ប៉ៃលិន៖ គិតត្រឹមវេលាម៉ោង ៩:៣៤នាទីព្រឹក ថ្ងៃទី១៥ ខែកក្កដា ឆ្នាំ២០២៦ ស្ត្រីម្នាក់ជាអាជីវករលក់ដូរមាសនៅផ្សារណាត់ ខេត្តបាត់ដំបង បានចេញមុខបំភ្លឺ និងបដិសេធទាំងស្រុងចំពោះព័ត៌មានដែលបានចុះផ្សាយថា គាត់ប្រកបអាជីវកម្មទិញ-លក់មាសតាមប្រព័ន្ធអនឡាញ ដោយអះអាងថា គាត់មានហាងលក់មាសពិតប្រាកដ និងប្រកបអាជីវកម្មស្របច្បាប់ជាយូរមកហើយ។
ស្ត្រីឈ្មោះ ទី ម៉ីយ៉ាវ បានឱ្យដឹងថា ដំបូងឡើយ គាត់មិនធ្លាប់ស្គាល់លោក នាក់ ង៉យ នោះទេ។ ក្រោយមក តាមរយៈអ្នកលក់មាសនៅខេត្តប៉ៃលិន លោក នាក់ ង៉យ បានទាក់ទងមកគាត់តាមហ្វេសប៊ុក ដើម្បីទិញមាស ហើយការជួញដូរលើកដំបូងមានចំនួន ១០ដំឡឹង។ ដោយសារតម្លៃមាសប្រែប្រួលលឿន គាត់បានតម្រូវឱ្យអតិថិជនកក់ប្រាក់ចំនួន ១,០០០ដុល្លារ មុនពេលប្រគល់មាស។
បន្ទាប់មក ភាគីទាំងពីរបានជួបគ្នាផ្ទាល់ ដោយអតិថិជនបានមកទទួលមាស និងទូទាត់ប្រាក់គ្រប់ចំនួនតាមការព្រមព្រៀង។ ក្រោយមក លោក នាក់ ង៉យ បានបន្តទិញមាសជាបន្តបន្ទាប់ ដើម្បីធ្វើការជួញដូរតាមហាងឆេងមាស ហើយនៅពេលតម្លៃមាសកើនឡើង គាត់ក៏ទទួលបានប្រាក់ចំណេញ ដែលត្រូវបានទូទាត់ជូនត្រឹមត្រូវ។
អ្នកស្រីបញ្ជាក់ថា ហាងរបស់គាត់មានទីតាំងពិតប្រាកដនៅផ្សារណាត់ ខេត្តបាត់ដំបង ក្រោមយីហោ «ជាងស៊្រានដេញមាស (ស៊្រាងប៉ូលីន)» និងជាមុខរបរបន្តពីក្រុមគ្រួសារតាំងពីដើមមក មិនមែនជាការបោកប្រាស់ ឬរកស៊ីតាមអនឡាញដូចការចោទប្រកាន់ឡើយ។
តាមការបំភ្លឺដដែល បានឱ្យដឹងថា ក្រោយមក លោក នាក់ ង៉យ បានបញ្ជាទិញមាសក្នុងបរិមាណកាន់តែច្រើន រហូតដល់ ១០០ដំឡឹង ២០០ដំឡឹង និង ៣០០ដំឡឹង។ ដោយសារតម្លៃមាសធ្លាក់ចុះខ្លាំង ធ្វើឱ្យការជួញដូរខាតបង់យ៉ាងច្រើន។ អ្នកស្រីអះអាងថា បានស្នើឱ្យអតិថិជនបន្ថែមប្រាក់កក់ ដើម្បីរក្សាទីតាំងជួញដូរ ប៉ុន្តែភាគីម្ខាងទៀតមិនបានបំពេញតាមការស្នើសុំ។
អ្នកស្រីបន្តថា ក្រោយពីការទាក់ទងទារបំណុលមិនបានលទ្ធផល គាត់បានដាក់ពាក្យបណ្ដឹងទៅសាលាដំបូងខេត្តប៉ៃលិន កាលពីថ្ងៃទី០៨ ខែឧសភា ឆ្នាំ២០២៦ ដើម្បីស្នើឱ្យមានការដោះស្រាយតាមនីតិវិធីច្បាប់។ អ្នកស្រីបញ្ជាក់ថា គោលបំណងគឺចង់ទទួលបានប្រាក់ដែលជំពាក់ត្រឡប់មកវិញប៉ុណ្ណោះ។
ជុំវិញការចោទប្រកាន់ថា គាត់ប្រកបអាជីវកម្មទិញ-លក់មាសតាមអនឡាញ អ្នកស្រីបានបដិសេធយ៉ាងដាច់ខាត និងអះអាងថា ការជួញដូររបស់គាត់ធ្វើឡើងតាមហាងលក់មាសដែលមានទីតាំងពិតប្រាកដ និងមានអាជីវកម្មច្បាស់លាស់នៅខេត្តបាត់ដំបង។
ទាក់ទងនឹងករណីនេះ លោក នាក់ ង៉យ ដែលអះអាងថា ខ្លួនជាជនរងគ្រោះ ក៏បានបញ្ជាក់ថា ការជួញដូរហាងឆេងមាសដែលលោកបានធ្វើ មិនមានការប្រគល់មាសជាក់ស្តែងនោះទេ ប៉ុន្តែជាការជួញដូរតាមប្រព័ន្ធអនឡាញ។ លោកបានបញ្ជាក់ថា នឹងចូលបំភ្លឺតាមនីតិវិធីច្បាប់នាពេលខាងមុខ ដើម្បីស្វែងរកដំណោះស្រាយលើវិវាទនេះ។
សម្គាល់៖ ករណីនេះកំពុងស្ថិតក្នុងដំណើរការតាមផ្លូវច្បាប់ ហើយការបំភ្លឺខាងលើជាការអះអាងរបស់ភាគីពាក់ព័ន្ធនីមួយៗ។ លទ្ធផលចុងក្រោយនឹងអាស្រ័យលើការសម្រេចរបស់ស្ថាប័នតុលាការមានសមត្ថកិច្ច៕
