កំពត ៖ មនុស្សម្នាក់បានស្លាប់យ៉ាងរន្ធត់និងម្នាក់ទៀតរងរបួសធ្ងន់សល់តែដង្ហើមចង្រិត ដោយសារជួបឧបទ្ទវហេតុគ្រោះថ្នាក់ចរាចរណ៍ រវាងរថយន្តនឹងរថយន្តក្នុងទិសដៅផ្ទុយគ្នា លើកំណាត់ផ្លូវជាតិលេខ៣។
ហេតុការណ៍នេះត្រូវបានប្រភពបញ្ជាក់ប្រាប់ថា បានកើតឡើងកាលពីវេលាម៉ោង១៦និង៤៥នាទី ល្ងាច ថ្ងៃទី២៥ខែធ្នូ ឆ្នាំ២០១៧រវាងរថយន្តដឹកស្រូវ បុកជាមួយរថយន្តសណ្តោងក្នុងទិសដៅបញ្ច្រាសគ្នា ត្រង់ចំណុចគល់ស្ពានព្រែកត្នោត ស្ថិតក្នុងភូមិព្រែកក្រែង ឃុំព្រែកត្នោត ស្រុកទឹកឈូ ខេត្តកំពត។
ប្រភពដដែលបានឲ្យដឹងទៀតថា៖មុនពេលកើតហេតុរថយន្តសណ្តោងក្បាលពណ៌លឿងធ្វើដំណើរមកពីកើតទៅលិច ឯរថយន្តដឹកស្រូវពណ៌ខៀវ មកពីលិចទៅកើត លុះមកដល់ចំណុចស្ពានក៏រេចង្កូតបុកគ្នាពេញទំហឹងតែម្តង ហើយការប៉ះទង្គិចគ្នាយ៉ាងដំណំនេះបានធ្វើឲ្យភាគីរថយន្តដឹកស្រូវស្លាប់ម្នាក់ភ្លាមៗ និងរបួសធ្ងន់ម្នាក់។ចំពោះហេតុការណ៍ខាងលើក៏បានបណ្តាលឲ្យរថយន្តដឹកស្រូវក្រឡាប់ផ្អៀងបង្ហៀរបាវស្រូវចេញពីរថយន្តផងដែរ។
សាក្សីបានអះអាងថា៖ ការប៉ះទង្គិចនេះ អាចមកពីសភាពផ្លូវត្រង់ចំណុចគល់ស្ពានមានរាងកោងដូចដងនង្គ័ល ស្របពេលមានភ្លៀងធ្លាក់មកស្រិចៗផង ទើបរថយន្តទាំងពីរគ្រឿងជាន់ហ្វ្រាំងមិនជាប់ ហើយរេចង្កូតទៅបុកគ្នាចំពីមុខទាំងកំរោលបួនជ្រុងតែម្តង។
តាមការបញ្ជាក់ពីសមត្ថកិច្ចជំនាញនិយាយថា៖ គ្រោះថ្នាក់បែបនេះផ្តើមមកពីកត្តាមនុស្សសុទ្ធសាធ ពោលគឺការបើកបរខ្វះភាពប្រុងប្រយ័ត្ន បើកបរដោយគ្មានការយោគយល់គ្នា។ម្យ៉ាងទៀតចំណុចស្ពានព្រែកត្នោត ជាកំណាត់ផ្លូវមានសភាពកោងខ្លាំង ហើយឧស្សាហ៍កើតហេតុការណ៍គ្រោះថ្នាក់ចរាចរណ៍ជាញឹកញាប់ផងដែរ បើអ្នកបើកបរមានការប្រហែសតែបន្តិច ពិតជាបង្កជាសោកនាដកម្មក្នុងមួយប៉ព្រិចភ្នែក។ប៉ូលិសបានឲ្យដឹងទៀតថា អ្នកស្លាប់ក្នុងករណីនេះ មានឈ្មោះណី ចំរើន ភេទប្រុស អាយុ៤០ឆ្នាំ(អ្នកបើកបររថយន្តដឹកស្រូវ)មានទីលំនៅក្នុងភូមិ៣ សង្កាត់៤ ខេត្តព្រះសីហនុ។ចំណែកអ្នកបើកបររថយន្តសណ្តោង ឈ្មោះ ស្រី ចន្ថា ភេទប្រុស អាយុ៤៣ឆ្នាំ។
បច្ចុប្បន្ន សមត្ថកិច្ចនៃអធិការដ្ឋាននគរបាលស្រុកទឹកឈូ កំពុងវាស់វែងនិងនាំយកមធ្យោបាយធុនធំទាំងពីរគ្រឿងទៅរក្សាទុកដើម្បីដោះស្រាយគ្នានៅពេលក្រោយ។ចំណែកអ្នករបួសធ្ងន់ សមត្ថកិច្ចបានបញ្ជូនទៅសង្គ្រោះបន្ទាន់នៅឯមន្ទីរពេទ្យ។ដោយឡែកសពបុរសរងគ្រោះសមត្ថកិច្ចកំពុងរង់ចាំក្រុមគ្រួសារមកទទួលយកទៅធ្វើបុណ្យ៕
ណារិទ្ធ
