ខេត្តបន្ទាយមានជ័យ៖កម្លាំងទីបញ្ជាការកងការពារព្រំដែនលេខ៥០៣ ដឹកនាំដោយលោកវរសេនីយ៍ទោ លេ លឿត មេបញ្ជាការរង កងការពារព្រំដែនលេខ៥០៣ កាលពីវេលាម៉ោង០១និង០០នាទី ថ្ងៃទី១៦ ខែកញ្ញា ឆ្នាំ២០២១ បានធ្វើការទប់ស្កាត់ពលករចំណាកស្រុកទៅប្រទេសថៃ ប្រុស ស្រីចំនួន២៦នាក់ រួមនឹងរថយន្តចំនួន០២គ្រឿង គោយន្ត០១គ្រឿង ក្នុងនោះឃាត់អ្នកបើកបររថយន្ត និងគោយន្តបានចំនួន០៣នាក់ ខណៈដែលកំពុងដឹកពលករខ្មែរបម្រុងលួចឆ្លងដែនទៅរកការងារធ្វើនៅប្រទេសដោយខុសច្បាប់។
ការទប់ស្កាត់ពលករដែលលួចទៅឆ្លងដែនដោយខុសច្បាប់នេះ ចំនួន២លើកនៅចំណុច TA(70351.32628) ផ្លូវបំបែកវិស្វកម្ម និងផ្លូវតែហាំង ភូមិចក់ពួក ឃុំស្លក្រាម ស្រុកស្វាយចេក ខេត្តបន្ទាយមានជ័យ។
លោកវរសេនីយ៍ទោ លេ លឿត មេបញ្ជាការរង កងការពារព្រំដែនលេខ៥០៣ បានឲ្យដឹងថា ការទប់ស្កាត់ពលករទាំងនេះមានចំនួន២លើក
លើកទី១ ឃាត់បានចំនួន១៦នាក់ (ស្រី០៩នាក់) ក្នុងនោះកុមា១នាក់ រថយន្ត០២គ្រឿង ម៉ាកកាម៉ារីពណ៌ខ្មៅ ពាក់ស្លាកលេខ ពោធិសាត់ 2A-0206 ម្ចាស់រត់គេចខ្លួនបាត់ និងរថយន្តម៉ាកកាម៉ារីពណ៌ខៀវ ពាក់ស្លាកលេខកំពង់ចាម 2A-0521 ឃាត់បានម្ចាស់០២នាក់ប្តី ប្រពន្ធ រួចប្រគល់ជូនកងរាជអាវុធហត្ថខេត្តបន្ទាយមានជ័យ ចាត់ការបន្ត។
លោកមេបញ្ជាការង បានបញ្ជាក់ថា លើកទី២ នៅយប់ថ្ងៃដដែល ដោយទប់ស្កាត់បានពលករចំនួន១០នាក់ (ស្រី០២នាក់) ក្នុងនោះកុមារ១នាក់ផងដែរ ដែលលួចជិះតាមគោយន្តបន្លំធ្វើដូចអ្នកស្រុកធ្វើចម្ការ និងឃាត់បានម្ចាស់គោយន្ត ១នាក់។ក្រោយពីស្ទាក់ឃាត់ខ្លួន ពលករប្រុស ស្រី ទាំង២៦នាក់ បញ្ជូនទៅក្រុមការងារចម្រុះចាំទទួលពលករនៅច្រកអូរបីជាន់ ស្រុកអូរជ្រៅ ដើម្បីពិនិត្យសុខភាពរកជំងឺកូវីដ-១៩។រីឯម្ចាស់រថយន្ត និងម្ចាស់គោយន្ត ទាំង០៣នាក់ រួមទាំងរថយន្ត ត្រូវបញ្ជូនទៅកាន់ទីបញ្ជាការកងរាជអាវុធហត្ថខេត្ត ដើម្បីចាត់ការបន្តតាមនិតិវិធី៕
