ខេត្តប៉ៃលិន ៖ ប្រជាពលរដ្ឋជាច្រើននាក់ បាននាំគ្នា ត្អូញត្អែរ និងរិះគន់ថា មន្ត្រីជំនាញគ្រប់ស្ថាប័ននៅច្រកទ្វារអន្តរជាតិមួយនេះ បានយកលុយច្រើន បើទោះបីជាពួកគាត់ធ្វើលិខិតស្នាម ដើម្បីដឹកជញ្ជូនស្របច្បាប់យ៉ាងណាក៏ដោយ សូម្បីតែដឹកដើមដំឡូងពីប្រទេសថៃ យកមកដាំនៅតាមចម្ការក្នុងខេត្តប៉ៃលិន ក៏ត្រូវបង់លុយឱ្យទៅមន្ត្រីគ្រប់ស្ថាប័ន សមត្ថកិច្ចនគរបាលចរាចរណ៍ជើង គោកខេត្តប៉ៃលិនផងដែរ តែគេមិនធ្លាប់ឃើញមានចេញវិក្កយបត្រឱ្យនោះទេ ។
ជាក់ស្តែង កាលពីព្រឹកថ្ងៃទី ០៥ ខែឧសភា ឆ្នាំ២០១៥ កន្លងទៅថ្មីៗនេះ មានបុរសម្នាក់ឈ្មោះ ថយ អាយុ ៥២ឆ្នាំ ជាអ្នកបើកបររថយន្តដឹកដើមដំឡូងមីមកឱ្យកសិករខ្មែរម្នាក់ឈ្មោះ អ៊ុក ទូច ភេទប្រុស អាយុ ៤៧ឆ្នាំ រស់ នៅភូមិអូររអុល ឃុំស្ទឹងកាច់ ស្រុកសាលាក្រៅ បានឱ្យដឹងថា គាត់បានធ្វើលិខិតស្នាមត្រឹមត្រូវអស់ហើយ ដោយបង់ប្រាក់ឱ្យខាងសមត្ថកិច្ចនគរបាលអន្តោប្រវេសន៍ ដើម្បីនាំពូជដំណាំនេះ មកឱ្យលោក ទូច ដាំនៅទឹកដីខេត្តប៉ៃលិន ។ លុះពេលដឹកចេញពីខេត្តចាន់បូរី ប្រទេសថៃ ចូលមកតាមច្រកអន្តរជាតិព្រំ ស្រាប់តែខាងសមត្ថកិច្ចជំនាញគ្រប់ស្ថាប័ន កាក់ឱ្យបង់ប្រាក់ដោយកន្លែងខ្លះអស់ ១០០០បាត និងកន្លែងខ្លះទៀតអស់ជិត ១០០០បាត (ប្រាក់ថៃ)បើសរុបទាំងអស់តាំងពីទឹកដីថៃ រហូតមកដល់ចម្ការរបស់គាត់ ចំណាយអស់ប្រាក់ជាង ៣០០០បាត ឯណោះ (ប្រហែល ៤០ម៉ឺនរៀល) ។
ប្រភពបន្តថា បញ្ហានេះធ្វើឱ្យគាត់បាត់បង់ប្រាក់ចំណូលប្រចាំគ្រួសារ និងធ្វើឱ្យជីវភាពរស់នៅកាន់តែក្រីក្រ ឡើងៗថែមទៀត ព្រោះពូជដំឡូងមីខាងលើនេះ គាត់យកមកដាំ និងជួសដើមដំឡូងមីដែលងាប់នៅក្នុងចម្ការ ប៉ុណ្ណោះ មិនបានរកស៊ីជូញដូរអ្វីច្រើននោះឡើយ ។ គាត់បន្តទៀតថា កាលពីឆ្នាំ២០១៤ កន្លងទៅ ការដឹកដើមដំឡូង មីចូលមកដាំក្នុងខេត្តប៉ៃលិន ខាងច្រកទ្វារអន្តរជាតិមិនយកលុយកាក់អ្វីច្រេណិដូចឆ្នាំ ២០១៥ នេះទេ ។ ដូច្នេះពួកគាត់មិនដឹងថា មកពីមូលហេតុអ្វីទេ បានជាគេយកថ្លៃខ្ពស់បែបនេះ ? គេយកទៅចូលរដ្ឋ ឬចូលក្នុងហោប៉ៅ ខ្លួនឯង ? កាលពីថ្ងៃទី ០៣ និងទី ០៤ ខែឧសភា ឆ្នាំ២០១៥ ច្រកទ្វារអន្តរជាតិខ្មែរ-ថៃ ខេត្តប៉ៃលិន ត្រូវបានប្រជាពលរដ្ឋផ្អាកការនាំកសិផលចេញដោយសារតែពួកគាត់អះអាងថា មន្ត្រីមុខលុយអស់នោះឱ្យបង់ថ្លៃនាំចេញខ្ពស់ហួសហេតុពេក ។
សារព័ត៌មានយើងពុំអាចសុំការបំភ្លឺពីលោកប្រធានច្រកទ្វារអន្តរជាតិព្រំ បានទេនៅថ្ងៃនេះ ៕
