ខេត្តរតនគិរី ៖ រថយន្តបាឡែន១គ្រឿងផ្ទុកឈើប្រណីតពេញព្រៀប ហើយបើកបរក្នុងល្បឿនលឿនដូចហោះ បានរេចង្កូតធ្លាក់ប្រឡាយចិញ្ចើមផ្លូវជាតិរបើកទ្វារធ្លាយចេញសុទ្ធតែឈើ ប៉ុន្តែមិនបណ្តាលឲ្យរងគ្រោះដល់អាយុជីវិតមនុស្សនោះទេគ្រាន់តែរបួសបន្តិចបន្តួចប៉ុណ្ណោះ។ ហេតុការណ៍នេះបានកើតឡើងនៅវេលាម៉ោង១០ និង៣០នាទីព្រឹក ថ្ងៃទី១៧ ខែឧសភា ឆ្នាំ២០១៧ តាមបណ្តោយផ្លូវជាតិលេខ៧៨ ត្រង់ចំណុចភូមិអ៊ុន ឃុំលំជ័រ ស្រុកអូរយ៉ាដាវ។
ប្រភពពីប្រជាពលរដ្ឋនៅកន្លែងកើតហេតុបានឲ្យដឹងថា រថយន្តបាឡែន១គ្រឿងពណ៌ស អត់ស្លាកលេខ ជារបស់មេឈ្មួញរកស៊ីឈើដុះស្លែដែលគេមិនបញ្ចេញឈ្មោះម្នាក់នោះបើកបរក្នុងទិសដៅពីលិចទៅកើតក្នុងល្បឿនយ៉ាងលឿនមកដល់ត្រង់ចំណុចកើតហេតុខាងលើក៏វាក់នឹងរថយន្ត១គ្រឿងនៅពីមុខកំពុងបើកបរស្របទិសគ្នាបានជាន់ហ្វ្រាំង២-៣ដង ហើយរេចង្កូតធ្លាក់ផ្លូវតែម្តង។
ក្រោយកើតហេតុគេបានឃើញកម្លាំងកងរាជអាវុធហត្ថស្រុកអូរយ៉ាដាវដឹកនាំដោយលោក សុខ មីន មេបញ្ជាការកងរាជអាវុធហត្ថស្រុកអូរយ៉ាដាវ ចុះមករឹបអូសយករថយន្តដឹកឈើប្រណីតទៅស្នាក់ការ និងធ្វើកំណត់ហេតុប្រគល់ទៅឲ្យជំនាញរដ្ឋបាលព្រៃឈើបរកែវដើម្បីចាត់ការបន្តតាមនីតិវិធីច្បាប់ព្រៃឈើ។ បន្ទាប់ពីសកម្មភាពដឹកឈើត្រូវបានផ្អាកមួយរយៈដោយសារមានវត្តមានមេបញ្ជាការក្រុមបង្ក្រាបកងរាជអាវុធហត្ថផ្ទៃប្រទសនៅក្នុងខេត្តរតនគិរីនេះ។
ប៉ុន្តែក្នុងរយៈដើមសប្តាហ៍នេះគេសង្កេតឃើញបទល្មើសដឹកជញ្ជូនឈើប្រណីតខុសច្បាប់កម្រើកឡើងវិញយ៉ាងគគ្រឹកគគ្រេង ដោយមានប្រភេទរថយន្តសាំយ៉ុង កាមរីបាឡែន និងឡង់គ្រីស័រ ធុនដ្រា ជាដើម កំពុងតែសម្រុកដឹកឈើចេញពីបណ្តាស្រុកមួយចំនួនដូចជាចេញពីខេត្តស្ទឹងត្រែងឆ្លងកាត់ស្រុកកូនមុំ ស្រុកវើនសៃ ស្រុកតាវែង និងស្រុកអណ្តូងមាស ឆ្ពោះទៅប្រទេសវៀតណាមតាមច្រកទ្វារអន្តរជាតិអូយ៉ាដាវ និងច្រករបៀងផ្សេងៗដូចជាច្រករបៀងអូសារថី អូរពាមសាថី ក្នុងឃុំញ៉ាង ស្រុកអណ្តូងមាស។ ច្រករបៀងភូមភិះ និងច្រកភ្នំក្រហមក្នុងឃុំប៉ក់ញ៉ៃ ស្រុកអូរយាដាវ ដែលមានសមត្ថកិច្ចគ្រប់លំដាប់ថ្នាក់ឈរជើងប្រចាំការនៅទីនោះស្រាប់ចំអង្គុយរាប់ក្បាលរថយន្តដាក់ខែទៀតផង មិនដែលឈើញបង្ក្រាបឡើយលុះត្រាតែរថយន្តមានបញ្ហាខូច ធ្លាក់ផ្លូវ ឬក្រឡាប់ និងលោតឆ័ត្រទើបបង្ក្រាបយកស្នាដៃតែម្តង៕
