(កំពត) ៖ មានករណីភ្ញាក់ផ្អើលមួយបន្ទាប់ពីអ្នកស្រុកប្រទះឃើញសពបុរសម្នាក់ត្រូវគេ សម្លាប់ដោយកាត់ក្បាលយកទៅបាត់។ហើយករណីខាងលើអ្នកភូមិសង្ស័យថា ជារឿងឃាតកម្មផ្តើមដោយសារគំនុំធំជាងមហាមេឃ។
ហេតុការណ៍ភ្ញាក់ផ្អើលនេះ បានកើតឡើងកាលពី រសៀលថ្ងៃទី២០ខែវិច្ឆិកា ឆ្នាំ២០១៧ ត្រង់ចំណុចភូមិដំណាក់ត្រយឹង ឃុំតាកែន ស្រុកឈូក ខេត្តកំពត។
ពាក់ព័ន្ធនឹងករណីខាងលើ សមត្ថកិច្ចបានប្រាប់ឲ្យដឹងថា ជនរងគ្រោះមានឈ្មោះ អយ សុខ ភេទប្រុស អាយុ៦២ឆ្នាំ មានទីលំនៅក្នុងភូមិដំណាក់ត្រយឹង ឃុំតាកែន ស្រុកឈូក ខេត្តកំពត ដែលជាកន្លែងកើតហេតុ។សមត្ថកិច្ចបានប្រាប់ទៀតថា កាលពីវេលាម៉ោង២រសៀល ថ្ងៃទី២០ខែវិច្ឆិកា ឆ្នាំ២០១៧ខណៈដែលអ្នកភូមិដើរក្បែររោងចាំស្រែរបស់ជនរងគ្រោះ ស្រាប់តែប្រទះឃើញបុរសនោះត្រូវគេសម្លាប់យ៉ាងព្រៃផ្សៃ ដោយកាត់ក្បាលយកទៅបាត់តែម្តង។
ចំពោះឃាតកម្មដ៏សាហាវនេះ បន្ទាប់ពីទទួលព័ត៌មាន សមត្ថកិច្ចបានចុះទៅដល់ទីតាំងកើតហេតុ ហើយក៏បានសន្និដ្ឋានថា ការសម្លាប់នេះអាចផ្តើមឡើងដោយជនឬក្រុមណាមួយធ្លាប់មានគំនុំជាមួយបុរសរងគ្រោះ ដ៏ពុះកញ្ជ្រោល។
ក្រោយពីមានករណីមនុស្សឃាតកើតឡើងក្នុងភូមិសាស្ត្រខាងលើ សមត្ថកិច្ចបាននិងកំពុងតាមស្រាវជ្រាវយ៉ាងយកចិត្តទុកដាក់បំផុត ដើម្បីឈានទៅកំណត់មុខសញ្ញា វែកមុខជនដៃដល់មកផ្តន្ទាទោសទៅតាមផ្លូវច្បាប់។/
ណារិទ្ធ
