(ខេត្តកំពត)៖ នៅព្រឹកថ្ងៃចន្ទ ទី២២ ខែ មិថុនា ឆ្នាំ២០២០ លោក ជាវ តាយ អភិបាលនៃគណៈអភិបាលខេត្ត និងជាប្រធានក្រុមលេខាធិការដ្ឋានក្រុមការងាររាជរដ្ឋាភិបាលចុះមូលដ្ឋានដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤របស់រាជរដ្ឋាបាលកម្ពុជានៅខេត្តកំពត បានដឹកនាំកិច្ចប្រជុំពិភាក្សា ត្រៀមរៀបចំកិច្ចប្រជុំបូកសរុបលទ្ធផលការងារឆមាសទី១ និងលើកទិសដៅបន្តការងារឆមាសទី២ឆ្នាំ២០២០ របស់ក្រុមការងាររាជរដ្ឋាភិបាលចុះមូលដ្ឋាន ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤របស់រាជរដ្ឋាបាលកម្ពុជានៅខេត្តកំពត ដែលនឹងធ្វើឡើងនៅថ្ងៃទី ០៦ ខែ កក្កដា ឆ្នាំ២០២០ ដោយមានការអញ្ជើញចូលរួមពី លោក លោកស្រីអនុប្រធាន សមាជិកក្រុមលេខាធិការសរុប និងមានការចូលរួមពីសំណាក់ លោក លោកស្រី ជាអភិបាលក្រុង ស្រុក ផងដែរ។
ក្នុងកិច្ចប្រជុំនាពេលនេះ បានធ្វើការពិត្យពិភាក្សាទៅលើរបាយការណ៍លទ្ធផលការងារឆមាសទី១ របស់ក្រុមការងាររាជរដ្ឋាភិបាល ចុះមូលដ្ឋាន ដែលអនុវត្តកន្លងមកតាមបណ្តាមូលដ្ឋាន ក្រុង ស្រុក ឃុំ សង្កាត់ ជាពិសេសពិភាក្សាលើបញ្ហាប្រឈម និងសំណូមពររបស់ប្រជាពលរដ្ឋដែលបានលើកឡើងក្នុងវេទិកាសាធារណៈ ដើម្បីធ្វើឲ្យរបាយការណ៍មានខ្លឹមសារគ្រប់គ្រាន់ និងគ្រប់ជ្រុងជ្រោយ ជាលទ្ធផលទោះបីមានការីករាលដាលជាសាកលជំងឺកូវីត១៩ ក្រុមការងាររាជរដ្ឋាភិបាលចុះមូលដ្ឋានខេត្តកំពតបានចុះធ្វើវេទិកាសាធារណៈក្នុងឆមាសទី១បានចំនួន ២៦០ លើក លើ៩៣ឃុំ សង្កាត់ ប្រមូលបាននូវបញ្ហាប្រឈម និងសំណូមពរពីប្រជាពលរដ្ឋចំនួន ៩០២ករណី ក្នុងនោះក្រុមការងារបានដោះស្រាយរួចចំនួន ៥៤០ករណី កំពុងដោះស្រាយចំនួន ៣១៥ករណី និងមិនទាន់ដោះស្រាយចំនួន ៤៧ករណី ។
មានប្រសាសន៍ក្នុងកិច្ចប្រជុំ លោកអភិបាលខេត្ត បានណែនាំដល់ក្រុមលេខាធិការដ្ឋាន ពិនិត្យនិងកែសម្រួលខ្លឹមសារ និងតួលេខជាមួយនឹងរដ្ឋបាលក្រុង ស្រុក ដើម្បីឲ្យរបាយការណ៍កាន់តែមានខ្លឹមសារ និងជាក់ស្តែង ដើម្បីរំលេចឲ្យឃើញសកម្មភាពការងាររបស់ក្រុមការងារកន្លងមក។លោកបានបញ្ជាក់ផងដែរថា ក្រោមការដាក់ចេញរបស់រាជរដ្ឋភិបាល ក៏ដូចជាក្រសួងសុខាភិបាល ក្រសួងមហាផ្ទៃ និងអាជ្ញាធរពាក់ព័ន្ធ ពិសេសក្រោមការចង្អុលបង្ហាញផ្ទាល់ពី លោកកិត្តិសេដ្ឋា បណ្ឌិត ទេសរដ្ឋមន្ត្រី ចម ប្រសិទ្ធ ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពត បានដាក់ចេញនូវផែនការ ដល់ក្រុមការងារគ្រប់ថ្នាក់ ចុះមូលដ្ឋានក្នុងខេត្ត ធ្វើការណែនាំអប់រំផ្សព្វផ្សាយ ពីវិធានការ បង្ការ ទប់ស្កាត់កុំឲ្យមានការរីករាលដាលជំងឺកូវីដ១៩ និងបន្តផ្សព្វផ្សាយនៅតាមសហគមន៍ប្រកបដោយប្រសិទ្ធភាពខ្ពស់។
សូមជម្រាបថា ក្នុងកិច្ចប្រជុំនេះដែរ ក៏បានពិភាក្សាលើការងារបំពាក់គ្រឿងឥស្សរិយយស លើកទឹកចិត្តជូនមន្ត្រីដែលសកម្មការងារនៅរដ្ឋបាលខេត្ត និងនៅថ្នាក់មូលដ្ឋាន នៅថ្ងៃប្រជុំបូកសរុបលទ្ធផលសម្រេចបានក្នុងឆមាសទី១ឆ្នាំ២០២០ របស់ក្រុមការងាររាជរដ្ឋាបាលចុះមូលដ្ឋានខេត្តកំពត៕ សេង ណារិទ្ធ
