(ខេត្តកែប)៖ កាលពីរសៀលថ្ងៃសុក្រទី១២ ខែមិថុនា ឆ្នាំ ២០២០ លោក សោម ពិសិដ្ឋ អភិបាលខេត្តកែប បានដឹកនាំកិច្ចប្រជុំពិភាក្សាជាមួយក្រុមការងារលេខាធិការដ្ឋាននៃគណៈកម្មការអន្តរក្រសួង ក្នុងគោលបំណងរៀបចំផែនការមេសម្រាប់ការអភិវឌ្ឍវិស័យទេសចរណ៍នៅក្នុងខេត្តកែប ជាការបង្កើតឲ្យមានផលិតផលទេសចរណ៍ថ្មីៗ សំដៅលើកកម្ពស់ដើម្បីទាក់ទាញភ្ញៀវទេសចរជាតិ-អន្តជាតិ ស្របតាមគោលនយោបាយថ្មីរបស់រាជរដ្ឋាភិបាល ក្នុងការអភិវឌ្ឍវិស័យទេសចរណ៍នៅកម្ពុជាឲ្យកាន់តែមានការរីកចម្រើន ពិសេសគឺជាការជំរុញការអភិវឌ្ឍវិស័យទេសចរណ៍នៅខេត្តកែបនេះប្រកបដោយនិរន្តរភាព។
លោក សោម ពិសិដ្ឋ អភិបាលខេត្តកែប បានជម្រាបជូនអង្គប្រជុំអំពីវឌ្ឍនភាព នៃការអភិវឌ្ឍវិស័យទេសចរណ៍ ព្រមជាមួយនឹងកិច្ចខិតខំប្រឹងប្រែងរបស់រដ្ឋបាលខេត្តក៏ដូចជា មន្ទីរពាក់ព័ន្ធ និងអង្គការ សមាគមដែលជាដៃគូ ការពង្រឹងគុណភាពវិស័យទេសចរណ៍ ការជំរុញចលនាប្រលងប្រណាំងទីក្រុងស្អាត ការពង្រឹងធនធានមនុស្សក្នុងវិស័យទេសចណ៍ ការផ្សព្វផ្សាយទេសចរណ៍តាមប្រព័ន្ធបណ្តាញសង្គមផ្សេងៗផងដែរ។
លោកអភិបាលខេត្តបានបន្តទៀតថា ចំពោះការអភិវឌ្ឍនៅខេត្តកែប ក្នុងនោះក៏មានការអភិវឌ្ឍតំបន់កោះ តំបន់ឆ្នេរ តំបន់ភ្នំ ចំការម្រេច ប្រព័ន្ធទឹកស្អាត អគ្គិសនី និងការគ្រប់គ្រងសំណល់រឹង-រាវ ការពង្រឹងសន្តិសុខ សណ្តាប់ធ្នាប់សាធារណៈ ពង្រឹងគុណភាពចំណីអាហារ អនាម័យ និងការទាក់ទាញវិនិយោគឯកជនឲ្យចូលមកវិនិយោគក្នុងខេត្តបន្ថែមទៀតផងដែរ។
ជាមួយនេះ លោកក៏បានគាំទ្រឲ្យមានការរៀបចំផែនការមេសម្រាប់ការអភិវឌ្ឍវិស័យទេសចរណ៍នៅខេត្ត និងសូមឲ្យមន្ទីរពាក់ព័ន្ធ និងអង្គការសមាគមដៃគូនានា ត្រូវអនុវត្តនិងពិនិត្យនៅគម្រោងដែលបានដាក់ចេញ ដើម្បីឲ្យការរៀបចំផែនការមេសម្រាប់អភិវឌ្ឍវិស័យទេសចរណ៍នេះមានភាពគ្រប់ជ្រុងជ្រោយ៕ សេង ណារិទ្ធ
