សមត្ថកិច្ចខេត្តព្រៃវែងចាប់ខ្លួនមេប៉ុស្តិ៍ឃុំព្នៅទី១បានភ្លាមៗ ក្រោយបាញ់ប្រពន្ធឱ្យស្លាប់ក្នុងថ្លុកឈាម

(ព្រៃវែង)៖ សមត្ថកិច្ចបានចាប់ខ្លួនជនសង្ស័យជាមេប៉ុស្តិ៍ឃុំព្នៅទី១ ដែលបានបាញ់ប្រពន្ធចំនួន៤គ្រាប់បណ្តាលឱ្យស្លាប់ ក្រោយមានទំនាស់ពាក្យសម្តីពេលចេញពីកន្លែងផឹកស៊ី។

មន្រ្តីមូលដ្ឋានបានឱ្យដឹងថា ប្តីនិងប្រពន្ធបានឈ្លោះប្រកែកគ្នាបន្តិចបន្តួចបែរជាធ្វើឱ្យប្តីមានតួនាទីជានាយប៉ុស្តិ៍រដ្ឋបាលផ្ទុះកំហឹងក៏ដកកាំភ្លើងខ្លីម៉ាក K54 បាញ់ប្រពន្ធចុង៤គ្រាប់។ តែផ្ទុះ២គ្រាប់ត្រូវចំក្បាល១គ្រាប់ និងក១គ្រាប់ បណ្តាលឱ្យស្ត្រីរូបនោះដួលស្លាប់តែម្តង។

ហេតុការណ៍នេះបានកើតឡើងនៅមុខវត្តផាត់សណ្តោង ឃុំព្នៅទី១ ស្រុកស៊ីធរកណ្តាល ខេត្តព្រៃវែង កាលពីយប់ថ្ងៃទី២៤ ខែមីនា ឆ្នាំ២០២២។

ជនសង្ស័យឈ្មោះ ម៉ៅ សុវណ្ណហុង អាយុ៥៣ឆ្នាំ ជានាយប៉ុស្តិ៍នគរបាលឃុំព្នៅទី១ នៅភូមិផាត់សណ្តោង ខេត្តព្រៃវែង។ ចំណែកស្រ្តីដែលស្លាប់ឈ្មោះ សុខ មួយ អាយុ៥១ឆ្នាំ នៅភូមិឃុំជាមួយគ្នា។ ក្រោយកើតហេតុបុរសដែលបាញ់ប្រពន្ធក៏ត្រូវសមត្ថកិច្ចចាប់ខ្លួនភ្លាមៗ។

បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋាននគរបាលស្រុកស៊ីធរកណ្តាល ដើម្បីបន្តនីតិវិធី៕