មណ្ឌលគិរី ៖ ផ្ទះឈើមួយខ្នងបានរងការឆាបឆេះ ក្លាយជាផេះ បន្ទាប់ពីមិនមានមនុស្សចាស់នៅផ្ទះ ។ ហេតុការណ៍នេះបានកើតឡើង កាលពីម៉ោងប្រមាណជា៩និង៣០នាទីព្រឹកថ្ងៃទី១៣មិនា២០១៦ ស្ថិតនៅចំនុច ត្រពាំងតឿន ស្ថិតក្នុងភូមិក្បាលកោះ ឃុំស្រែសង្គម ស្រុកកោះញែក ខេត្តមណ្ឌលគិរី។
សេចក្តីរាយការណ៍ពីអធិការនគរបាលស្រុកលោកកាន់ ពេញ បានអោយដឹងថា ផ្ទះកើតហេតុខាងលើ ត្រូវបានភ្លើងឆាបឆេះ អស់ទាំងស្រុង ខណៈមិនអាចជួយអន្តរាគមន៍ទាន់ពេលវេលា ។
លោកថា ផ្ទះឈើ នោះ មានទំហំ៧ម៉ែត ×៨ម៉ែតប្រក់សង្កសី ដែលមានម្ចាស់ជាកសិករឈ្មោះតឿ ធូ ភេទប្រុស អាយុ ៣២ឆ្នាំ។
មូលហេតុនៃការឆះនោះនគរបាលបានបញ្ជាក់ថា ដោយសារតែម្ចាស់ផ្ទះខាងលើមិននៅផ្ទះ ហើយក៏ អោយក្មួយតូចនៅចាំ ។ ក្រោយមកក្មួយនោះបានដុតភ្លើងដាំទឹកបំណងឆុងមីហូប ហើយមិនបានពន្លត់ ភ្លើងក៏រាលដាលឆាបឆេះអស់តែម្តង ។
នគរបាលបន្តថា ទំហំនៃការខូចខាតនោះរួមមាន គោយន្តកន្ត្រៃ១ គ្រឿង អង្ករ៥០គីឡូក្រាម ស្រូវ១០បេ ឌីណាម៉ូភ្លើងមួយគ្រឿង រួមនិងសម្ភារះ ប្រើប្រាស់ជាច្រើន ទៀត។
សូមជម្រាបថា នៅក្នុងខេត្តមណ្ឌលគិរីនារដូវប្រាំងនេះលំនៅដ្ឋានជាច្រើនខ្នង បានរងនូវការឆាប ឆេះជាបន្តបន្តាប់ ដោយសារតែមូលហេតុផ្សេងៗគ្នា។ហើយសមត្ថកិច្ចក៏បានអំពាវនាវ អោយប្រជាពល រដ្ឋមានការប្រុងប្រយ័ត្នខ្ពស់ ត្បិតអាកាសធាតុក្តៅខ្លាំង ថែមទាំងមិនសូវមានទឹកប្រើប្រាស់គ្រប់គ្រាន់ ផងនោះ ៕
ដោយ ៖ គឹម ចំរើន
