ខេត្តប៉ៃលិន ៖ បន្ទាប់ពីមន្ត្រីបរិស្ថានខេត្ត បានចុះត្រួតពិនិត្យឃើញ ប្រជាពលរដ្ឋ និងមន្ត្រីនគរបាលការពារព្រំដែនមួយចំនួន បានឃុបឃិតគ្នាលួចកាប់បំផ្លាញព្រៃឈើតំបន់អភិរក្ស ដើម្បីយកដីធ្វើជាកម្មសិទ្ធិរបស់ខ្លួន ខណៈកំពុងតែធ្វើសកម្មភាពកាប់បំផ្លាញព្រៃអស់ជា ច្រើនហិកតា ក៏ធ្វើការចាប់ឃាត់ខ្លួនបុរសម្នាក់តែម្តង ។ ចំណែកជនសង្ស័យ ដែលជាប់ពាក់ព័ន្ធ បាននាំគ្នាដាក់មេប្រូច រត់គេចខ្លួនចូលក្នុងព្រៃបាត់ស្រមោល ។
ហេតុការណ៍ចុះបង្ក្រាប ចាប់ឃាត់ខ្លួនជនសង្ស័យម្នាក់ ដែលកាប់បំផ្លាញព្រៃឈើតំបន់អភិរក្សនេះ បានធ្វើឡើងកាលពីរសៀលថ្ងៃទី២៣ ខែកុម្ភៈ ស្ថិតនៅក្បែរបន្ទាយការពារ វរៈព្រំដែនលេខ៨២១ ស្ថិតនៅភូមិបហ៊ុយត្បូង សង្កាត់បយ៉ាខា ក្រុងប៉ៃលិន ហើយបានរៀ បចំកសាងសំណុំរឿង បញ្ជូនទៅតុលាការកាលពីរសៀលថ្ងៃទី២៤ ខែកុម្ភៈ ឆ្នាំ២០១៧ ។
ប្រភពព័ត៌មានពីលោក គឹម សុខា ប្រធានមន្ទីរបរិស្ថានខេត្តប៉ៃលិន បានឱ្យដឹងថា ជនសង្ស័យដែលចាប់ឃាត់ខ្លួន មានឈ្មោះ វ៉ៅ លឿន ភេទប្រុស អាយុ៤៩ឆ្នាំ ជាកិសករ ប្រពន្ធ ឈ្មោះ ឆាន់ ថុល អាយុ៤៨ឆ្នាំ រស់នៅភូមិបហ៊ុយជើង សង្កាត់បយ៉ាខា ក្រុងប៉ៃលិន ។ លោកបានបន្តទៀតថា មុននឹងធ្វើការចាប់ឃាត់ខ្លួន ជនសង្ស័យខាងលើ មានប្រជាពល រដ្ឋជាច្រើន បានរាយការណ៍ប្រាប់យ៉ាងច្បាស់ថា រូបគេធ្លាប់លួចកាប់ព្រៃតំបន់ការពារបានចំនួនជាង២ហិកតា ក្រោយមកខាងបរិស្ថានបានចុះធ្វើការហាមឃាត់ និងធ្វើកិច្ចសន្យាមិនឱ្យបន្តកាប់បន្តម្តងរួចទៅហើយ ។
ប៉ុន្តែកាលពីប៉ុន្មានថ្ងៃក្រោយមកជនសង្ស័យខាងលើបា នធ្វើការកាប់ព្រៃតំបន់អភិរក្សនោះថែមទៀតសរុបទៅបានជាង៣ហិកតា ដោយអះអាងថា មាននគរបាលម្នាក់ ឈ្មោះ រ៉ា និងនគរបាលវរៈព្រំដែនលេខ៨២១មួយចំនួនទៀត បាននាំគ្នាកាប់នៅក្បែរៗ នោះដែរ ទើបជនសង្ស័យហ៊ានកាប់បន្តទៀត ក៏ត្រូវខាងលោកចុះចាប់ឃាត់ខ្លួនតែម្តង ។ លោកនឹងបញ្ជូនជនសង្ស័យជាប្តីទៅតុលាការ ចំណែកប្រពន្ធដោះលែងឱ្យត្រឡប់ទៅផ្ទះវិញ ហើយបន្តតាមជនសង្ស័យដទៃទៀត យកមកផ្តន្ទាទោសតាមច្បាប់ ។
ចំណែក ជនសង្ស័យ ឈ្មោះ វ៉ៅ លឿន អាយុ៤៩ឆ្នាំ បានសារភាពថា ខ្លួនពិតជាបាន នាំប្រពន្ធទៅកាប់ព្រៃឈើតំបន់អភិរក្សក្នុងភូមិខាងលើមែន តែបានសុំអនុញ្ញាតពីមេបញ្ជា ការនគរបាលវរៈព្រំដែនរួចរាល់អស់ហើយ ។ ម្យ៉ាងវិញទៀត ខាងនគរបាលក៏បាននាំគ្នាកា ប់ព្រៃឈើតំបន់ការពារនោះអស់ជាច្រើនហិកតាផងដែរ តែអត់មានខាងណាចុះទៅធ្វើការ ហាមឃាត់នោះឡើយ ។ លោកបន្តទៀតថា កាលពីមុន ខាងលោកបានឈប់ផ្អាកម្តងហើ យដែរ ប៉ុន្តែពេលឃើញគេកាប់ក្បែរៗដីរបស់ខ្លួន ដែលបានកាប់ពីមុន ទើបនាំប្តីប្រពន្ធកាប់បន្ត ហើយក៏ត្រូវខាងមន្ត្រីបរិស្ថានចាប់ឃាត់ខ្លួនតែម្តង ។
លោកក៏សុំឱ្យខាងមន្ទីរបរិស្ថានខេ ត្តធ្វើការចាប់ឃាត់ខ្លួនក្រុមនគរបាលវរព្រំដែន ដែលល្មើសនឹងច្បាប់ផងដែរ កុំឱ្យចាប់តែរូប គាត់ម្នាក់នោះឡើយ ។
ពាក់ព័ន្ធនឹងបញ្ហានេះ លោក អ៊ុំ ណូន មេបញ្ជាការវរៈព្រំដែនលេខ៨២១ បានឱ្យដឹង តាមទូរស័ព្ទកាលពីរសៀលថ្ងៃទី២៤ កុម្ភៈនេះ ថា ខាងលោកអត់មានជាប់ពាក់ព័ន្ធនឹងការ កាប់បំផ្លាញព្រៃឈើតំបន់អភិរក្ស ដូចការអះអាងរបស់ជនសង្ស័យខាងលើនោះឡើយ ៕ ដោយ ៖ នីយ៉ា
