ស្វាយរៀង ៖ ទោះបីមានការរីករាលដាលនៃជំងឺកូវីដ-១៩ ក្រុមអាជីវករបាននាំស្រូវចេញទៅប្រទេសវៀតណាម ត្រង់ចំណុចប្រឡាយទាហ៊ាន ជិតច្រកទ្វារព្រំដែនអន្តរជាតិព្រៃវល្ល៍ស្ថិតនៅភូមិព្រៃវល្ល៍ ឃុំថ្មី ស្រុកកំពង់រោទ៌ ក្នុង១ថ្ងៃបានប្រមាណ២៥០តោនទៅ៣០០តោន។
បើតាមក្រុមអាជីវករបានឲ្យដឹងថា ស្រូវដឹកមកពីខេត្តព្រៃវែងនិងស្រូវខេត្តស្វាយរៀង ស្រូវអ៊ីអ៊ែរ័បើទិញពីប្រជាកសិករនៅខេត្តព្រៃវែង ឬខេត្តត្បូងឃ្មុំ ១គីឡូក្រាមតម្លៃ៦៥០ទៅ៧០០រៀលបើទិញនៅខេត្តស្វាយរៀងដឹកដល់ចំណតទូក១គីឡូតម្លៃ៧៥០រៀលទៅ៨០០រៀល តាមពូជស្រូវ(ស្ងួត)លក់ទៅឲ្យវៀតណាម១គីឡូតម្លៃ៨៧០រៀល។ ស្រូវស្រែ ស្រូវស្មើ ស្រូវនាងម៉ិញ នាងអួក ម៉ុងម៉ាំង ស្មោងមាន់ក្នុង១គីឡូ៩០០រៀលទៅ៩៥០រៀល។ ស្រូវក្រអូបទិញក្រៅខេត្តមកពីខេត្ត ព្រៃវែង១គីឡូតម្លៃ១,០០០រៀល ដឹកមកដល់កំពង់ទូក១គីឡូតម្លៃ១,១០០រៀលទៅ១,១៥០រៀល ស្រូវផ្កាម្លិះ ១គីឡូតម្លៃ១,២០០រៀលទៅ១,៣០០រៀលតាមពូជស្រូវ(ស្ងួត)។
លោកថាច់ រតនា ប្រធានមន្ទីរកសិកម្មរុក្ខាប្រមាញ់និងនេសាទខេត្តស្វាយរៀងបានឲ្យដឹងថា ស្រូវនាំចេញទៅប្រទេសវៀតណាម រយៈពេល១ខែដោយគិតចាប់ពីថ្ងៃទី១៦ ខែមិថុនា ដល់ថ្ងៃទី១៦ខែកក្កដា២០២០នេះ ស្រូវនាំចេញទៅប្រទេវៀតណាមតាមប្រឡាយទាហ៊ានជិតច្រកទ្វារព្រំដែនអន្តរជាតិព្រៃវល្ល័ចំនួន៥,១៥០តោនក្នុង១ខែ។ នេះជាមោទនភាព សម្រាប់ប្រជាកសិករខ្មែរយើងបង្កបង្កើនផលស្រូវនៅរដូវប្រាំង ដែលបានច្រូតកាត់ចាប់ពីដើមខែមិថុនារហូតមកដល់ខែកក្កដា២០២០នេះ ប្រជាកសិករមានស្រូវអង្ករផ្គត់ផ្គង់ទីផ្សារក្នុងស្រុកហើយមានស្រូវនាំចេញទៅក្រៅប្រទេសទោះបីមានការឆ្លងរីករាលដាលជំងឺកូវីដ-១៩ផ្ទុះ នៅលើពិភពលោកនិងនៅកម្ពុជាយើង ក៏ដោយរាជរដ្ឋាភិបាលបានគ្រប់គ្រងបានគ្មានជំងឺកូវី១៩ ឆ្លងតាមសហគមន៍ទេដូច្នេះប្រជាកសិករបានបង្កបង្កើនផលបានមានទិន្នផលល្អប្រសើរហើយរដូវវស្សានេះប្រជាកសិករកំពុងបន្តធ្វើស្រែវស្សានិងដាំដំណាំយ៉ាងផុលផុសផងដែរ៕
