កំពត ៖ ក្រុមជនសង្ស័យចំនួន ៦ នាក់ ក្នុងនោះ មានអតីតនាយប៉ុស្តិ៍នគរបាលឃុំឬស្សីស្រុកខាងលិចផងដែរ ត្រូវបានកំលាំងអន្តរាគមន៍ របស់ស្នងការដ្ឋាននគរបាលខេត្តកំពតចេញប្រតិបត្តិការបង្ក្រាបបានទាំងសំបុកកាលពីរសៀលថ្ងៃទី21ខែមករា ឆ្នាំ2017ស្ថិតក្នុងភូមិលក ឃុំឬស្សីស្រុកខាងលិច ស្រុកកំពង់ត្រាច ខេត្តកំពត។
សមត្ថកិច្ចខេត្តកំពតបានប្រាប់ឱ្យដឹងថា ជនសង្ស័យទាំង៦នាក់ ពាក់ព័ន្ធនឹងការប្រើប្រាស់សារជាតិញៀនខាងលើក្នុងនោះមានម្នាក់ជាអតីតនាយប៉ុស្តិរដ្ឋបាលឃុំឬស្សីស្រុកខាងលិច ប៉ុន្តែត្រូវលុបឈ្មោះចេញពីបញ្ជីក្របខណ្ឌនគរបាលជាតិរយៈពេលជាង1ឆ្នាំមកហើយដោយសារបុគ្គលរូបនេះគេចវេះពីការងារដោយមិនដឹងមូលហេតុច្បាស់លាស់ ។
សមត្ថកិច្ចបានបញ្ជាក់ទៀតថា ជនជាប់សង្ស័យទាំង៦នាក់មានឈ្មោះ ទី1-ឈ្មោះសាន ឌៀត ភេទប្រុស អាយុ19ឆ្នាំ ទី2-ឈ្មោះ តាន់ លាង ភេទប្រុស អាយុ29ឆ្នាំ ទី3-ឈ្មោះសាន់ ឌី ភេទប្រុស អាយុ32ឆ្នាំ ទី4-ឈ្មោះឡាន វណ្ណារិទ្ធ ភេទប្រុស អាយុ22ឆ្នាំ ទី5ឈ្មោះសាន ដុំ ភេទប្រុស អាយុ33ឆ្នាំ និងទី6ឈ្មោះ ឡឹក សុជាតិ ភេទប្រុស អាយុ36ឆ្នាំ ជាអតីតមេប៉ុស្តិប៉ូលិសរដ្ឋបាល ឃុំឬស្សីស្រុកខាងលិច ស្រុកកំពង់ត្រាច ខេត្តកំពត។
ឥឡូវនេះក្រុមជនសង្ស័យទាំង6នាក់សមត្ថកិច្ចកំពុងសាកសួរចម្លើយនៅក្នុងការិយាល័យផ្នែកគ្រឿងញៀននិងធ្វើកំណត់ហេតុបន្តទៅសាលាដំបូងខេត្តកំពតចាត់ការតាមនិតិវិធី។
គួររំឮកផងដែរថា រយៈពេលប៉ុន្មានថ្ងៃនេះ កំលាំងសមត្ថកិច្ចនៃស្នងការដ្ឋាននគរបាលខេត្តកំពតបានចេញប្រតិបតិ្តការយ៉ាងក្តៅគគុកដើម្បីបង្ក្រាបបទល្មើសគ្រឿងញៀន ដោយបានសហការជាមួយកំលាំងសមត្ថកិច្ចតាមបណ្តាស្រុកនានាពិសេសសហការយ៉ាងស្អិតរមួតរវាងអាជ្ញាធរគ្រប់លំដាប់ថ្នាក់ផងដែរទើបប្រតិបតិ្តការនេះបានទទួលជោគជ័យ ។ ម្យ៉ាងទៀត កាលពីប៉ុន្មានថ្ងៃមុន កំលាំងសមត្ថកិច្ចខេត្តកំពតក៏បានបង្ក្រាបមុខសញ្ញាចែកចាយគ្រឿងញៀន ដែលជាមន្ត្រីនគរបាលខេត្តកំពតម្នាក់ផងដែរដោយដកហូតបានសារជាតិញៀនមួយចំនួនធំនិងក៏បានបញ្ជូនជនសង្ស័យរួមទាំងវត្ថុតាងទៅតុលាការចាត់វិធានការតាមផ្លូវច្បាប់៕
ណារិទ្ធ
