(ខេត្តកំពត)៖ នៅរសៀលថ្ងៃអង្គារ ១កើត ខែចេត្រ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី២៤ ខែមីនា ឆ្នាំ២០២០ លោក ជាវ តាយ អភិបាល នៃគណៈអភិបាលខេត្តកំពត បានអនុញ្ញាតឱ្យ លោក កៅ គឹមហួន ដឹកនាំប្រតិភូវិនិយោគចិនចូលជួបសំដែងការគួរសម និងសំណេះសំណាល ដែលកិច្ចជំនួបនេះបានប្រព្រឹត្តឡើងនៅសាលប្រជុំសាលាខេត្តកំពត។
ក្នុងជំនួបនេះ លោក ជាវ តាយ អភិបាលខេត្ត បានមានប្រសាសន៍ថា លោកសូមស្វាគមន៍គ្រប់វិនិយោគទាំងអស់ ដែលបានមកដល់ទឹកដីនៃខេត្តកំពត។ លោកបានបន្តទៀតថា ខេត្តកំពត មានសក្តានុពលច្រើន និងមានអ្នកវិនិយោគបានមកវិនិយោគលើការងារមួយចំនួន រួមមាន រោងចក្រស៊ីម៉ង់ត៍ វារីអគ្គិសនី កសិដ្ឋានចេកអំបូង ពិសេសវិស័យទេសចរណ៍។
ជាចុងក្រោយ លោកអភិបាលខេត្ត បានស្នើសុំដល់វិនិយោគគិនទាំងអស់មកវិនិយោគលើទឹកដីខេត្តកំពត ដើម្បីឲ្យខេត្តកំពតមានការអភិវឌ្ឍរីកចម្រើនបន្តទៀត។
ក្នុងឱកាសនោះផងដែរតំណាងអ្នកវិនិយោគចិន បានមានប្រសាសន៍ថា អរគុណមិត្តភាពកម្ពុជា-ចិន អមតៈ លោកពិតជាមានមោទនភាពណាស់ដែលបានដឹកនាំក្រុមវិនិយោគចិនមកកាន់ទឹកដីដ៏ស្រស់ស្អាត នៃខេត្តកំពត៕ សេង ណារិទ្ធ
