ខេត្តសៀមរាប៖ នៅក្នុងពិធីបើកព្រឹត្តិការណ៍ អង្គរសង្ក្រាន្តលើកទី៣ឆ្នាំ២០១៥ សម្តេចតេជោ ហ៊ុន សែន បានថ្លែងទៅកាន់សាធារណៈជនថា នេះគឺឆ្នាំដ៏ពិសេស ដែលលោកសុខចិត្តលុបចោល ដំណើរទៅកាន់សាធារណរដ្ឋកូរ៉េ ដើម្បីយកឱ្យកាសចូលរួមជាមួយប្រជាពលរដ្ឋខ្មែរ ដែលកំពុងប្រារព្ធព្រឹត្តិការណ៍អង្គរសង្ក្រាន្តអបអរឆ្នាំថ្មីវិញ។
សម្តេចតេជោ ហ៊ុន សែនបញ្ជាក់ទៀតថាពេលនេះប្រទេសកម្ពុជាបានដើរដល់ដំណាក់កាលថ្មី មួយទៀត ដោយសារមានវត្តមានរបស់លោកសម រង្ស៊ី និងភរិយា ចូលរួមក្នុងវេទិការ។ នៅថ្ងៃនេះវប្បធម៌សន្ទនាមួយបានចាប់ផ្ដើមនៅលើទឹកដី កម្ពុជាជំនួសឱ្យការប្រទូស្តរាយ ។ គ្មានការដោះស្រាយតាមរយៈជម្លោះប្រដាប់អាវុធ ឬការប្រទូស្តរាយនយោបាយណាមានលទ្ធល្អ ជាជាងការសន្ទនាគ្នាទេ ។ ឥឡូវនេះ យើងត្រូវលើកកំពស់ការសន្ទនារវាងអ្នកនយោបាយ ។ «វប្បធម៌សន្ទនារបស់យើងគោលដៅសំខាន់២យ៉ាង ១ពង្រឹងសន្តិភាព មួយទៀតជំរុញ ការអភិវឌ្ឍន៍ប្រទេសជាតិចេះធ្វើការជាមួយគ្នា»។
នេះ គឺជាឆ្នាំដ៏ពិសេសជាងគេក្នុងរយៈពេលជិត៣០ឆ្នាំមកហើយ។ការចាត់ទុក បែបនេះ ដោយសារតែមានវត្តមាន មេបក្សប្រឆាំង បានអញ្ជើញចូលរួមក្នុងពិធីបើកព្រិត្តិការណ៍អង្គរសង្ក្រាន្តជាមួយគ្នា ជាលើកដំបូង ដែលពុំធ្លាប់មានក្នុងប្រវត្តិសាស្ត្រទាល់តែសោះ ។
វត្តមានរបស់ប្រមុខរដ្ឋាភិបាលនិងមេបក្សប្រឆាំង ដែលបង្កើតឱ្យមានជាប្រវត្តិសាស្ត្រនេះគឺធ្វើឡើងរយៈពេល៦ម៉ោង នៅមុនពេលដែលបុណ្យចូលឆ្នាំថ្មី ប្រពៃណីជាតិខ្មែរថ្ងៃដំបូងបានមកដល់ ៕
