កែប ៖ នៅព្រឹកថ្ងៃទី៦ខែកញ្ញា ឆ្នាំ២០១៧នេះ មន្ទីររ៉ែនិងថាមពល ខេត្តកែប បានធ្វើពិធីផ្សព្វផ្សាយសារាចរស្តីពីសុវត្ថិភាពសម្រាប់ការរៀបចំស្ថានីយប្រេងឥន្ធនៈ ស្ថានីយឧស្ម័នឥន្ធនៈនិងស្ថានីយរួមប្រេងនិងឧស្ម័នឥន្ធនៈ ក្រោមវត្តមានលោក លាង ឆាលី អនុរដ្ឋលេខាធិការក្រសួងរ៉ែនិងថាមពល លោកទេព យុទ្ធី អភិបាលរងខេត្តកែប លោកយស់ មុន្នី ប្រធានមន្ទីររ៉ែនិងថាមពលខេត្តកែប ព្រមទាំងមានការចូលរួមពីសំណាក់អាជ្ញាធរក្រុង ស្រុក និងមន្ត្រីជំនាញនានាផងដែរ។
ដោយផ្អែកលើសារាចរខាងលើ លោក លាង ឆាលី បានលើកឡើងថាការបង្កើតស្ថានីយប្រេងឬឧស្ម័នឥន្ធនៈ ការស្តុកទុក ការដឹកជញ្ជូន ការចែកចាយ និងការប្រើប្រាស់ឧស្ម័នឥន្ធនៈនេះ សម្រាប់បម្រើឲ្យសេចក្តីត្រូវការរបស់អ្នកប្រើប្រាស់ក្នុងរាជធានី និងតាមបណ្តាខេត្តនានា។ទន្ទឹមនឹងនេះ ឧបទ្ទវហេតុនៃគ្រោះអគ្គិភ័យដែលបណ្តាលមកពីការផ្ទុះនិងការឆាបឆេះឧស្ម័នឥន្ធនៈ ក៏បានកើតឡើងជាបន្តបន្ទាប់ដែលធ្វើឲ្យមានការខូចខាតទ្រព្យសម្បតិ្ត រងរបួសនិងបាត់បង់អាយុជីវិតថែមទៀតផង។អាស្រ័យហេតុនេះក្រសួងរ៉ែនិងថាមពលបានរៀបចំសារាចរស្តីពី សុវត្ថិភាពសម្រាប់រៀបចំស្ថានីយឧស្ម័នឥន្ធនៈ និងស្ថានីយរួមប្រេងនិងឧស្ម័នឥន្ធនៈនេះឡើង ក្នុងគោលបំណងកំណត់បទដ្ឋានបច្ចេកទេសសុវត្ថិភាពសម្រាប់ការរៀបចំស្ថានីយឧស្ម័នឥន្ធនៈនិងស្ថានីយរួមប្រេងនិងឧស្ម័នឥន្ធនៈផ្ទាល់ដី។
លើសពីនេះក្រសួងក៏បានធ្វើការណែនាំ និងតម្រូវឲ្យធ្វើស្ថានីយឧស្ម័នឥន្ធនៈ ត្រូវស្ថិតនៅក្នុងទីតាំងដែលមានលក្ខណៈធំទូលាយគ្រប់គ្រាន់ ដោយត្រូវអនុលោមតាមច្បាប់ផ្លូវថ្នល់ ដែលប្រកាសឲ្យប្រើដោយព្រះរាជ្យក្រមលេខ នស/រកម/០៥១៤/០០៨ចុះថ្ងៃទី០៤ខែឧសភា ឆ្នាំ២០១៤។ ហើយទីតាំងស្ថានីយឧស្ម័នឥន្ធនៈទាំងអស់ ត្រូវសង់របងជញ្ជាំងបាំងជិតដែលមានកម្ពស់អប្បបរមា១,៨ម៉ែត្រដែលធ្វើអំពីវត្ថុមិនឆេះ លើកលែងច្រកផ្លូវចេញ-ចូល សម្រាប់យានយន្តប៉ុណ្ណោះ។ចំពោះករណីព្រំដីស្ថានីយឧស្ម័នឥន្ធនៈដែលជាប់នឹងព្រំដីលំនៅដ្ឋានឬជាប់នឹងផ្លូវដែលមានទទឹងតូចជាង៥ម៉ែត្រ ម្ចាស់ស្ថានីយត្រូវសង់របងជញ្ជាំងបាំងជិតជាប់នឹងផ្លូវនោះ ធ្វើពីបេតុងអាមេអាចធន់នឹងការឆេះក្នុងរយៈពេលយូរ ដែលមានកម្ពស់អប្បបរមា៣ម៉ែត្រ។ទីតាំងស្ថានីយឧស្ម័នឥន្ធនៈ ត្រូវមានលក្ខណៈអំណោយផលល្អសម្រាប់រថយន្តសីុទែនដឹកជញ្ជូនឧស្ម័នឥន្ធនៈចេញ-ចូលស្របតាមបទប្បញ្ញតិ្តជាធរមាន ហើយទីតាំងស្ថានីយឧស្ម័នត្រូវធ្វើនៅជាន់ផ្ទាល់ដីតែប៉ុណ្ណោះ ហើយទីតាំងដែលស្ថិតឆ្ងាយពីស្ថានីយអគ្គិសនីឬអនុស្ដានីយអគ្គិសនី និងបណ្តាញអគ្ញិសនីដែលមានតង់ស្យុងខ្ពស់ ស្របតាមការកំណត់របស់បច្ចេកទេសអគ្គិសនីផងដែរ ៕
ណារិទ្ធ
