គណបក្សទាំង៦ដែលបានចងសម្ព័ន្ធភាពនឹងគ្នារួចរាល់នោះរួមមាន​៖ គណបក្ស​កែទម្រង់កម្ពុជា គណបក្សភ្លើងទៀន គណបក្សប្រជាធិបតេយ្យមូលដ្ឋាន គណបក្សកម្ពុជានិយម គណបក្សកម្លាំងប្រជាធិបតេយ្យ និងគណបក្សបំណងពលរដ្ឋ។ គណបក្សដែលបានចងសម្ព័ន្ធភាពជាមួយនាពេលនេះ ភាគច្រើន គឺជាគណបក្សដែលកើតចេញពីអតីតមន្ត្រីរបស់គណបក្សសង្គ្រោះជាតិ។

លោកអ៊ូ​ ច័ន្ទរ័ត្ន សហស្ថាបនិកគណបក្សកែទម្រង់កម្ពុជាបានបញ្ជាក់ប្រាប់វិទ្យុបារាំងអន្តរជាតិនៅព្រឹកថ្ងៃទី១៤ កុម្ភៈថា គណបក្សទាំង៦ខាងដើមមានឆន្ទៈរួមក្នុងការចងសម្ព័ន្ធភាពនឹងគ្នា។ ចងសម្ព័ន្ធភាពនេះ លោកអ៊ូ ច័ន្ទរ័ត្ននិយាយថា បក្សបានឯកភាពគ្នាថានឹងចេញសេចក្តីថ្លែងការណ៍រួមគ្នាទៅលើបញ្ហាដែលបក្សគិតថាជាបញ្ហារួម។

សហស្ថាបនិកដែលផ្តួចផ្តើមគំនិតបង្រួបបង្រួមបក្សរូបនេះបន្តថា គម្រោងបង្កើតគណបក្សធំមួយដើម្បីប្រមូលកម្លាំងគ្នាប្រកួតប្រជែងជាមួយគណបក្សកំពុងកាន់អំណាច( គណបក្សប្រជាជនកម្ពុជា) គឺមិនអាចកើតទាន់ការបោះឆ្នោតឃុំសង្កាត់ឆ្នាំ២០២២នេះបានទេ។ ប៉ុន្តែលោកថា បក្សនឹងមានជំនួបជាបន្តបន្ទាប់ទៀត ដើម្បីជជែកអំពីការរៀបចំគោលជំហរ និងការជ្រកក្រោមស្លាកបក្សតែមួយសម្រាប់ការបោះឆ្នោតថ្នាក់ជាតិឆ្នាំ២០២៣។ លោកអ៊ូ ច័ន្ទរ័ត្នថា ការបង្រួបបង្រួមគ្នានេះ នៅតែជារឿងចាំបាច់សម្រាប់កម្លាំងនិងឥទ្ធិពលលើ​ឆាកនយោបាយកម្ពុជា​។

ដោយឡែក លោក អ៊ិត សារម្យ ប្រធានគណបក្សបំណងពលរដ្ឋ​ក៏បានឱ្យដឹងដែរថា ការចាប់ដៃគ្នានេះ ដោយសារតែគណបក្សទាំង៦មានគោលនយោបាយស្ទើរតែដូចគ្នា និងមានទិសដៅដើម្បីជាតិមាតុភូមិតែមួយ។ លោកបន្តថា ការបង្កើតគណបក្សធំមួយនាពេលអនាគត គឺត្រូវរង់ចាំមើលអំពើរបៀបធ្វើការជាមួយគ្នាសិន ខណៈបច្ចុប្បន្នគណបក្សទាំង៦នៅមានចំណុចខ្វះចន្លោះដែលមិនទាន់យល់ចិត្តគ្នាមួយចំនួន។ ចំណុចដែលខ្វះចន្លោះនោះ ប្រធានគណបក្សបំណងពលរដ្ឋរូបនេះ​បញ្ជាក់ថា គឺការលុបបំបាត់ជម្លោះផ្ទៃក្នុងរបស់បក្ស និងការបែងចែកតួនាទី អំណាច ដែលបណ្តាគណបក្សមួយចំនួនធ្លាប់កើតមានឡើង។ 

បើតាមលោក អ៊ិន សារម្យ ការចាប់ដៃគ្នានាពេលនេះ នៅមិនទាន់អាចបង្ហាញបានថា គណបក្សទាំង៦អាចជ្រកក្រោមស្លាកបក្សតែមួយ និងដើរលើស្ពានតែមួយបាននៅឡើយទេ ពោលគឺត្រូវរកចាំមើលរបៀបធ្វើការសិន។

ទាក់ទិននឹងសម្ព័ន្ធភាពបក្សនេះដែរ លោក ឡឹក សុធារ អ្នកនាំពាក្យគណបក្សប្រជាធិបតេយ្យមូលដ្ឋានបានគូសបញ្ជាក់ថា សម្ព័ន្ធភាព​របស់បក្ស​មិន​ទាន់​សូវ​រលូនពេកទេ ក៏ព្រោះថា​គណបក្ស​នីមួយៗ កំពុងរវល់ត្រៀម​ខ្លួន​សម្រាប់ការ​បោះ​ឆ្នោត​ឃុំ​សង្កាត់នាពេល​ខាង​មុខ។ ប៉ុន្តែ លោក​ថា ការ​ធ្វើ​ការ​ជាមួយ​គ្នា​របស់​គណបក្ស​ទាំង​៦កន្លង​មក​គឺ ជា​ជំហាន​មួយ​បញ្ជាក់​ថា គណបក្ស​នេះ​អាច​ធ្វើ​ការ​រួម​គ្នា​បាន។

សូមជម្រាបថា គិតត្រឹមបំណាច់ខែមករា ឆ្នាំ២០២២នេះ កម្ពុជាមានគណបក្សនយោបាយចំនួន៤៥ហើយដែលត្រូវបានក្រសួងមហាផ្ទៃសម្រេចចុះបញ្ជីផ្លូវការទៅក្នុងបញ្ជីគណបក្សនយោបាយនៅក្រសួងមហាផ្ទៃ។  ខណៈគណបក្សសង្គ្រោះជាតិដែលជាគូប្រជែងដ៏ធំរបស់គណបក្សកំពុងកាន់អំណាច នៅមិនទាន់មានពន្លឺណាមួយថា នឹងអាចវិលចូលមកប្រឡូកលើឆាកនយោបាយដើម្បីបង្ហាញសាច់ដុំទៅកាន់គណបក្សប្រជាជនកម្ពុជាបាននៅឡើយនោះទេ៕