ភ្នំពេញ ៖ នាព្រឹកថ្ងៃទី២ ខែមិថុនា ឆ្នាំ២០១៧នេះ បក្សសង្គ្រោះជាតិ ដឹកនាំដោយលោក កឹម សុខា បានហែបក្សទ្រង់ទ្រាយធំ ជាថ្ងៃឃោសនាចុងក្រោយនៃយុទ្ធនាការឃោសនា ជ្រើសរើសក្រុមប្រឹក្សា ឃុំ សង្កាត់ អាណត្តិទី៤ ក្នុងរាជធានីភ្នំពេញ ។
បក្សសង្គ្រោះជាតិបានជូបជុំអ្នកគាំទ្រនៅត្រើយម្ខាងនៃទន្លេ ពេលព្រឹក ដោយមានថ្លែងសារនយោបាយ ហើយអ្នកគាំទ្រមានការប្រគំតន្ត្រី រហូតដល់រសៀលទើបចាប់ផ្តើមហែបក្សទៅតំបន់ផ្សេងៗ ក្នុងរាជធានីភ្នំពេញ ។
ក្បួនបិទបញ្ចប់យុទ្ធនាការឃោសនាបោះឆ្នោតនោះ គឺបានដង្ហែចេញពីវត្តចាស់ឆ្លងស្ពានជ្រោយចង្វារ ទៅផ្លូវលេខ៧០ ដល់អង់តែនទួលគោក បទតាមផ្លូវ គីម អ៊ីលស៊ុង បន្តដល់ស្តុបសន្ធរម៉ុក បត់ស្តាំទៅផ្លូវកម្ពុជាក្រោម ទៅដល់ស្ពានពេទ្យលោកសង្ឃ បត់ឆ្វេងតាមផ្លូវ២៧១ បន្តទៅច្រមុះជ្រូកក្បាលថ្នល់ បត់តាមផ្លូវព្រះមុនីវង្ស ហើយមកដល់ស្តុបសាដឺហ្គោលបត់ឆ្វេង ចូលតាមផ្លូវសាដឺហ្គោលបន្តតាមផ្លូវមុនីរ៉េតដល់ស្តុបផ្សារដើមគរ បត់ឆ្វេងតាមផ្លូវម៉ៅសេទុង រហូតបន្តស្តុបទួលទំពូង បង់ស្តាំចូលទៅរង្វង់មូលផ្សារដើមថ្កូវ បត់ឆ្វេងចូលផ្លូវ៤៨៨បឹងត្របែក ឡើងទៅផ្លូវព្រះមុនីវង្សវិញ រួចបត់ស្តាំទៅក្បាលថ្នល់ឆ្លងចូលទៅរំសាយលើផ្លូវលេខ៦០ម៉ែត្រ។
សូមជម្រាបថា យុទ្ធនាការឃោសនាបោះឆ្នោត ជ្រើសរើសក្រុមប្រឹក្សាឃុំ សង្កាត់ មានរយៈពេល ១៤ ថ្ងៃ គឺចាប់ពីថ្ងៃទី២០ ខែឧសភា ដល់ថ្ងៃទី២ ខែមិថុនា ឆ្នាំ២០១៧ ៕
