ខេត្កកំពត ប្រកាសបិទយុទ្ធនាការចាក់វ៉ាក់សាំងកូវីដ-១៩ ជុំទី១ ជូនប្រជាពលរដ្ឋដែលមានអាយុ១៨ឆ្នាំ ឡើង
ខេត្តកំពត នៅរសៀលថ្ងៃទី២១ ខែតុលា ឆ្នាំ២០២១ លោកជំទាវវិជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាសំាងកូវីដ-១៩ និងឯកឧត្ដម ម៉ៅ ធនិន អភិបាល នៃគណៈអភិបាលខេត្តកំពត បានអញ្ជើញជាអធិបតី ប្រកាសបិទយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនដល់ប្រជាពលរដ្ឋដែលមានអាយុ១៨ឆ្នាំ ឡើងទៅ នៅភូមិសាស្ត្រ ខេត្តកំពត។
ពិធីបិទយុទ្ធនាការនេះ ត្រូវបានរៀបចំឡើង ក្នុងបរិវេណសាលាខេត្តកំពត ដែលមានវត្តមានអញ្ជើញចូលរួមពី ឯកឧត្តមលោកជំទាវ ប្រតិភូអមដំណើរ របស់ក្រសួងសុខាភិបាល លោក លោកស្រី អភិបាលរងខេត្ត អភិបាលក្រុង ស្រុក និងលោក លោកស្រី ប្រធានអនុប្រធាន មន្ទីរអង្គភាពពាក់ព័ន្ធ។
យោងតាមរបាយការណ៍របស់ លោក វេជ្ជបណ្ឌិត ញា ប៊ុន ថន ប្រធានមន្ទីរសុខាភិបាលខេត្តកំពត បានឱ្យដឹងថា ការចាក់វ៉ាក់សាំងជូនប្រជាពលរដ្ឋក្នុងខេត្តកំពត គិតចាប់ពីអាយុ១៨ឆ្នាំឡើង បានចំនួន ៣៤៤,៧៦៣នាក់ ស្នើនឹង៨៩,០៩ភាគរយ នៃផែនការសរុប ៣៨៦,៩៤៨នាក់។ចំពោះកុមារ និងយុវវ័យចាប់ពីអាយុ១២ឆ្នាំ ដល់ក្រោម១៨ឆ្នាំ ចាក់បានចំនួន ៦៦,១០៩នាក់ ស្មើនឹង៨៤,០០ភាគរយ នៃផែនការសរុប ៧៨,៧០០នាក់។ដោយឡែក កុមារ
ចាប់ពីអាយុ៦ឆ្នាំ ដល់ក្រោម១២ឆ្នាំ ចាក់បានចំនួន ៧៧,២០៥នាក់ ស្មើ ១១០,៨២ភាគរយ នៃផែនការសរុប៦៩,៦៦៧នាក់។លើសផែនការចំនួន៧៥៣៧នាក់ ស្មើ១០,៨២ភាគរយ។
ជារួមប្រជាពលរដ្ឋដែលមានអាយុចាប់ពី១២ឆ្នាំឡើង ត្រូវទទួលការចាក់វ៉ាក់សាំងបានចំនួន៤១០,៨៧២នាក់ ស្មើ ៨៨,២៤ភាគរយ នៃផែនការសរុប ៤៦៥,៦៤៨នាក់។ក្នុងនោះអ្នកមិនទាន់បានចាក់ចំនួន៥៤,៧៧៦នាក់ ស្មើ ១១,៧៦ភាគរយ (ស្ត្រីមានផ្ទៃពោះ ពលករចំណាកស្រុក ប្រជាពលរដ្ឋដែលមានធុរៈផ្សេងៗ)។
មានប្រសាសន៍ក្នុងពិធីប្រកាសបិទយុទ្ធការចាក់វ៉ាក់សាំងបង្ការជំងឺកូវីដ-១៩ សម្រាប់ប្រជាជនអាយុ១៨ឆ្នាំ ឡើងទៅក្នុងខេត្តកំពតនោះ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានគូសបញ្ជាក់ថា ការបង្កើតឱ្យមាននូវភាពស៊ាំក្នុងសហគមន៍ទប់ទល់ ទៅនឹងជំងឺកូវីដ-១៩ ជាយុទ្ធសាស្ត្រសំខាន់របស់រាជរដ្ឋាភិបាល ក្នុងការឈានទៅបើកដំណើរការជាប្រប្រតីឡើងវិញលើគ្រប់វិស័យ ហេតុនេះយុទ្ធនាការចាក់វ៉ាក់សាំងបង្ការជំងឺកូវីដ-១៩ ដែលរាជរដ្ឋាភិបាលបានប្រកាស ផ្តល់ជូនប្រជាពលរដ្ឋនៅទូទាំងប្រទស ក្នុងឆ្នាំ២០២១ នេះសម្រេចបាន ប្រមាណជាង៩៩%ហើយ នៅទូទាំងប្រទេស ដែលនេះបង្ហាញឱ្យឃើញពីកិច្ចខិតខំប្រឹងប្រែងរបស់ប្រមុខរាជរដ្ឋាភិបាល ក្នុងការគិតគូរពីសុខមាលភាព និងជីវភាពរស់នៅរបស់ ប្រជាពលរដ្ឋ។
លោកជំទាវរដ្ឋលេខាធិការ ក៏បានកោតសរសើរខ្ពស់ចំពោះ រដ្ឋបាលខេត្តកំពតលើយុទ្ធនាការប្រយុទ្ធប្រឆាំងនិងជំងឺកូវីដ-១៩ ដែលទទួលបានលទ្ធផលល្អ ទាំងការព្យាបាលអ្នកជំងឺកូវីដ ការស្រាវជ្រាវរកបុគ្គលប៉ះពាល់ រួមទាំង យុទ្ធនាការចាក់វ៉ាក់សាំង ដែលឈានដល់ការបិទបញ្ចប់ជុំទី១ ដោយជោគជ័យ។ លោកជំទាវ បន្តថា ការបិទយុទ្ធនាក់ចាក់វ៉ាក់សាំងនេះ សម្រាប់តែប្រជាពលរដ្ឋអាយុ១៨ឆ្នាំឡើងតែប៉ុណ្ណោះ ដោយឡែក កុមារអាយុពី១២ឆ្នាំ ដល់ក្រោម១៨ឆ្នាំគឺនៅបន្តចាក់ជាធម្មតា។ លោកជំទាវ សុំឱ្យរដ្ឋបាលខេត្តកំពត រក្សាវ៉ាក់សាំងមួយចំនួនសម្រាប់បងប្អូនដែលជាប់ចត្តាឡីស័ក និងពលករដែលទើបត្រឡប់មកពីបរទេស ដើម្បីឱ្យពួកគាត់មានឱកាសទទួលបាន វ៉ាក់សំាងសម្រាប់ជាកងការពារខ្លួន ក្នុងនោះដែរ លោកជំទាវ ក៏បានអំពាវនាវឱ្យបងប្អូនទាំងអស់នៅតែបន្តអនុវត្តវិធានការសុខាភិបាល គឺ៣កុំ ៣ការពា បើទោះបីបានទទួលវ៉ាក់សាំងរួចហើយក៏ដោយ៕ សេង ណារិទ្ធ
