កំពត ៖ លោកឧត្តមសេនីយ៍ទោ ទូច ពលៈ អនុប្រធាននាយកដ្ឋាននគរបាលការពារព្រំដែនទឹក នៃវរសេនាតូចនគរបាលការពារព្រំដែនទឹក កំពត-កែប និងលោកស្រី នៅព្រឹកថ្ងៃទី២៧ខែធ្នូ ឆ្នាំ២០១៧បាននាំយកក្តាម្ឈូស១ អង្ករ១បាវទំងន់៥០គីឡូក្រាម និងថវិការ១០មឺុនរៀល មកផ្តល់ជូនដល់ក្រុមគ្រួសារសព លោកយាយ អ៊ាប ស៊ាប អាយុ៦៦ឆ្នាំ ដែលជាស្ត្រីម៉េម៉ាយ ស្ថិតក្នុងភូមិអណ្តូងខ្មែរ សង្កាត់អណ្តូងខ្មែរ ក្រុង-ខេត្តកំពត ដែលស្លាប់ដោយរោគាពាធ។
នេះជាលើកទី១០៨ហើយ ដែលលោកឧត្តមសេនីយ៍ទោ ទូច ពលៈ និងលោកស្រី បានឧបត្ថម្ភសម្ភារៈ ថវិកានិងម្ឈូសដល់ក្រុមគ្រួសារសពក្រីក្រ ក្នុងតំបន់ខេត្តកំពត នាពេលកន្លងមក។
ជាមួយនឹងការផ្តល់សម្ភារៈ ថវិកាព្រមទាំងក្តាម្ឈូសនេះ ក្រុមគ្រួសារ កូនចៅនៃសពលោកយាយ អ៊ាប ស៊ាប ក៏សូមថ្លែងអំណរគុណយ៉ាងជ្រៀលជ្រៅដល់ម្ចាស់ទាន ដែលបានផ្តល់សម្ភារៈ ថវិកានិងម្ឈូសដល់ក្រុមគ្រួសារសពនាពេលនេះ។
សូមបញ្ជាក់ផងដែរថា៖ កន្លងមកអាជ្ញាធរគ្រប់ជាន់ថ្នាក់ ក៏ដូចជាមន្ត្រីរាជការ កងកំលាំងប្រដាប់អាវុធគ្រប់អង្គភាពទូទាំងខេត្តកំពត ពិសេស សាខាកាកបាទក្រហមកម្ពុជា ក្នុងខេត្ត តែងមានប្រពៃណីក្នុងកិច្ចការជួយទំនុកបំរុងដល់ក្រុមគ្រួសារក្រីក្រនិងជនរងគ្រោះដោយប្រការផ្សេងៗ ស្ថិតតាមតំបន់នានាទូទាំងខេត្ត ដោយមិនរើសអើងពណ៌សម្បុរ ឬប្រកាន់និន្នាការនយោបាយឡើយ។
ដោយឡែក ចំពោះប្រធានអង្គភាពវរការពារព្រំដែនទឹក កំពត-កែប រយៈពេលកន្លងមកក៏តែងតែចុះជួយអន្តរាគមន៍ ជួយចែករំលែកដល់ក្រុមគ្រួសារក្រីក្រនិងជនងាយរងគ្រោះក្នុងហេតុការណ៍ផ្សេងៗ ដូចជាខ្យល់ព្យុះ-ខ្យល់កន្ទ្រាក់ គ្រោះទឹកជំនន់ និងភ្លើងឆេះផ្ទះជាដើម៕
សេង ណារិទ្ធ
