ភ្នំពេញ ៖ កាលពីថ្ងៃទី ២១ ខែធ្នូ ឆ្នាំ២០១៧ ឯកឧត្តម ស៊ុន ចាន់ថុល ទេសរដ្ឋមន្ត្រី រដមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់មណ្ឌលត្រួតពិនិត្យលក្ខណៈបច្ចេកទេសយានយន្ត (សាខាជ្រោយចង្វារ)ដោយមានការអញ្ជើញចូលរួមពីតំណាងក្រុមហ៊ុន CMVIC ថ្នាក់ដឹកនាំ និងមន្ត្រីរាជការក្រសួងសាធារណការ និងដឹកជញ្ជូនជាច្រើនរូបផងដែរ ។
មណ្ឌលត្រួត ពិនិត្យលក្ខណៈបច្ចេកទេសយានយន្ត (សាខាជ្រោយចង្វារ)នេះ មានអាស័យដ្ឋានផ្ទះលេខ ២៩១ ផ្លូវជាតិលេខ ៦អា ភូមិគៀនឃ្លាំង សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។ ទីតាំងថ្មីនេះ មានទំហំប្រមាណ ៥ពាន់ម៉ែត្រការ៉េ ដែលបានចាប់ផ្តើមសាងសង់នៅដើមខែមិថុនា ឆ្នាំ២០១៧នេះ ។
គោលបំណងនៃការបង្កើតមណ្ឌលត្រួតពិនិត្យលក្ខណៈបច្ចេកទេសយានយន្ត (សាខាថ្មីនេះ គឺដើំម្បីពង្រីក និងបង្ខិត សេវាសាធារណៈឱ្យកាន់តែជិតប្រជាពលរដ្ឋ បង្កភាពងាយស្រួលចំណេញពេលវេលា កាត់បន្ថយគ្រោះថ្នាក់ចរាចរណ៍ និងការចំណាយផ្សេងៗ ។ ប្រជាពលរដ្ឋដែលរស់នៅខណ្ឌជ្រោយចង្វារ និងខណ្ឌដែលនៅជាប់អាចយកយានយន្តរបស់ខ្លួន មកពិនិត្យលក្ខណៈបច្ចេកទេសយានយន្ត នៅទីតាំងថ្មីនេះបាន ។
មណ្ឌលបំពាក់ឧបករណ៍ត្រួត ពិនិត្យលក្ខណៈបច្ចេកទេសទំនើប ២ខ្សែ ផលិតនៅប្រទេសចិន ឆ្នាំ២០១៧ ដែលខ្សែនីមួយៗមានឧបករណ៍វាស់ផ្សែងសាំង ឧបករណ៍វាស់ផ្សេងម៉ាស៊ូត ឧបករណ៍វាស់ល្បឿន រណ្តៅមើលបាតយាន ឧបករណ៍វាស់ភ្លើងហ្វាកូត ឧបករណ៍វាស់ស៊ីផ្លេ ឧបករណ៍លំងាកចង្កូត ឧបករណ៍ថ្លឹងទម្ងន់ និងឧបករណ៍វបាស់កម្លាំងហ្វ្រាំង ។ ខ្សែនីមួយៗ អាចឈៀករថយន្តបានជាមធ្យម ៩៥គ្រឿង ក្នុងរយៈពេល ៨ម៉ោង ឬត្រូវចំណាយពេល ៥នាទី ក្នុងរថយន្ត ១គ្រឿងៗ បើកកាត់ឧបករណ៍ត្រួតពិនិត្យប្រវែង ៥០ម៉ែត្រ ។
ថ្លែងទៅកាន់អង្គពិធីនាឱកាសនោះដែរ ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បាន អំពាវនាវដល់បងប្អូនប្រជាពលរដ្ឋសូមយកយានយន្តរបស់ខ្លួនមកត្រួត ពិនិត្យលក្ខណៈបច្ចេកទេសយានយន្តឱ្យបានត្រឹមត្រូវ ដើម្បីកាត់បន្ថយគ្រោះថ្នាក់ចរាចរណ៍ ដែល់បណ្តាលមកលពីបញ្ហាបច្ចេកទេសយានយន្តរបស់ខ្លួន និងបានស្នើឱ្យប្រជាពលរដ្ឋ ប្រើប្រព័ន្ធអនឡាញ ដើម្បិស្នើសុំឈៀកត្រួត ពិនិត្យលក្ខណៈបច្ចេកទេសយានយន្ត ក្នុងការចុះបញ្ជីយានយន្ត និងការស្នើសុំ សេវាចាំបាច់ផ្សេងៗទៀត ។
ជាមួយគ្នានោះដែរ ឯកឧត្តម ស៊ុន ចាន់ថុល បានគូសបញ្ជាក់ថា ក្រសួងសាធារណការ និងដឹកជញ្ជូនសហការជាមួយ ក្រុមហ៊ុនឯកជននានាបង្កើតប្រព័ន្ធអនឡាញ ដើម្បីស្នើសុំសេវាត្រួតពិនិត្យលក្ខណៈបច្ចេកទេសយានយន្ត ការចុះបញ្ជីយានយន្ត ការចេញប័ណ្ណបើកបរ និងបានជម្រុញឱ្យមន្ត្រីពាក់ព័ន្ធទាំងអស់ ខិតខំប្រឹងប្រែងប្រើប្រាស់ប្រព័ន្ធអនឡាញ ដើម្បីកាត់បន្ថយ ចំណាយក្រៅផ្លូវការ តាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជា ណាចក្រកម្ពុជា និងបានផ្តាំផ្ញើឱ្យមន្ត្រីដែលផ្តល់សេវាទាំងអស់ត្រូវតាំងខ្លួនជាអ្នកបម្រើប្រជាពលរដ្ឋ ធ្វើឱ្យមានតម្លាភាព ធ្វើឱ្យ មានប្រសិទ្ធភាព និងចំណាយពេលវេលាកាន់តែតិច ។
ឯកឧត្តម ស៊ុន ចាន់ថុល ទេសរដ្ឋមន្ត្រី បានផ្តាំផ្ញើទៅដល់បងប្អូនប្រជាពលរដ្ឋថា ក្រសួងបានបង្កើតមណ្ឌលផ្តល់ព័ត៌មាន ដែលមានទីតាំងឋិតនៅក្នុងក្រសួង ដើម្បីដោះស្រាយបញ្ហាទាក់ទងនឹងការស្វែងរកសេវាសាធារណៈ សម្រាប់បងប្អូនប្រជាជន តាមរយៈការហៅទូរស័ព្ទទៅកាន់លេខ (០១៥៩២៩០៩០)(០៨៥៩២៩០៩០)(០៦៧៩២៩០៩០)និងបានអំពាវនាវដល់ ប្រជាពលរដ្ឋសូមកុំពឹងផ្អែកលើអ្នករត់ការ ដើម្បីដោះស្រាយបញ្ហាដែលបងប្អូនប្រជាពលរដ្ឋជួបប្រទះ ។
សូមបញ្ជាក់ថា ក្រុមហ៊ុន CMVIC បានចាប់ផ្តើមការត្រួតពិនិត្យយានយន្តតាំងពីឆ្នាំ២០០០ រហូតមកដល់ពេលនេះមានចំនួន ១៤មណ្ឌល ព្រមទាំងមានម៉ាស៊ីនត្រួតពិនិត្យលក្ខណៈបច្ចេកទេសយានយន្តចល័តចំនួន ២គ្រឿងបន្ថែម ដើម្បីការត្រួតពិនិត្យលក្ខណៈបច្ចេកទេសយានយន្តរថយន្តនៅតាមបណ្តាខេត្តនានា ដែលមិនទាន់មានមណ្ឌលត្រួតពិនិត្យលក្ខណៈបច្ចេកទេសយានយន្ត ៕
