កំពត ៖ ទីតាំងដីទំនាស់មួយកន្លែង ស្ថិតក្នុងភូមិអង្កាញ់ក្រោម ឃុំតេជោអភិវឌ្ឍន៍ ស្រុកឈួក ខេត្តកំពត ដែលកន្លងមកត្រូវបានហាមប្រាមដោយមានលិខិតផ្ទុកផ្តាក់ឲ្យចុះបញ្ជីអំពីការហាមឃាត់ របស់សាលាដំបូងខេត្តកំពត លេខ១០៤ ចុះថ្ងៃទី៣០ខែសីហា ឆ្នាំ២០១៦របស់ក្រឡាបញ្ជី នួន សុផុន និងដីកាសម្រេចរក្សាការពារ លេខ០៩ចុះថ្ងៃទី១៥ខែមករា ឆ្នាំ២០១៦របស់ចៅក្រម ខៀវ ផាន់ណា ដែលតម្រូវឲ្យលោកមេឃុំ តេជោអភិវឌ្ឍន៍ ចុះអនុវត្តនិងហាមប្រាមកូនបំណុល កុំឲ្យប៉ះពាល់ឬធ្វើសកម្មភាពផ្សេងៗនៅលើចំណុចដីខាងលើនោះ ស្រាប់តែពេលនេះ បែរជាអនុញ្ញាត្តឲ្យចុងចោទជាកូនបំណុលសង់លំនៅឋានផ្គើននឹងច្បាប់តុលាការទៅវិញ។
បើផ្អែកតាមការអះអាងពីសំណាក់ម្ចាស់បំណុលឈ្មោះ ឡឹក គង់ ភេទស្រី អាយុ៥២ឆ្នាំ មានទីកំនៅស្ថិតក្នុងភូមិអង្លាញ់ក្រោម ឃុំតេជោអភិវឌ្ឍន៍ ស្រុកឈូក ខេត្តកំពត បាននិយាយថា ដីដែលគេកំពុងរំលោភបំពាននេះ គឺអ្នកស្រីបានកាន់កាប់ក្នុងអំឡុងឆ្នាំ២០០២មកម្លេះ ហើយទីតាំងដីខាងលើគាត់ក៏បានបោះបង្គោលកំណត់ព្រំប្រទល់ត្រឹមត្រូវ ថែមទាំងបានធ្វើរបងនិងអាស្រ័យផលដំណាំនៅលើដីរបស់ខ្លួនជាបន្តបន្ទាប់ លុះដល់ឆ្នាំ២០១១ស្រាប់តែឈ្មោះឡឹក ខៃ ភេទប្រុស អាយុ៥១ឆ្នាំ មានទីលំនៅក្នុងភូមិអូរដូង ឃុំពងទឹក ស្រុកដំណាក់ចង្អើរ ខេត្តកែប បានមកកាប់បំផ្លាញផលដំណាំក្នុងដីរបស់អ្នកស្រីខ្ទេចខ្ទីអស់ ទើបគាត់ដាក់ពាក្យបណ្តឹងទៅសាលាដំបូងខេត្តកំពតឲ្យជួយរកយុតិ្តធម៌ ។ ទីបំផុតភាគីចុងចោទ ឈ្មោះ ឡឹក ខៃ ក៏ត្រូវចាញ់ក្តី ថែមទាំងប្រគល់សំណងរដ្ឋប្បវេណីចំនួន២.០០០.០០០រៀល (ពីរលានរៀលគត់)ដល់អ្នកស្រីដែលជាដើមបណ្តឹង។
គាត់បានបញ្ជាក់ទៀតថា ក្រោយមកទីតាំងដីនេះតុលាការក៏បានចេញលិខិតរក្សាការពារដោយមិនអនុញ្ញាត្តឲ្យភាគីណាមួយធ្វើសកម្មភាពនៅលើដីនេះទៀតទេ ដោយរង់ចាំការសម្រេចដល់អង្គសេចក្តី។ ស្រាប់តែមិនបានប៉ុន្មានផង ក៏មានឈ្មោះ អីុង រឿន ជាប្រពន្ធ និងឈ្មោះ សៀង ផល្លា ជាកូនស្រីនាំគ្នា មកសង់លំនៅឋានក្នុងរបងដីរបស់អ្នកស្រី ដោយពួកគេមិនខ្លាចអ្នកណាឡើយ ហើយលោកមេឃុំតេជោអភិវឌ្ឍន៍ ហាក់ធ្វើមិនដឹងមិនឮ ថែមទាំងបណ្តែតបណ្តោយឲ្យកូនបំណុលនាំគ្មាចូលលុកលុយកាប់ឆ្ការដំណាំនិងសង់ផ្ទះទាំងបំពាន ហើយករណីខាងលើសង្ស័យមានការឃុបឃិតគ្នារវាងលោកមេឃុំនិងកូនបំណុលទៀតផង។
ជាមួយគ្នានេះដែរ លោកម៉ៅ ម៉ារឌី នាយប៉ុស្តិ៍នគរបាលឃុំតេជោអភិវឌ្ឍន៍ បានប្រាប់តាមទូរស័ព្ទថា ករណីបំពានសិទ្ធិដីធ្លីខាងលើលោកក៏ដឹងខ្លះៗដែរ ប៉ុន្តែដោយគ្មានការបង្គាប់បញ្ជាពីលោកមេឃុំ ព្រោះដឹងស្រាប់ហើយលោកជាសមត្ថកិច្ច តែស្ថិតក្រោមការត្រួតត្រារបស់ក្រុមប្រឹក្សាឃុំ ទើបលោកមិនហ៊ានធ្វើផ្តេសផ្តាស។
ឆ្លើយតបជាមួយអ្នកសារព័ត៌មាន នៅរសៀលថ្ងៃទី៧ខែកញ្ញា ឆ្នាំ២០១៧នេះ លោក សាន គ្រីយ៉ា មេឃុំតេជោអភិវឌ្ឍន៍ បានប្រាប់តាមទូរស័ព្ទថា ព្រឹកមិញលោកជាប់ប្រជុំនៅស្រុកឈូក ទើបមិនបានដឹងរឿងរ៉ាវបែបនេះ ប៉ុន្តែមិនអីទេបើមានករណីដូចនេះមែនចាំព្រឹកស្អែក លោកនឹងទៅហាមឃាត់រាល់សកម្មភាពខាងលើនេះតែម្តង។
ទោះជាមានការស្រាយបំភ្លឺជុំវិញការបំពានដីទំនាស់នេះក្តី ក៏មានមជ្ឈដ្ឋានជាច្រើនលួចទំលាយថា ករណីសង់លំនៅឋាននេះ អាចធ្វើតាមការបង្គាប់បញ្ជាពីសំណាក់លោកមេឃុំ ព្រោះគេដឹងថា នៅក្នុងដៃលោកមេឃុំ ឈ្មោះសាន គ្រីយ៉ា ក៏មានលិខិតហាមឃាត់របស់តុលាការដែរ ចុះហេតុអ្វីនៅពេលកូនបំណុលធ្វើសកម្មភាពដឹកជញ្ជូនសម្ភារៈមកសង់លំនៅឋានលើដីទំនាស់បែរជាមិនផ្តល់តួនាទីដល់សមត្ថកិច្ចទៅទប់ស្កាត់ បែរជាចាំហៃអើៗទៅវិញ ឬមួយមានចេតនាចង់ផ្គើននឹងច្បាប់របស់សាលាដំបូងខេត្តកំពត ដែលបានបង្គាប់ឲ្យអាជ្ញាធរដែនដី មានវិធានការទប់ស្កាត់និងរក្សាការពារ ឲ្យខាងតែបាននោះ ៕
ណារិទ្ធ
