កណ្ដាល៖ ឯកឧត្ដម គង់ សោភ័ណ្ឌ ប្រធានក្រុមការងារយុវជនគណបក្សប្រជាជនកម្ពុជាខេត្តកណ្តាល នាព្រឹកថ្ងៃទី១៧ ខែតុលា ឆ្នាំ២០២១ បានអញ្ជើញជាអធិបតីភាពក្នុងពិធីសំណេះសំណាលជាមួយយុវជន គណបក្សប្រជាជនកម្ពុជាស្រុកពញាឮ ដើម្បីត្រៀមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សា ឃុំ-សង្កាត់ អាណត្តិទី៥ ឆ្នាំ២០២២ ដោយមានការចូលរួមពីឯកឧត្តម តាំង ម៉េងលាន អនុប្រធានក្រុមការងារយុវជនគណបក្សប្រជាជនកម្ពុជាខេត្តកណ្តាល និងលោក លោកស្រី អនុប្រធាន សមាជិកគណៈអចិន្ត្រៃយ៍ក្រុមការងារយុវជនគណបក្សខេត្ត ប្រធាន អនុប្រធានគណបក្សស្រុក ឃុំ នៅទីស្នាក់ការគណបក្សប្រជាជនកម្ពុជា ស្រុកពញាឮ។

នាឱកាសនោះឯកឧត្ដម គង់ សោភ័ណ្ឌ បានថ្លែងថា ក្រុមការងារយុវជនគណបក្សប្រជាជនកម្ពុជាខេត្តកណ្តាលគ្រប់ថ្នាក់ គ្រប់ផ្នែក ប្តេជ្ញាចិត្តបន្តអនុ វត្តតាមមាគ៌ានយោបាយដ៏ត្រឹមត្រូវរបស់គណបក្សប្រជាជនកម្ពុជា សំដៅពង្រឹង និងជំរុញការចាត់តាំងអនុវត្តការងារ ប្រកបដោយប្រសិទ្ធភាព និងប្រសិទ្ធផលខ្ពស់ តាមផែនការរួមរបស់គណបក្សឆ្ពោះទៅកាន់ការបោះឆ្នោត ជ្រើសរើស ក្រុមប្រឹក្សា ឃុំ សង្កាត់ អាណត្តិទី៥ ឆ្នាំ២០២២ ដើម្បីពង្រឹង និងពង្រីកប្រៀបឈ្នះរបស់គណ បក្ស និងចូលរួមធានាជ័យជំនះជូនគណបក្សគ្រប់ការបោះឆ្នោត ពោលគឺសម្រេចឱ្យបាននូវទិសស្លោក “រក្សាចាស់ បង្កើនថ្មី” និង “យុវជនគណបក្ស ១រូប គឺជាសំឡេងឆ្នោតគាំទ្រគណបក្ស ១សន្លឹក”។

ឯកឧត្ដមបន្តថា ផ្អែកតាមការប្ដេជ្ញាចិត្តនេះ និងយោងតាមបទពិសោធន៍នៃការបោះឆ្នោតអាណត្តិមុនៗកន្លងមក យុវជនគណបក្សប្រជាជនកម្ពុជាខេត្តកណ្តាល និងផែនចំណុះ នៃក្រុមការងារយុវជនគណបក្សប្រជាជនកម្ពុជា ក្រុង ស្រុក ឃុំ សង្កាត់ និងក្រុមសកម្មជនយុវជនគណបក្សថ្នាក់មូលដ្ឋានទាំងអស់ ដែលជាជំនួយការឱ្យគណៈ កម្មាធិការគណបក្សគ្រប់លំដាប់ថ្នាក់ លើការងារបំផុសយុវជនឱ្យគាំទ្របុព្វហេតុដ៏ត្រឹមត្រូវរបស់គណបក្ស ត្រូវរៀបចំចាត់តាំងអនុវត្តការងារឱ្យបានល្អប្រសើរ ដើម្បីដណ្ដើមប្រៀបឈ្នះ ក្នុងការបោះឆ្នោតជ្រើសរើស ក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២។

ឯកឧត្ដមក្រុមការងារយុវជនគណបក្សប្រជាជនកម្ពុជាខេត្តកណ្តាល បានណែនាំដល់យុវជនគណបក្សស្រុកពញាឮ ត្រូវពង្រឹងគុណភាព សមត្ថភាព និងសកម្មភាពការងារ ដល់ក្រុមការងារយុវជនគណបក្សស្រុកគ្រប់ថ្នាក់ គ្រប់ផ្នែក និងគ្រប់ផែន ឱ្យបានល្អបំផុតចាប់ពីពេលនេះរហូតដល់ថ្ងៃបោះឆ្នោត និងជារៀងរហូត ដើម្បីទទួលបានជ័យជំនះគ្រប់ការបោះឆ្នោត៕