(ខេត្តកំពត)÷ ក្រុមហ៊ុនវិនិយោគមួយគ្រប់គ្រងដោយជនជាតិចិនដែលតំណាងដោយ លោក តឹក ងយ បានអះអាងថា លោកឧត្តមសេនីយ៍ឯក មាស ប៊ុន ឡី នៅក្រសួងការពារជាតិ បានយកគ្រឿងចក្រឈូសឆាយបំពានយកដីរបស់ក្រុមហ៊ុន ស៊ី អេ ស៊ី អាសិត ហូលឌីង ខូអិលធីឌី ស្ថិតក្នុងភូមិព្រែកអំពិល ឃុំកោះតូច ស្រុកទឹកឈូ ខេត្តកំពត មានទំហំរាប់រយហិកតា។
ជុំវិញរឿងរ៉ាវខាងលើនេះ លោកឧកញ៉ា តឹក ងយ ដែលជាតំណាងក្រុមហ៊ុនរបស់ចិន បានប្រាប់អ្នកយកព័ត៌មានឲ្យដឹងកាលពីថ្ងៃអាទិត្យ ទី១៣ ខែកញ្ញា ឆ្នាំ២០២០ថា ទីតាំងដែលក្រុមហ៊ុនស្នើសុំអភិវឌ្ឍន៍ជាតំបន់សេដ្ឋកិច្ចពិសេសខាងលើមាន៣ទីតាំង គឺភូមិព្រែកអំពិល ភូមិគីឡូ១២ និងភូមិកណ្តាល ក្នុងឃុំកោះតូច ស្រុកទឹកឈូ ខេត្តកំពត មានទំហំផ្ទៃដី សរុបចំនួន ៧៤៣ ហិកតា។ដោយឡែកទីតាំងដែលកំពុងរងការឈូសឆាយពីសំណាក់លោកផ្កាយបីនៅក្រសួងការពារជាតិ មានទំហំជាងមួយរយហិកតា។
លោកឧកញ៉ា តឹក ងយ បានបញ្ជាក់ទៀតថាទីតាំងដីដែលក្រុមហ៊ុនចិនសុំធ្វើការវិនិយោគខាងលើ គឺបានទិញពីប្រជាពលរដ្ឋចំនួនជាង៤០គ្រួសារ ដែលពួកគាត់អាស្រ័យផលនាពេលកន្លងមកស្ថិតលើទីតាំងដីនេះតែម្តង ប៉ុន្តែខណ:នេះត្រូវបានលោក មាស ប៊ុនឡី ឲ្យកូនចៅយកគ្រឿងចក្រឈូសឆាយព្រៃរាបស្មើដល់ដីអស់គ្មានសល់ ហើយមេការរបស់លោកផ្កាយបីបានដាក់របាំងបិទផ្លូវរារាំងមិនឲ្យម្ចាស់ដីពិតប្រាកដឆ្លងកាត់ឡើយ។
ពាក់ព័ន្ធនឹងករណីដដែល បើតាមការលើកឡើងរបស់ប្រជាពលរដ្ឋប្រមាណ២០គ្រួសារ បានស្រាយបំភ្លឺថា ចំណុចដីដែលគេកំពុងប្រើគ្រឿងចក្រឈូសឆាយ ហើយធ្វើរបាំងបិទផ្លូវមិនឲ្យអ្នកណាឆ្លងកាត់នេះ គឺជាដីពួកគាត់ដែលធ្លាប់ដាំដំណាំ អាស្រ័យផលកន្លងមកមានទំហំជាង១០០ហិកតាយ៉ាងពិតប្រាកដ ប៉ុន្តែតែពួកគាត់បានលក់ទៅឲ្យក្រុមហ៊ុនចិនខាងលើតាំងពី១០ឆ្នាំមុនមកម្លេះ។ចំណែកអ្នកមកឈូសឆាយនៅចំណុចដីនេះ ពួកគាត់មិនដែលស្គាល់នោះទេ ហើយក៏មិនបានលក់ដីនេះឲ្យទៅលោកផ្កាយបីនៅក្រសួងការពារជាតិនោះឡើយ។
ទាក់ទិននឹងករណីនេះ តំណាងក្រុមហ៊ុនចិន លោកឧកញ៉ា តឹក ងូយ សូមអំពាវនាវដល់អាជ្ញាធរដែនដីពាក់ព័ន្ធគ្រប់លំដាប់ថ្នាក់ ពិសេសសម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មេត្តាជួយរកយុត្តិធម៌ជូនក្រុមហ៊ុន ស៊ី អេ ស៊ី អាសិត ហូលឌីង ខូអិលធីឌី ដែលកំពុងរងនូវការរំលោភបំពាននេះផង។
ចំពោះរឿងរ៉ាវចោទប្រកាន់ខាងលើ អ្នកយកព័ត៌មានមិនអាចសុំការទំនាក់ទំងពី ឯកឧត្តម ឧត្តមសេនីយ៍ឯក មាស ប៊ុនឡី ធ្វើការនៅក្រសួងការពារជាតិបានទេ ដោយសារមេការក្នុងទីតាំងដីទំនាស់មិនព្រមសហការនិងគ្មានការស្រាយប៉ភ្លឺឲ្យបានជាក់លាក់៕
សេង ណារិទ្ធ
