ពោធិ៍សាត់៖ព្រឹកថ្ងៃទី២ ខែតុលា ឆ្នាំ២០២៦ នៅសាលប្រជុំធំ ទេពឧកញ្ញា ឃ្លាំងមឿង សាលាខេត្ត មានរៀបចំកម្មវិធីជួបសំណេះសំណាល និងសួរសុខទុក្ខដល់កងកម្លាំងនៃស្នងការដ្ឋាននគរបាលខេត្តពោធិ៍សាត់ បញ្ជាការដ្ឋានកងរាជអាវុធហត្ថខេត្ត និងតំបន់សឹករងខេត្តពោធិ៍សាត់ ក្នុងក្របខណ្ឌសម្ព័ន្ធមេត្រីភាពជាមួយក្រសួងរ៉ែ និងថាមពល។
កម្មវិធីនេះប្រព្រឹត្តទៅក្រោមអធិបតីភាព ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល និង ឯកឧត្តម ខូយ រីដា អភិបាល នៃគណៈអភិបាលខេត្តពោធិ៍សាត់ ព្រមទាំងមានការអញ្ជើញចូលរួមពីឯកឧត្តម លោកជំទាវ លោកស្នងការ និងលោកស្នងការរងនគរបាលខេត្ត លោកមេបញ្ជាការ និងលោកមេបញ្ជាការរងកងរាជអាវុធហត្ថខេត្ត ព្រមទាំងលោកមេបញ្ជាការ និងលោកមេបញ្ជាការរងតំបន់សឹករងខេត្ត និងមន្ត្រីពាក់ព័ន្ធជាច្រើនរូប។
ក្នុងឱកាសនោះ លោកឧត្តមសេនីយ៍ត្រី នូវ តាល់ ស្នងការស្តីទី បានអានរបាយការណ៍ស្វាគមន៍ និងថ្លែងអំណរគុណយ៉ាងជ្រាលជ្រៅចំពោះឯកឧត្តមរដ្ឋមន្ត្រី កែវ រតនៈ និងក្រសួងរ៉ែ និងថាមពល ដែលតែងតែយកចិត្តទុកដាក់ចំពោះសុខទុក្ខ និងជីវភាពរបស់កងកម្លាំងនៅខេត្តពោធិ៍សាត់។
លោកឧត្តមសេនីយ៍ត្រី បានបញ្ជាក់ថា ក្រសួងរ៉ែ និងថាមពល តែងតែផ្តល់ការគាំទ្រ និងឧបត្ថម្ភជាបន្តបន្ទាប់ដល់កងកម្លាំង តាមរយៈការផ្តល់គ្រឿងឧបភោគបរិភោគ និងថវិកា ជាពិសេសក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ ដែលជាការបង្ហាញពីស្មារតីយកចិត្តទុកដាក់ និងចំណងសាមគ្គីភាពដ៏រឹងមាំក្នុងក្របខណ្ឌសម្ព័ន្ធមេត្រីភាព។
ថ្លែងក្នុងឱកាសជួបសំណេះសំណាលនេះ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានថ្លែងអំណរគុណ និងកោតសរសើរចំពោះកងកម្លាំងទាំងបីប្រភេទ ដែលបានខិតខំលះបង់កម្លាំងកាយចិត្ត បំពេញតួនាទី និងភារកិច្ចនៅតាមមូលដ្ឋាន ព្រមទាំងចូលរួមថែរក្សាសន្តិសុខ សណ្តាប់ធ្នាប់សាធារណៈ និងការពារបូរណភាពទឹកដីជាតិ។
ឯកឧត្តមរដ្ឋមន្ត្រី បានលើកឡើងថា កងកម្លាំងទាំងបីប្រភេទ ត្រូវបន្តពង្រឹងការយកចិត្តទុកដាក់ និងបំពេញតួនាទី ភារកិច្ចដែលថ្នាក់ដឹកនាំប្រគល់ជូន ប្រកបដោយស្មារតីទទួលខុសត្រូវខ្ពស់ ដើម្បីធានាបាននូវសន្តិសុខ សុវត្ថិភាព និងសុខសាន្តជូនប្រជាពលរដ្ឋនៅក្នុងមូលដ្ឋាន។
ជាមួយគ្នានេះ ឯកឧត្តម កែវ រតនៈ ក៏បានលើកឡើងអំពីឆន្ទៈក្នុងការដោះស្រាយបញ្ហាព្រំដែន ដោយសង្កត់ធ្ងន់លើការបន្តការពារបូរណភាពទឹកដី និងការចូលរួមរបស់កងកម្លាំងក្នុងការបំពេញតួនាទីតាមភារកិច្ច និងការណែនាំរបស់ថ្នាក់ដឹកនាំ។
កម្មវិធីជួបសំណេះសំណាលនេះ គឺជាឱកាសមួយសម្រាប់ពង្រឹងចំណងសាមគ្គីភាព មិត្តភាព និងកិច្ចសហការរវាងក្រសួងរ៉ែ និងថាមពល ជាមួយកងកម្លាំងប្រដាប់អាវុធ និងអាជ្ញាធរខេត្តពោធិ៍សាត់ ព្រមទាំងជាការបង្ហាញពីការយកចិត្តទុកដាក់ចំពោះកងកម្លាំងដែលកំពុងបំពេញភារកិច្ចនៅមូលដ្ឋាន។
ជាចុងបញ្ចប់កម្មវិធី ឯកឧត្តម កែវ រតនៈ បានប្រគល់ថវិកាជូនដល់កងកម្លាំងទាំងបីប្រភេទ ក្នុងមួយអង្គភាពទទួលបានថវិកាចំនួន៤លានរៀល និងកងកម្លាំងក្នុង១នាក់ ទទួលបានថវិកាចំនួន១០មុឺនរៀល អង្ករ១បេ ទឹកត្រី១យួរ ទឹកស៊ីអុីវ១យួរ មី១កេស៕
