ខេត្តមណ្ឌលគិរី ៖ ប្រជាពលរដ្ឋភ្ញាក់ផ្អើលនាំគ្នាឈរមើលព្រឹត្តិការណ៏ដ៏ចំឡែកមួយ គឺរថយន្តដឹកឈើរបស់លោកឧកញ៉ា លឹម ប៊ុនណា ហៅ ឧកញ៉ា ( ខ្នា ) និង លោកឧកញ៉ា សឹង សំអុល បើកបន្តកន្ទុយគ្នាសម្រុកចេញពីតំបន់ភ្នំព្រិច ។
តាំងពីម៉ោង៤ល្ងាចថ្ងៃទី១៥ខែមករាឆ្នាំ២០១៦ម្សិលមិញ រហូតមកទល់ម៉ោង៥ព្រឹកថ្ងៃទី១៦នេះគេឃើញមានរថយន្តយីឌុប រថយន្តកែឆ្នៃ រថយន្តប៉ាកុងរាប់រយពាន់គ្រឿងដែលគេប្រើប្រាស់ដើម្បីដឹកជញ្ជូនឈើ បានសម្រុកបើកចេញពីតំបន់ភ្នំព្រិចខេត្តមណ្ឌលគិរីឆ្លងកាត់តម្រង់មក ខេត្តក្រចេះ ។
រថយន្តបើកបន្តកន្ទុយគ្នាពេញមួយយប់ហាក់ដូចជា មានគ្រោះអាសន្នកើតឡើងធ្វើអោយប្រជាពលរដ្ឋខេត្តមណ្ឌលគិរីនិង ខេត្តក្រចេះភ័យស្លន់ស្លោ ។ តាមពិតរថយន្តទាង នោះគឺបើកចេញពីក្រុមហ៊ុនដាយណាម ដែលជាក្រុមហ៊ុនសម្បទានព្រៃឈើរបស់លោកឧកញ៉ា លឹម ប៊ុនណា និង ក្រុមហ៊ុនម៉ាស្ទឺខេសាន់របស់លោក សឹង សំអុល ដែលល្បីរន្ទឺខាងកាប់ទន្ទ្រានព្រៃឈើយកទៅលក់នៅប្រទេសវៀតណាម ។
ហេតុការណ៏នេះកើតឡើងត្រឹមតែប៉ុន្មានម៉ោងក្រោយពីសម្តេចតេជោ ហ៊ុន សែន បានប្រកាសបង្ក្រាបបទល្មើសព្រៃឈើនៅក្នុងកិច្ចប្រជុំគណ: រដ្ឋមន្ត្រីនៅថ្ងៃទី ១៥ ខែមករា ឆ្នាំ២០១៦ ដោយមានទាំងបង្កើតគណ:កម្មាធិការជាតិ ដើម្បីទប់ស្កាត់ និង បង្ក្រាបបទល្មើសព្រៃឈើផងនោះ។
គួររំលឹកផងដែរថា សម្តេចតេជោបានរំលឹកចំៗចំពោះឈ្មោះ ឧកញ៉ា លឹម ប៊ុនណា និង ឧកញ៉ា សឹង សំអុល ដែលល្បីថាបានកាប់បំផ្លាញព្រៃឈើព្រមទាងបានបញ្ជាអោយបិទច្រក រត់ពន្ធឈើនានាហើយថែមទាំងបង្កើតគណ:កម្មាធិការបង្ក្រាបមួយទៀត ដែលមានលោកឧត្តមសេនីយ៏ សៅ សុខា ជាប្រធាន ព្រមទាងប្រគល់ឧទ្ធម្ភាកចក្រចំនួន២គ្រឿងទៀតផងសំរាប់ធ្វើ ប្រតិបត្តិការណ៏។
ដោយ : ហេង ចាន់ណុប
