆ្នាំ២០១៨នេះថា ទីតាំងចំណុចជើងភ្នំព្រះនេះ កាលពីថ្ងៃទី២៥និងទី២៦ខែមករា ឆ្នាំ២០១៨ កន្លងទៅមានគ្រឿងចក្រមកកាយដីក្នុងគោលបំណងធ្វើផ្លូវនៅចំណុចនោះ ម្យ៉ាងទៀតទីតាំងដែលគ្រឿងចក្រជីកកាយដីនេះ ស្ថិតក្នុងជ្រលងផ្លូវចាស់សម្រាប់ភ្ជាប់ទៅកាន់ផ្លូវម្ខាងទៀតដែលមានផ្លូវចាស់នៅទីនេះស្រាប់ទៅហើយ។
លោកស្រី អភិបាលក្រុង បានបញ្ជាក់ទៀតថា ចំពោះស្នាមរណ្តៅដីដែលមាននៅកន្លែងនោះ គឺជារណ្តៅដីដែលមាននៅទីនេះស្រាប់ប្រហែលជាង១០ឆ្នាំមកហើយ ដាច់ខាតមិនមែនកើតឡើងក្នុងពេលថ្មីៗនេះទេ។
ជុំវិញការចោទប្រកាន់ ពីករណីឃុបឃិត ពីសំណាក់អាជ្ញាធរនិងជំនាញ លោក យស មុន្នី ប្រធានមន្ទីររ៉ែនិងថាមពលខេត្តកែប បានប្រាប់អ្នកយកព័ត៌មាន នៅព្រឹកថ្ងៃដដែលនេះថា ទីតាំងភ្នំព្រះ ក្នុងភូមិដំណាក់ចង្អើរនេះ គឺមានអ្នកកាន់អាជ្ញាប័ណ្ណពីរ ទី១-ចំណុចដែលគ្រឿងចក្រកាយដីធ្វើផ្លូវ ជាអាជ្ញាប័ណ្ណរបស់ក្រុមហ៊ុន ស៊ុន ស្រីមាស ប៉ុន្តែត្រូវផ្អាកធ្វើអាជីវកម្មដោយសារទីតាំងនេះមានថ្មច្រើនមិនអាចកាយបាន ហើយអាជ្ញាប័ណ្ណក៏ផុតសុពលភាពដែរ។ទី២-ក្រុមហ៊ុន យូ យ៉ាន គឺមានទីតាំងនៅខាងលើ ដោយក្រុមហ៊ុន យូយ៉ាន នេះនៅតែបន្តអាជ្ញាប័ណ្ណរហូតមកដល់បច្ចុប្បន្ននេះ។លោកប្រធានបានបញ្ជាក់ទៀតថា រឿងជីកកាយដីជើងភ្នំព្រះក្នុងរយៈពេលពីរថ្ងៃនេះ គឺជាការជីកតភ្ជាប់ពីផ្លូវម្ខាងទៅម្ខាងប៉ុណ្ណោះ មិនមែនការជីកដីធ្វើអាជីវកម្មនោះទេ។លើសពីនេះ ការចោទប្រកាន់ថា អាជ្ញាធរនិងជំនាញឃុបឃិតគ្នាក្នុងការជីករំលើងភ្នំនេះ សុទ្ធតែរឿងអុជអាល់ផ្ទុយពីការពិតទាំងស្រុង ដាច់ខាតមិនអាចទទួលយកបានទេ។ម្យ៉ាងទៀតចំណុចរណ្តៅដីដែលបាននៅទីនេះ គឺបានបន្សល់ទុកជាង១០ឆ្នាំមកហើយ ពោលគឺតាំងពីលោកមិនទាន់បានស្គាល់ទឹកដីខេត្តកែបមកម្លេះ។
ជាមួយនេះក្នុងនាមជាមន្ត្រីជំនាញ លោកសំណូមពរដល់ក្រុមអ្នកសារព័ត៌មានក្នុងស្រុក បើមុននឹងធ្វើការចុះផ្សាយ សូមវិភាគឲ្យបានល្អិតល្អន់ និងសូមចុះផ្សាយតែព័ត៌មានពិត ដោយគ្មានពាក្យញុះញង់ ល្អឬមិនល្អ ក៏ដោយសូមចុះផ្សាយដោយការពិតទៅចុះ កុំបំផ្លើសបែបនេះអី៕
សេង ណារិទ្ធ
