ខេត្តបន្ទាយមានជ័យ ៖នៅព្រឹកថ្ងៃទី៦ ខែកញ្ញា ឆ្នាំ២០១៧ នេះ ក្រុមគណៈកម្មការចម្រុះ ដឹកនាំដោយលោក ទូច មុនី អភិបាលរងក្រុងប៉ោយប៉ែត សហការជាមួយកម្លាំងសមត្ថកិច្ចបានចុះណែនាំ ឲ្យក្រុមអាជីវកររុះរើតូបជាកំហិតបើពុំដូច្នោះទេនិងចាត់វិធានការ ។សូមជំរាបដែរថា ៖ ការដែលអាជ្ញាធរក្រុងប៉ោយប៉ែត បញ្ជាឲ្យក្រុមអាជីវកររុះរើតូបទាំងនោះ បន្ទាប់ពីមានសេចក្តីជូនដំណឹងរបស់អាជ្ញាធរខេត្តបន្ទាយមានជ័យកាលពីប៉ុន្មានថ្ងៃមុនដោយឲ្យរុះរើតូបក្នុងតំបន់ច្រកទ្វារអន្តរជាតិប៉ោយប៉ែត បន្ទាប់មកក្រុមអាជីវករបានធ្វើការរុះរើ ប៉ុន្តែដោយសារតូបអ្នកមាន៤តូបជាប់និងខ្លោងទ្វារប្រាសាទកំពូល៣នៃច្រកទ្វារមិនព្រមរុះរើដូចពួកគាត់ៗ ក៏នាំគ្នាជញ្ជូនអីវ៉ាន់មកលក់វិញស្ទើរគ្រប់គ្នាតែម្តងទៅ ។
ជុំវិញបញ្ហារុះរើតូបខាងលើនេះដែរលោក ទូច មុន្នី អភិបាលរងក្រុងប៉ោយប៉ែតបានមានប្រសាសន៍ថា ៖ ដោយយោងតាមសេចក្ដីជូនដំណឹងរបស់រដ្ឋបាលខេត្តបន្ទាយមានជ័យ ចំពោះបញ្ហាតូបដែលលក់ដូរនៅទីតាំងនេះគឺទុករយៈពេលជាច្រើនថ្ងៃមកហើយដើម្បីឲ្យពួកគាត់រុះរើដោយខ្លូនឯងតែរហូតមកដល់ថ្ងៃទី៦ខែកញ្ញាឆ្នាំ២០១៧នេះពួកគាត់មិនបានរុះរើតាមការកំណត់របស់រដ្ឋបាលខេត្តនោះឡើយទើបក្រុមគណៈកម្មការចុះមកផ្ទាល់ឲ្យរុះរើតែម្តង ។
គួរបញ្ជាក់ដែរថា ៖ នៅចំណុចខាងលើនេះនាពេលកន្លងមកគឺនៅមុនរដ្ឋបាលខេត្តបន្ទាយមានជ័យចេញសេចក្ដីជូនដំណឹងនោះក្រុមអាជីវករបានដាក់តាំងលក់ទំនិញដែលមានដូចជា៖ខោ អាវ ស្រា បារី ។ល។ បានធ្វើឲ្យប៉ះពាល់ដល់សណ្ដាប់ធ្នាប់ សោភណ្ឌ័ភាព បរិស្ថានគ្មានអនាម័យ ពិសេស ការកកស្ទះចរាចរណ៍តែម្តង ទាំងនេះបានធ្វើឲ្យប៉ះពាល់ជាខ្លាំងដល់ភ្ញៀវជាតិនិងអន្តរជាតិដែលមកទេសចរណ៍នៅក្នុងទឹកដីកម្ពុជា ៕
