(ខេត្តកំពត)៖ ក្នុងរយៈពេលជាងពីរសប្តាហ៍កន្លងមកនេះ ការនាំស្រូវទៅលក់នៅប្រទេសវៀតណាមតាមច្រកទ្វារព្រំដែនទ្វេភាគីតន់ហន់ នៃឃុំព្រែកក្រឹសស្រុកកំពង់ត្រាច ខេត្តកំពត មានភាពយឺតយ៉ាវ ហើយឈ្មួញមកពីខេត្តឆ្ងាយត្រូវរងចាំជាច្រើនថ្ងៃ បណ្តាលឲ្យប៉ះពាល់ដល់ការងាររកស៊ី ។ ដើម្បីសម្របសម្រួលដោះស្រាយឆ្លើយតបជាបន្ទាន់ជុំវិញបញ្ហានេះ លោក ជាវ តាយ អភិបាលខេត្តកំពត ចុះពិនិត្យនៅតំបន់ព្រំដែនដោយផ្ទាល់ កាលពីថ្ងៃទី៣០ ខែវិច្ឆិកា ឆ្នាំ២០២០។
ក្រោយពីបានពិនិត្យ និងជួបប្រជុំជាមួយអាជ្ញាធរ មន្ត្រីជំនាញ និងពាក់ព័ន្ធនៅច្រកទ្វារធ្វេរភាគីតន់ហន់ ឈ្មួញ និងប្រជាពលរដ្ឋ បានឲ្យដឹងថា មូលហេតុសំខាន់ដែលនាំឲ្យមានការកកស្ទះ និងយឺតយ៉ាវក្នុងការនាំស្រូវចេញមានពីរចំណុចសំខាន់ ទី១. ដោយសារជំងឺកូវីដ១៩ កំពុងឆ្លងរាលដាលនៅប្រទេសវៀតណាម ភាគីវៀតណាមរិតបន្តឹងវិធានការការពារ និងទី២. ការិតបន្តឹងច្បាប់ចរាចរណ៍ផ្លូវកោគរបស់វៀតណាម (ទាមទារឲ្យមានឯកសារពាក់ព័ន្ធ និងការកំណត់ទម្ងន់រថយន្តដឹកទំនិញតាមច្បាប់)។
នៅក្នុងឱកាសនោះ លោក ជាវ តាយអភិបាលខេត្តកំពត បានបញ្ជាក់ថា ជាមោទនភាពសម្រាប់កម្ពុជាក៏ដូចជាខេត្តកំពតផងដែរ ដែលប្រជាពលរដ្ឋបានផលិតស្រូវ លើសពីតម្រូវការផ្គត់ផ្គង់ក្នុងគ្រួសារ និងសល់សម្រាប់នាំចេញក្រៅប្រទេស ដែលមានតម្លៃសមរម្យនាពេលបច្ចុប្បន្ននេះ ស្របតាមគោលនយោបាយរបស់រាជរដ្ឋាភិបាល ដែលមានសម្ដេចតេជោហ៊ុន សែនជាប្រមុខដឹកនាំ ដែលបានដាក់ចេញនូវនយោបាយការនាំស្រូវអង្ករចេញលក់ក្រៅប្រទេសឲ្យបាន១លានតោនក្នុងមួយឆ្នាំ។
ដូច្នេះដើម្បីសម្រួលដល់ការនាំចេញ រដ្ឋបាលខេត្ត ដែលជាសេនាធិការឲ្យរាជរដ្ឋាភិបាល រួម និងសមត្ថកិច្ច អាជ្ញាធរមន្ទីរជំនាញ ពាក់ព័ន្ធ ត្រូវធ្វើយ៉ាងណារួមសហការគ្នា រកវិធីដោះស្រាយ សម្របសម្រួល បង្កលក្ខណៈងាយស្រួលជូនដល់អាជីវករក៏ដូចប្រជាពលរដ្ឋ ដើម្បីជំរុញការនាំស្រូវចេញទៅលក់ក្រៅប្រទេស ក៏ដូចជាការលើកទឹកចិត្តដល់ប្រជាកសិករខ្មែរផងដែរ។
លោកអភិបាលខេត្តបានដាក់ចេញនូវដំណោះស្រាយចំពោះមុខថា រដ្ឋបាលខេត្តនឹងបង្កើតក្រុមការងារដោះស្រាយការនាំចេញស្រូវ និងរៀបចំកិច្ចប្រជុំជាមួយភាគីវៀតណាមតាមរយៈVideo Conference ដើម្បីពិភាក្សារកដំណោះស្រាយនូវបញ្ហារាំងស្ទះ និងយន្តការសម្របសម្រួលការនាំចេញស្រូវដែលមិនទាន់មានភាពប្រទាក់ក់ក្រឡាគ្នា សំដៅដល់ការនាំស្រូវចេញឲ្យមានភាពរលូន។
លោក ជាវ តាយអភិបាលខេត្ត ក៏បានក្រើនរំលឹកសំណូមពរដល់អាជ្ញាធរ កងកម្លាំងមានសមត្ថកិច្ច ទាំងថ្នាក់ខេត្ត និងតាមព្រំដែនរួមនឹងប្រជាពលរដ្ឋ ត្រូវរួមគ្នាបង្ការទប់ស្កាត់ជំងឺកូវីដ១៩ តាមការអំពាវនាវរបស់ប្រមុខរាជរដ្ឋាភិបាលសម្ដេចតេជោហ៊ុនសែន នឹងលុបបំបាត់កាត់បន្ថយភាពអសកម្មផ្សេងៗ ដើម្បីបង្កលក្ខណៈងាយស្រួលដល់ប្រជាពលរដ្ឋក្នុងកិច្ចប្រកបរបរជំនួញរវាងកម្ពុជាវៀតណាមឲ្យបានកាន់តែប្រសើរ៕ សេង ណារិទ្ធ
