លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ(រូបថតឯកសារ)លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយកាលពីថ្ងៃទី២៦ ខែមករា ឆ្នាំ២០២២ បានធ្វើលិខិតទៅលោកឧត្តមសេនីយ៍ឯក ច័ន្ទ ពន្លឹក សាកលវិទ្យាធិការរង សាកលវិទ្យាល័យការពារជាតិ សុំធ្វើការបំភ្លឺករណីលើកឡើងពីភាពមិនប្រក្រតីមួយវំនួនពាក់ព័ន្ធនឹងសកម្មភាពបំពេញតួនាទីភារកិច្ច ដោយយោងពាក្យបណ្តឹងដែលអង្គភាពប្រឆាំងអំពើពុករលួយទទួលបានកាលពីថ្ងៃទី១៨ ខែមករា ឆ្នាំ២០២២។ប្រធានអ.ប.ព.បានជម្រាបទៅឧត្តមសេនីយ៍ឯក ច័ន្ទ ពន្លឹក ថា អង្គភាពប្រឆាំងអំពើពុករលួយ បានទទួល និងពិនិត្យលើពាក្យប្តឹងដែលបានលើកឡើងពីភាពមិនប្រក្រតីមួយចំនួន ពាក់ព័ន្ធនឹងសកម្មភាពបំពេញតួនាទីភារកិច្ច ដូចខាងក្រោម៖-តម្រូវឲ្យបុគ្គលិកតាមការិយាល័យ និងមហាវិទ្យាល័យ បង់ប្រាក់ប្រចាំសប្តាហ៍ និងប្រចាំខែ ចាប់ពី ១លានរៀល ដល់ ២លានរៀល។ នាយទាហានដែលបញ្ចប់ការសិក្សា ចង់បម្រើការងារនៅសាកលវិទ្យាល័យការពារជាតិ ត្រូវបង់ប្រាក់ចាប់ពី ៣.០០០ដុល្លារ ដល់ ៤.០០០ដុល្លារ ក្នុង ០១ខែៗ។
-បង្ខំឲ្យនិស្សិតបង់ប្រាក់ ០១វគ្គ ចំនួន ២លានរៀល។
-តម្រូវឲ្យអ្នកព្យួរឈ្មោះ បង់ប្រាក់ ០១ឆ្នាំ ៥០០ដុល្លារ។
-តម្រូវឲ្យអ្នកសុំចូលរៀនបន្ត បង់ប្រាក់ចាប់ពី ៣០០ដុល្លារ ដល់ ៥០០ដុល្លារ។
-តម្រូវឲ្យអ្នករៀនចប់ហើយ ចង់ផ្ទេរទៅអង្គភាពវិញ បង់ប្រាក់ចាប់ពី ២០០ដុល្លារ ដល់ ៣០០ដុល្លារ។
-តម្រូវឲ្យអ្នកចង់បានតំណែងជាសាកលវិទ្យាធិការរង បង់ប្រាក់ចាប់ពី ១០.០០០ដុល្លារ ដល់ ១៥.០០០ ដុល្លារ។
-តម្រូវឲ្យអ្នកចង់បានតំណែងជានាយមុខវិជ្ជា បង់ប្រាក់ចាប់ពី ៥.០០០ដុល្លារ ដល់ ៨.០០០ដុល្លារ។
-យកប្រាក់ពីអ្នកឡើងស័ក្តិ ចាប់ពី ៣០០ដុល្លារ ដល់ ៥០០ដុល្លារ។
-ករណីយោធាចារ្យ បង្រៀនមួយម៉ោងទទួល ៥.០០០រៀល សរុប ១០៧នាក់ ក្នុងមួយត្រីមាស សរុប ប្រាក់ជាង ៤០០លានរៀល គុណនឹងបួនត្រីមាស សរុបជាង ១.៦០០លានរៀល ប្រាក់នេះក្រសួងផ្តល់ ឲ្យការឡើងថ្នាក់របស់យោធាចារ្យ ប៉ុន្តែឪពុក និងកូនទាំងបីរបស់ឯកឧត្តមបានកិបកងបាត់តាំងពីខែមេសា ឆ្នាំ២០២១ រហូតមកដល់បច្ចុប្បន្ន។
-កិបកេងប្រាក់អន្តរាគមន៍របស់ក្រសួង ក្នុង ០១ខែ ៣០លានរៀល បាត់ឈឹងរយៈពេល ៣ឆ្នាំមកហើយ និងប្រាក់ហ្វឹកហ្វឺន ០១ខែ ១០០លានរៀល ដោយមហាវិទ្យាល័យទាំង០៥ និង០៣ មជ្ឈមណ្ឌល មិនបានទទួល ហើយត្រូវចំណាយខ្លួនឯង។
-ករណីនិស្សិត ចាប់ពីមានជំងឺកូវីដផ្ទុះឡើង នៅថ្ងៃទី២០ ខែកុម្ភៈ ឆ្នាំ ២០២១ គឺសាកលវិទ្យាល័យការពារជាតិ មិនឲ្យនិស្សិតចូលរៀនផ្ទាល់ ដោយបង្រៀនតាមអនឡាញ ចាប់ពីខែមីនា ឆ្នាំ២០២១និស្សិតជាង ៨០០នាក់ មិនបើកអង្ករឲ្យទេ ដោយក្នុងម្នាក់ទទួលបានចំនួន ២២.៥គីឡូក្រាម និងប្រាក់ហូប ចំនួន ១២.០០០រៀល រហូតដល់ខែសីហា ឆ្នាំ២០២១ បាត់សូន្យតែម្តង។
-និស្សិតខ្លះចូលរៀនបាន ០៣ឆ្នាំ ទទួលបានសញ្ញាបត្រ០៣ ទាំងបរិញ្ញាបត្រ និងបរិញ្ញាបត្រជាន់ខ្ពស់ មិនមករៀនក៏ទទួលបានសញ្ញាបត្រដែរ ឲ្យតែបង់ប្រាក់ពី ៣.០០០ដុល្លារ ដល់ ៥.០០០ដុល្លារ ជាការស្រេច។
-ឃុបឃិតគ្នាលក់រថយន្តរួមក្នុងសាកលវិទ្យាល័យការពារជាតិ ចំនួន ០៤គ្រឿង និងសម្ភារៈចាស់ៗក្នុង ឃ្លាំងមួយចំនួនធំមកទុកជាប្រយោជន៍ផ្ទាល់ខ្លួន។លោកទេសរដ្ឋមន្ត្រី ឱម យ៉ិនទៀង បានឲ្យលោកឧត្តមសេនីយ៍ឯក ច័ន្ទ ពន្លឹក សាកលវិទ្យាធិការរង សាកលវិទ្យាល័យការពារជាតិ បំភ្លឺករណីនេះ និងផ្ដល់ឯកសារពាក់ព័ន្ធខាងលើ មកអង្គភាពប្រឆាំងអំពើពុករលួយឲ្យបានទាន់ពេល ហើយការបំភ្លឺនេះ គឺជាមូលដ្ឋានសម្រាប់អអ្គភាពប្រឆាំងអំពើពុករលួយពិចារណាថាត្រូវសម្រេចបញ្ចប់នីតិវិធី ឬត្រូវបន្តលើពាក្យប្ដឹងនេះ។
លោកឧត្តមសេនីយ៍ឯក ច័ន្ទ ពន្លឹក សាកលវិទ្យាធិការរង សាកលវិទ្យាល័យការពារជាតិ(រូបថតឯកសារ)
ទាក់ទងករណីនេះ លោកឧត្តមសេនីយ៍ឯក ច័ន្ទ ពន្លឹក សាកលវិទ្យាធិការរង សាកលវិទ្យាល័យការពារជាតិ បានមានប្រសាសន៍ប្រាប់រស្មីកម្ពុជានៅរសៀលថ្ងៃទី២៩ខែមករានេះថាចំពោះលិខិតរបស់អង្គភាពប្រឆាំងអំពើពុករលួយដែលឲ្យលោកបំភ្លឺ គឺលោកបានទទួលរួចហើយកាលពីល្ងាចថ្ងៃទី២៧ ខែមករា ឆ្នាំ២០២២។ លោកកំពុងតែធ្វើការបំភ្លឺជូនអង្គភាពប្រឆាំងអំពើពុរលួយដែលគ្រោងនឹងយកទៅដាក់នៅដើមសប្តាហ៍ក្រោយនេះ។
លោកឧត្តមសេនីយ៍ឯក ច័ន្ទ ពន្លឹក បានបញ្ជាក់ថា “តួនាទីខ្ញុំជាសាកលវិទ្យាធិការរងទេ អីចឹងសិទ្ធិសម្រេចទាំងអស់នឹងខ្ញុំមានសិទ្ធិឯណាទៅដល់រឿងធំៗអស់នឹងហើយការចោទប្រកាន់នឹងក៏វាមិនត្រឹមត្រូវទៅទៀត ។បើនិយាយពីសិទ្ធិនឹងតួនាទីខ្ញុំដូចជាមិនដល់នឹងទេ ហើយការសម្រេចអស់នឹងកម្រិតខ្ញុំអត់មាន។ បើនិយាយពីសិទ្ធិអំណាចនឹងតួនាទីខ្ញុំ។ ការចោទប្រកាន់នឹងវាដូចធ្ងន់ធ្ងរពេក វាមិនមែនរឿងខ្ញុំផងនឹង។ ហើយការចោទប្រកាន់នឹងវាអយុត្តិធម៌សម្រាប់អង្គភាព”៕ សរន
