កាលពីព្រឹកថ្ងៃទី ០៦ ខែមករា ឆ្នាំ២០១៦ នៅសាលមហោស្រពស្ទឹងសង្កែ បានប្រារឰធ្វើពិធីអបអរសាទរខួបលើកទី ៣៧ ទិវាជ័យជំនះ ៧មករា (១៩៧៩-២០១៦)ក្រោមអធិបតីភាព ឯកឧត្តម ច័ន្ទ សុផល អភិបាលនៃគណៈអភិបាលខេត្ត បាត់ដំបង ព្រមទាំងមានការអញ្ជើញចូលរួមនៅក្នុងពិធីនេះ មានអស់លោក លោកស្រី ជាអភិបាលរងខេត្ត មន្ត្រីរាជការ ស្នងការនគរបាលខេត្ត កងរាជអាវុធហត្ថ មន្ត្រីយោធភូមិភាគ ៥ និងប្រជាពលរដ្ឋសរុបប្រមាណជាង ៥ពាន់នាក់ ។
ឯកឧត្តម ច័ន្ទ សុផល បានអានសុន្ទរកថា សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ដែលបានបញ្ជាក់ថា ៣៧ឆ្នាំ កន្លងមកនេះ គឺប្រទេសយើងបានងើបឡើងពីគំនរទុក្ខកាប់សម្លាប់នៃរបបឃោរឃៅខ្មែរក្រហម ដែលបានសម្លាប់មនុស្សអស់ជាង ៣លាននាក់ ។ ដោយមានការបង្រួបបង្រួមជាតិពីគ្រប់ភាគីនយោបាយនៅកម្ពុជា ទើបមាន ការចុះហត្ថលេខានៅទីក្រុងប៉ារីស ប្រទេសបារាំង ហើយបើគ្មានថ្ងៃ ៧មករា គ្មានជីវិត គ្មានវេទិកាចរចាស្វែងរកសន្តិភាព ហើយក៏គ្មានកិច្ចព្រមព្រៀងទីក្រុងប៉ារីសដែរ ។
បច្ចុប្បន្នមានការរីកដុះដាលគ្រប់ហេដ្ឋារចនាសម្ព័ន្ធ បង្កើតឱ្យមានបក្សនយោបាយមកចូលរួម បើកសិទ្ធិបញ្ចោញមតិឱ្យ មានរបបសារព័ត៌មាន និងជួយជម្រុញវិស័យសេដ្ឋកិច្ច ដោយមានអង្គការជាតិ និងអន្តរជាតិមកចូលរួមឱ្យរីកចំរើន ដោយផ្តោតសំខាន់លើកស្ទួយជីវភាពរបស់ប្រជាពលរដ្ឋទាំងមូលឱ្យកាន់តែមានភាពល្អប្រសើរ ។
គួររំលឹកថា ប្រជាពលរដ្ឋដែលរស់នៅខេត្តបាត់ដំបង មានចំណាប់អារម្មណ៍ ៣៧ឆ្នាំ នៅក្នុងខេត្តបាត់ដំបង គឺមានការ ខុសប្លែកច្រើណាស់ ដែលមានប្រព័ន្ធផ្លូវក្រាលកៅស៊ូស្ទើរគ្រប់កន្លែង មានប្រព័ន្ធធារាសាស្ត្រសម្រាប់ជួយផ្តល់ទឹកបន្ថែមដល់ កសិករក្នុងការធ្វើស្រែបន្ថែមគ្រប់រដូវ ។ វិស័យសេដ្ឋកិច្ចកំពុងមានការចាប់អារម្មណ៍ខ្លាំងពីបណ្តាអ្នកវិនិយោគទុនពីបរទេស វិស័យទេសចរណ៍មានការកើនឡើងទាំងភ្ញៀវជាតិ និងអន្តរជាតិ សន្តិសុខសណ្តាប់ធ្នាប់ អាចធានាបានចំពោះមហាជនទូទៅ ។
ក្រោយមក លោកក៏បានសំណូមពរឱ្យថ្នាក់ដឹកនាំរួមគ្នាជួយថែរក្សាបន្តទៀត ដើម្បីក្តីសប្បាយរីករាយសុខក្សេមក្សាន្ត ដល់មហាជន ដែលកំពុងកើតមាននៅទីនេះ និងក្នុងប្រទេសកម្ពុជាទាំងមូលផងដែរ ៕
ដោយ ៖ សារ៉េត
