ខេត្តរតនគីរី ៖ ប្រភពពីឈ្មួញរកស៊ីជួញដូរឈើម្នាក់បានប្រាប់អ្នកយកព័ត៌មាន នៅព្រឹកថ្ងៃទី២៦ ខែកុម្ភ: ឆ្នាំ២០១៧ថា មានឈើស្ថិតនៅចំការចាន់ទី ក្នុងភូមិសោមគល់ ឃុំសោមធំ ស្រុកអូរយ៉ាដាវ ខេត្តរតនគីរី ឈើប្រណិតជាច្រើនដុំមានមុខ៣០និង៤០ឃ្លុំប្រវែង១,២ដល់២ម៉ែត្រពលរដ្ឋអះអាងថារបស់យាយរ៉ែនគ្មានសមត្ថកិច្ចបង្ក្រាប ។ ក្រោយទទួលព័ត៌មាន ក្រុមអ្នកសារព័ត៌មានបានចុះទៅដល់ទីតាំងស្តុកឈើផ្តិតយករូបភាព រួចស្វែងជួបយាយរ៉ែនដើម្បីបញ្ជាក់ការពិត គ្រាដែលជួបយាយរ៉ែនបានបដិសេធន៍ថា គាត់ឈប់រកស៊ីជួញដូរឈើតាំងពីមុនចូលឆ្នាំចិនមកម្លេះ។
ទោះជាមានការបដិសេធន៍ពីយាយរ៉ែនថា មិនមែនជាឈើរបស់គាត់ ប៉ុន្តែប្រភពបានបញ្ជាក់បន្ថែមថា ឈើនៅម្តុំសោមគល់ ជាប់ផ្លូវជាតិមាន២ ម្ចាស់គឺឈ្មោះយាយរ៉ែន និងឈ្មោះអាត នៅទល់មុខនោះ ។ តែឈើដែលដាក់ក្រោមដើមចាន់ទី និងក្រោយផ្ទះពលរដ្ឋ ដែលឃើញនោះ គឺជាឈើរបស់យាយរ៉ែនពិតប្រាកដ។
ភ្លាមអ្នកយកព័ត៌មានបានទំនាក់ទំនងទៅសមត្ថកិច្ច តែសមត្ថកិច្ចខ្លះក៏បញ្ជាក់ថា ជាឈើយាយរ៉ែនដែរហើយកុំបង្ករឿង ទៅជួបគាត់រកបាយទឹកទៅ ។
ក្រុមការងារបានបន្តទូរស័ព្ទទៅលោក ទន់ វីរ:ភាព នាយផ្នែករដ្ឋបាលព្រៃឈើ លោកឆ្លើយថា គាត់នៅឆ្ងាយ ដូច្នេះស្នើកម្លាំងអាវុធហត្ថទៅ ។
ពាក់ព័ន្ធឈើខាងលើ ប្រភពជាឈ្មួញរកស៊ីឈើដូចគ្នា បានបញ្ជាក់ថា លោក ទន់ វីរ:ភាព នាយផ្នែករដ្ឋបាលព្រៃឈើ មិនទៅណាឆ្ងាយពីកន្លែងគំនរឈើយាយរ៉ែនទេ ព្រោះយាយរ៉ែនមានរបស់ចងជើងជាប់ ៕
