កំពង់ស្ពឺ ៖ នៅទីស្នាក់ការសមាគមនារីកម្ពុជា ដើម្បីសន្តិភាពនិងអភិវឌ្ឍន៍ខេត្តកំពង់ស្ពឺ ព្រឹកថ្ងៃទី២៣ ខែធ្នូ ឆ្នាំ២០១៧ មានរៀបចំពិធីសំណេះសំណាលជាមួយក្រុមគ្រួសារ ងាយរងគ្រោះចំនួន ១០០ គ្រួសារ មកពីក្រុងច្បារមន និង ស្រុកសំរោងទង ខេត្តកំពង់ស្ពឺហើយដែលពិធីនេះ បានប្រព្រឹត្តិទៅ ក្រោមអធិបតីភាព ឯកឧត្តម សម រិទ្ធី ជំនួយការផ្ទាល់ឯកឧត្តម ហ៊ុន ម៉ានី អ្នកតំណាងរាស្ត្រមណ្ឌលកំពង់ស្ពឺដោយមានការចូល ពីសំណាក់មន្ត្រីអ្នកមុខអ្នកការក្នុងខេត្តកំពង់ស្ពឺ និងតំណាងជនងាយរងគ្រោះ មកពីស្រុក ចំនួន ៦ ផ្សេងទៀតផងដែរ ។
មានប្រសាសន៍សំណេះសំណាល ជាមួយក្រុមគ្រួសារងាយរងគ្រោះ ឯកឧត្តម សម រិទ្ធី បានពាំនាំនូវការផ្តាំផ្ញើសាកសួរសុខទុក្ខ ពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្តេច កត្តិព្រឹទ្ធបណ្ឌឹត ប៊ុន រ៉ានីហ៊ុនសែន ប្រធានកាកបាទក្រហមកម្ពុជា និងពីសំណាក់ ឯកឧត្តម ហ៊ុន ម៉ានី ជូនចំពោះបងប្អូន ទាំងអស់ ដោយឯកឧត្តម បានបញ្ជាក់ច្បាស់ថា : ជាមួយនិងអំណោយដ៍តិចតួចនៅពេលនេះ គឺវាគ្រាន់តែជាការរួមចំណែក រំលែកនូវការលំបាករបស់បងប្អូនមួយរយះពេលខ្លី តែប៉ុណ្ណោះ សំខាន់គឺសុំឲ្យបងប្អូន ត្រូវប្រឹងប្រែងធ្វើការងារបង្ករបង្កើនផល មានទាំងការ ដាំដំណាំរួមផ្សំ និងចិញ្ចឹមសត្វដើម្បីលើកកម្ពស់ជីវភាពរស់នៅ តាមក្រុមគ្រួសារនិមួយៗ ឲ្យកាន់តែប្រសើរឡើង ៕
