(ភ្នំពេញ)៖ ទីតាំងល្បែងសុីសងមាន់ជល់កំពុងតែប្រមូលផ្ដុំគ្នា លេងល្បែងស៊ីសង មាន់ជល់ យ៉ាងរលូន ស្ថិតនៅបណ្តោយផ្លូវប្រឡាយទឹកស្អុយ ម្ដុំសិប្បកម្មឈើ ក្នុងភូមិ៤ សង្កាត់ផ្សារដើមថ្កូវ ខណ្ឌចំការមន ខណៈសមត្ថកិច្ចក្នុងមូលដ្ឋានមិនហ៊ានបង្ក្រាប។
តាមព័ត៌មាន ជាក់ស្ដែង នៅថ្ងៃទី២៣ ខែតុលា ឆ្នាំ២០២១ នេះដែលក្រុមការងារសារព័ត៌មានយើង បានចុះដល់ចំណុចទីតាំង ហើយបានរាយការណ៍ព័ត៌មានជូនដល់ សមត្ថកិច្ចពាក់ព័ន្ធក្នុងមូលដ្ឋាន និងស្នើសុំដល់កម្លាំងសមត្ថកិច្ច ចុះបង្ក្រាបទប់ស្កាត់ តែបែរជា សមត្ថកិច្ចគ្មានចំណាត់ការទៅវិញ។
ប្រជាពលរដ្ឋ បានរិះគន់ថា ភាពអសកម្ម របស់សមត្ថកិច្ចមូលដ្ឋាន កំពុងតែអនុវត្តផ្ទុយពីគោលនយោបាយភូមិ-សង្កាត់មានសុវត្ថិភាពទាំង៧ចំណុច ដែលចេញដោយក្រសួងមហាផ្ទៃ។
ប្រជាពលរដ្ឋ ជាច្រើន បានបន្ត រិះគន់ទៀតថា៖ បើអាជ្ញាធរមានសមត្ថកិច្ច ក្នុងមូលដ្ឋានមិនព្រមបង្ក្រាបទប់ស្កាត់បទល្មើសល្បែងស៊ីសងខុសច្បាប់ទាំងនេះទេ នោះប្រាកដជាមាន ករណី លួច ឆក់ ប្លន់ កើតឡើងជាបន្តបន្ទាប់ជាក់ជាមិនខាន។
ទោះយ៉ាងណាក្តី ប្រជាពលរដ្ឋ នៅតែមាន ជំនឿលើលោក ថេង សុថុល អភិបាលខណ្ឌចំការមន និងលោក យិន សាន អធិការនគរបាលខណ្ឌចំការមន ប្រាកដជាប្រើវិធានការក្តៅចំពោះទីតាំងល្បែងស៊ីសងខុសច្បាប់ ខាងលើ ជាក់ជាមិនខាន។
