មណ្ឌលគិរី៖ សកម្មភាពជីករករ៉ែមាស ដោយប្រើរំសេវបំផ្ទុះ នៅខេត្តមណ្ឌលគិរី ហើយថែមទាំងបង្កឲ្យប៉ះពាល់ខ្លាំងដល់ការរស់នៅ និងសុខភាពរបស់ប្រជាពលរដ្ឋ ដោយការជីករករ៉ែទាំងអស់នេះ ត្រូវបានគេអះអាងថា ពុំមានច្បាប់ទម្លាប់រឺអាជ្ញាប័ណត្រឹមត្រូវ ពីអាជ្ញាធរពាក់ព័ន្ធនោះឡើយ។
ប្រជាពលរដ្ឋ គណៈកម្មការ អាចារ្យវត្ត និង ព្រះសង្ឃគង់នៅវត្តព្រៃមាស ភូមិអូរក្ល ឃុំងផ្លាស់ ស្រុកកែវសីមា បានបង្ហើបប្រាប់អ្នកយកព័ត៌មានថា ជារៀងរាល់ថ្ងៃសកម្មភាពជីករករ៉ែ ដែលនៅជាប់បរិវេណវត្ត បានកើតមានយ៉ាងគគ្រឹកគគ្រេង ហើយការជីករករ៉ែនេះ ក្រុមឈ្មួញនាំគ្នាប្រើគ្រាប់រំសេវបំផ្ទុះរណ្តៅដីលាន់ទ្រហឹងអឹងកង។ ក្រៅពីការប្រើរំសេវបំផ្ទុះបំបែកថ្ម និងដីហើយនោះ ក្រុមអ្នកជីករករ៉ែមាស បាននាំគ្នាប្រើម្ស៉ៅគីមី ចម្រាញ់យកមាសថែមទៀតផងដែរ។
ប្រជាពលរដ្ឋ ក៏ដូចជាព្រះសង្ឃ បានសម្តែងការធុញទ្រាន់ និងសកម្មភាពជីកយករ៉ែអនាធិបតេយ្យនេះ ព្រោះវាបានរំខានយ៉ាងខ្លាំងដល់ការរស់នៅ ជាពិសេសការប្រើម្ស៉ៅគីមី បាននិងកំពុងបង្កគ្រោះថ្នាក់ ដល់សុខភាព របស់ប្រជាពលរដ្ឋ និងសត្វចិញ្ចឹមរបស់ពួកគាត់ ហើយលើសពីនេះ ម្ចាស់រណ្តៅរ៉ែមាសទាំងអស់នោះ បានដើរអួតក្អេងក្អាងថា ពួកគេជាក្មួយមន្ត្រី ធំៗ ក្នុងជួររាជរដ្ឋាភិបាលកម្ពុជា ដូច្នេះពួកគេមិនខ្លាច រអាអាជ្ញាធរណាមកបង្ក្រាបសកម្មភាព របស់ពួកគេឡើយ។
ក្រុមឈ្មួញអាងខ្នងសែស្រឡាយជាអ្នកធំ ធ្វើសកម្មភាពបំផ្លាញរ៉ែធម្មជាតិក្នុងខេត្តមណ្ឌលគិរីនេះ ត្រូវបានគេអះ អាងថា មានឈ្មោះ ឈុំ មូ មន្ត្រីកងរាជអាវុធហត្ថខេត្ត ឈ្មោះ ឆាន់ ទៀង ឈ្មោះ តែ គឹមសាន ឈ្មោះ លឹម និង ម្នាក់ទៀត ឈ្មោះ លាង។
ដោយឡែក មេឃុំចុងផ្លាស់ បានទទួលស្គាល់ថា ពិតជាសកម្មភាពបំផ្ទុះរំសេវរករ៉ែមាស យ៉ាងអនាធិបតេយ្យក្នុងតំបន់ខាងលើ នោះមែន ហើយកន្លងមកសមត្ថកិច្ចធ្លាប់បានបង្ក្រាប និងដកហូតវត្ថុតាង ដូចជាជីបំផ្ទុះចំនួន ៦បាវ គ្រឿងបំផ្ទុះចំនួន១៣ដុំ និងសម្ភារៈមួយចំនួនធំទៀត ព្រមទាំងធ្វើការឃាត់ខ្លួនជនជាតិចិនចំនួន ៣នាក់ពាក់ព័ន្ធ និង រ៉ែមាស ។
លោក សាន់ ដារិទ្ធ ប្រធានមន្ទីររ៉ែនងថាមពលខេត្ត អ្នកយកព័ត៌មានមិនអាចសុំការបំភ្លឺបានទេ ព្រោះទូរស័ព្ទចូលជាច្រើនដង ហើយមិនមានអ្នកឆ្លើយតប។
ចំណែកលោក ស្វាយ សំអ៊ាង អភិបាលខេត្តមណ្ឌលគិរីក៏មិនអាចសុំការបំភ្លឺ បានទេព្រោះលោកជាប់ប្រជុំ។
ប្រភពក្រៅផ្លូវការបានបង្ហើបឲ្យដឹងថា កន្លងមកនៅក្រោយពេលលោក ស្វាយ សំអ៊ាង បានឡើងកាន់តំណែងជាអភិបាលខេត្ត គេឃើញមានមន្ត្រីជំនាញរ៉ែ នឹងថាមពលខេត្ត ចុះនៅហាមឃាត់សកម្មភាពជីកយករ៉ែមាសខុសច្បាប់ទាំងនោះ តែមិនដឹងថា មានរឿងអ្វីបានកើតឡើងខ្លះនោះទេ ព្រោះសកម្មភាពបញ្ជប់ការជីកយករ៉ែមាស ឈប់បានមួយដង្ហើមចង្រឹមប៉ុណ្ណោះ ក៏បើកឲ្យមានដំណើរការវិញ៕
ដោយ ៖គឹម ចំរើន
