ខេត្តតាកែវ ៖ លោក ឆាយ សាវុធ អធិការក្រុងដូនកែវ សហការជាមួយព្រះរាជអាជ្ញារង ឃុន ភឿន ចុះចាប់ក្រុមក្មេងចែក ចាយគ្រឿងញៀនបានចំនួន ៤នាក់ នៅភូមិចុងថ្នល់ ឃុំរកាក្នុង សង្កាត់បារាយណ៍ ក្រុងដូនកែវ ខេត្តតាកែវ កាលពីវេលាម៉ោង ១ និង២០នាទី ថ្ងៃទី ២៤ ខែកុម្ភៈ ឆ្នាំ២០១៧ ។
តាមប្រភពពីសមត្ថកិច្ចបានឱ្យដឹងថា មុនពេលកើតហេតុ សមត្ថកិច្ចនគរបាលក្រុង បានទទួលសេចក្តីរាយការណ៍ពីប្រជាពលរដ្ឋល្អក្នុងមូលដ្ឋានបានប្រាប់ថា នៅក្នុងមូលដ្ឋានខាងលើមានករណីជូញដូរ និងប្រើប្រាស់ថ្នាំញៀនទើបកម្លាំងសមត្ថកិច្ចចុះស្រាវជ្រាវស្គាល់មុខសញ្ញា ក៏ចេញប្រតិបត្តិការចុះស្រាវជ្រាវស្គាល់មុខសញ្ញា ក៏ចេញប្រតិបត្តិការចុះបង្ក្រាបចាប់ឃាត់ខ្លួនបានក្រុមជនសង្ស័យទាំង ៤នាក់នោះតែម្តង ។
ប្រភបដដែលបានបន្តទៀតថា ក្នុងប្រតិបត្តិការនេះ កម្លាំងសមត្ថកិច្ចបានធ្វើការឃាត់ខ្លួនជនសង្ស័យរួមមាន ៖ទី១-ឈ្មោះ រស់ ដុល្លារ ភេទប្រុស អាយុ ២៥ឆ្នាំ រស់នៅភូមិចុងថ្នល់ ឃុំរកាក្នុង សង្កាត់បារាយណ៍ ក្រុងដូនកែវ ជាមុខសញ្ញាជួញដូរ និងប្រើប្រាស់, ទី២-ឈ្មោះ ប៊ុត វណ្ណឆៃ ភេទប្រុស អាយុ ២៣ឆ្នាំ រស់នៅភូមិព្រៃធាតុ ឃុំលាយបូរ ស្រុកត្រាំកក់ ជាមុខសញ្ញាប្រើប្រាស់, ទី៣-ឈ្មោះ ហង្សា វាសនា ភេទប្រុស អាយុ ១៩ឆ្នាំ រស់នៅ ភូមិព្រៃធាតុ ឃុំលាយបូរ ស្រុកត្រាំកក់ ជាមុខសញ្ញាប្រើប្រាស់, និងទី៤-ឈ្មោះ រ៉ាត់ វុទ្ធី ភេទប្រុស អាយុ ២៣ឆ្នាំ រស់នៅភូមិមហាសេនា ឃុំតាភេម ស្រុកត្រាំកក់ ជាមុខសញ្ញាជួញដូរ ដោយដកហូតបានវត្ថុតាងថ្នាំញៀនចំនួន ៥កញ្ចប់តូច សារធាតុញៀនប្រភេទម៉ាទឹកកកចំនួន ១កញ្ចប់ធំ និង២កញ្ចប់តូច ម៉ូតូ ២គ្រឿង ថង់សម្រាប់ច្រកថ្នាំមួយចំនួន និងសម្ភារៈពាក់ព័ន្ធក្នុងបទល្មើសគ្រឿងញៀនមួយចំនួនទៀត ។
ជនសង្ស័យបានឆ្លើយសារភាពថា ពួកគេពិតជាមានជាប់ពាក់ព័ន្ធនឹងបទល្មើសគ្រឿងញៀនប្រាកដមែន ហើយពេល កំពុងធ្វើសកម្មភាពចែកចាយ និងប្រើប្រាស់ត្រូវបានសមត្ថកិច្ចចុះចាប់ខ្លួនតែម្តង ។
ជនសង្ស័យត្រូវបានសមត្ថកិច្ចនៃអធិការដ្ឋាននគរបាលក្រុងដូនកែវ កំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមផ្លូវច្បាប់ ៕
