ទេសរដ្ឋមន្ត្រី ស៊ុន ចាន់ថុល ជួបប្រតិភូសភាពាណិជ្ជកម្មចិនប្រចាំកម្ពុជា ពិភាក្សាពីការវិនិយោគអភិវឌ្ឍហេដ្ឋារចនាសម្ព័ន្ធ សម្រាប់រថយន្តដើរដោយថាមពលអគ្គិសនី
(ភ្នំពេញ)៖ ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នាថ្ងៃទី២៥ ខែមករា ឆ្នាំ២០២២នេះ បានទទួលជួបសម្តែងការគួរសម និងពិភាក្សាការងារជាមួយគណៈប្រតិភូសភាពាណិជ្ជកម្មចិនប្រចាំកម្ពុជា ដែលដឹកនាំដោយលោក Zhang Hailong ប្រធានសភាពាណិជ្ជកម្មចិន និងមានការអមដំណើរ ពីតំណាងក្រុមហ៊ុន CACS និងតំណាងក្រុមហ៊ុន GCC។
ជំនួបនេះធ្វើឡើងក្នុងគោលបំណងស្នើសុំអនុសាសន៍ និងការណែនាំពីលោកទេសរដ្ឋមន្ត្រី ស៊ុន ចាន់ថុល ទាក់ទងនឹងការវិនិយោគលើការអភិវឌ្ឍហេដ្ឋារចនាសម្ព័ន្ធ សម្រាប់ដំណើរការរថយន្តដើរដោយថាមពលអគ្គិសនី និងការអប់រំបណ្តុះបណ្តាលបច្ចេកទេសសម្រាប់វិស័យនេះ ដើម្បីជំរុញការប្រើប្រាស់រថយន្ត ដើរដោយ ថាមពលអគ្គិសនីឱ្យបានទូលំទូលាយនៅកម្ពុជា។
ជាកិច្ចចាប់ផ្តើមតំណាងក្រុមហ៊ុននីមួយៗបានបង្ហាញនូវបទពិសោធន៍ និងសកម្មភាពការងាររបស់ខ្លួន ក៏ដូចជាទំនាក់ទំនងជាមួយនឹងបណ្ដាក្រុមហ៊ុនពាក់ព័ន្ធផ្សេងទៀត ដែលពាក់ព័ន្ធនឹងការអភិវឌ្ឍហេដ្ឋារចនាសម្ព័ន្ធសម្រាប់រថយន្តដើរដោយថាមពលអគ្គិសនី និងបានជម្រាបជូនអំពីគម្រោងដំឡើងស្ថានីយសាកថ្មរថយន្ត EVs ចំនួន១០ទីតាំង ដើម្បីជំរុញលើកទឹកចិត្ត និងទាក់ទាញការចាប់អារម្មណ៍ឱ្យមានការប្រើប្រាស់ពីសំណាក់សាធារណៈទូទៅ។
លោកទេសរដ្ឋមន្ត្រី ស៊ុន ចាន់ថុល បានគាំទ្រដល់គម្រោងដែលក្រុមហ៊ុនស្នើឡើង និងបានជំរុញឱ្យក្រុមហ៊ុន ផ្តោតការចាប់អារម្មណ៍លើការវិនិយោគហេដ្ឋារចនាសម្ព័ន្ធ សម្រាប់ដំណើរការស្ថានីយ៍សាកថ្មរថយន្តតាក់ស៊ី ដើរដោយថាមពលអគ្គិសនី នៅក្នុងរាជធានីភ្នំពេញ ដើម្បីចូលរួមកាត់បន្ថយការបំពុលបរិស្ថាន និងបានបង្ហាញ ការព្រួយបារម្ភលើការបោះចោល អាគុយចាស់ៗ ចេញពីរថយន្តដើរថាមពលអគ្គិសនី និងបានស្នើឱ្យក្រុមហ៊ុន ពិចារណាលើបញ្ហានេះឱ្យបានសមស្របដើម្បីចៀសវាង ការធ្វើឱ្យប៉ះពាល់ធ្ងន់ធ្ងរដល់បរិស្ថាន។
លោកទេសរដ្ឋមន្ត្រី បានឱ្យដឹងដែរថា ក្រសួងគ្រោងនឹងរៀបចំដាក់តាំងបង្ហាញរថយន្តដើរដោយថាមពលអគ្គិសនីនៅក្នុង Showroom ក្នុងបរិវេណទីស្តីការក្រសួង ដើម្បីទាក់ទាញចំណាប់អារម្មណ៍ពីសាធារណជន ក៏ដូចជាអ្នកប្រើប្រាស់យានយន្តសម្រាប់ធ្វើដំណើរផងដែរ។
ជាមួយគ្នានោះលោកទេសរដ្ឋមន្ត្រី ក៏បានលើកឡើងអំពីតួនាទីជាអ្នកសម្របសម្រួលរបស់ក្រសួងសាធារណការ និងដឹកជញ្ជូន រវាងក្រសួង-ស្ថាប័នពាក់ព័ន្ធនឹងវិស័យ ឯកជន និងបានសង្កត់ធ្ងន់ថា ក្រសួងមិនមែនជាចៅហ្វាយរបស់វិស័យឯកជនទេ ប៉ុន្តែជាអ្នកសម្របសម្រួលសម្រាប់វិស័យឯកជន ដើម្បីជំរុញការអភិវឌ្ឍសេដ្ឋកិច្ចឱ្យមាន ការរីកចម្រើន។
ជាការឆ្លើយតប តំណាងក្រុមហ៊ុនសន្យានឹងលើកយកបញ្ហាកង្វល់ ទាក់ទងនឹងការបោះចោលអាគុយចាស់ៗចេញពីររថយន្តទៅរាយការណ៍ជូនថ្នាក់ដឹកនាំ របស់ក្រុមហ៊ុន ដើម្បីពិចារណាយកទៅអនុវត្តនៅពេលគម្រោងនេះចាប់ផ្តើមដំណើរការនៅកម្ពុជា៕
