(ខេត្តកំពត)៖ លោក ជាវ តាយ អភិបាលនៃ គណៈអភិបាលខេត្តកំពត បានអំពាវនាវដល់សមាជិកសមាជិកាសហភាពសហព័ន្ធយុវជនកម្ពុជា(ស.ស.យ.ក)ខេត្តកំពតទាំងអស់បន្តអភិវឌ្ឍសមត្ថភាពរបស់ខ្លួនឲ្យកាន់តែពូកែរួមមានទាំង(ចំណេះដឹង ចំណេះធ្វើ និងឥរិយាបថល្អ)បន្ថែមទៀត។
លោកអភិបាលខេត្តកំពត អំពាវនាវបែបនេះនៅក្នុងឱកាសដែល(ស.ស.យ.ក)ខេត្តកំពតបានប្រារព្ធនៃពិធីអបអរខួបលើកទី៤១ឆ្នាំ របស់ សហភាព សហព័ន្ធយុវជនកម្ពុជា ដោយពិធីនេះក៏មានការអញ្ជើញចូលរួមជាអធិបតីផងដែរពីសំណាក់ឯកលោក ជឹង ផល្លាប្រធានក្រុមប្រឹក្សាខេត្ត និងសមាជិក សមាជិកា(ស.ស.យ.ក) ថ្នាក់ដឹកនាំមន្ទីរអង្គភាពជុំវិញខេត្ត ក្រុង ស្រុកទូទាំងខេត្តកំពតសរុបប្រមាណជិត១០០០នាក់ដែលពិធីនេះធ្វើឡើងកាលពីព្រឹកថ្ងៃទី៣០ ខែវិច្ឆិកាឆ្នាំ ២០១៩ នៅសាលសន្និសីទខេត្តកំពត។
លោកអភិបាលខេត្តកំពតក៏បានបន្តទៀតថា សូមឱ្យសមាជិក សមាជិកា(ស.ស.យ.ក)ទូទាំងខេត្តកំពតបន្តរួមចំណែកការពារនូវសុខសន្តិភាព ស្ថេរភាពនយោបាយ ដើម្បីរួមគ្នាសម្រេចចក្ខុវិស័យ ជាគោលដៅរបស់ប្រទេស គឺចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។ ជាមួយឱកាសនោះឯកឧត្តមអភិបាលខេត្ត ក៏បានអំពាវនាវផងដែរ ដល់ថ្នាក់ដឹកនាំខេត្ត កងកំលាំងទាំងបីប្រភេទ មន្ទីរ អង្គភាពរដ្ឋបាលក្រុង ស្រុក សប្បរសជននានាសូមបន្តជួយគាំទ្រដល់សកម្មភាពរបស់សហភាពសហព័ន្ធយុវជនកម្ពុជាដើម្បីរួមចំណែកជាមួយរាជរដ្ឋាភិបាលក្នុងការអភិវឌ្ឍប្រទេសជាតិឲ្យកាន់តែរីកចម្រើន។
លោក ជាវ តាយ ក៏បានថ្លែងអំណរគុណកោតសរសើរចំពោះកិច្ចខិតខំប្រឹងប្រែងនិងការលះបង់ទាំងស្មារតី សម្ភារៈនិងថវិកា របស់សមាជិកសមាជិកា(ស.ស.យ.ក)ខេត្តកំពតទាំងអស់ក្នុងការចូលរួមចំណែកជាមួយរាជរដ្ឋាភិបាល លើវិស័យនានាក្នុងការកាត់បន្ថយភាពក្រីក្រ លើកកម្ពស់សមត្ថភាពវិជ្ជាជីវៈ ការបណ្ដុះបណ្ដាលយ៉ាងសកម្ម ចូលរួមកំណែទម្រង់រដ្ឋបាលសាធារណៈ ស្របតាមយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាលកម្ពុជាដែលមានសម្ដេចតេជោ ហ៊ុន សែនជាប្រមុខដឹកនាំដ៏ឈ្លាសវៃ។
ក្នុងឱកាសនោះលោកអភិបាលខេត្តក៏បានស្នើដល់សមាជិកសមាជិកាអង្គវិធីទាំងមូលសូមលំឱនកាយគោរពដួងវិញ្ញាណក្ខ័ន្ធរបស់បុព្វការីជន វីរៈយុទ្ធជន យុទ្ធនារី និងអ្នកស្នេហាជាតិដ៏ច្រើនឥតគណនានៅគ្រប់ជំនាន់ដែលបានធ្វើពលិកម្មយ៉ាងអង់អាចបំផុត ដើម្បីឯករាជ្យ សេរីភាព សន្តិភាពប្រជាធិបតេយ្យ បូរណភាពទឹកដីនិងសុភមង្គលរបស់មាតុភូមិ និងប្រជាជន។
លោកអភិបាលខេត្តក៏បានចាត់ទុកព្រឹត្តិការណ៍ថ្ងៃអបអរខួប៤១ឆ្នាំនៃថ្ងៃកំណើតសហភាពសហព័ន្ធយុវជនកម្ពុជា ដែលបានប្រារព្ធធ្វើឡើងនាថ្ងៃនេះនៅទូទាំង ២៥រាជធានី ខេត្ត និយាយរួមនិងនិយាយដោយឡែកសម្រាប់យុវជននៅខេត្តកំពតបានឆ្ឆុះបញ្ចាំងឲ្យឃើញថា យុវជនយើងបានយល់កាន់តែច្បាស់ ពីប្រវត្តិ បុព្វហេតុ និងពលិកម្មរបស់អតីតយុវជន នឹងការលះបង់ពុះពាររបស់សមាជិក សមាជិកាសហភាពសហព័ន្ធយុវជនកម្ពុជាគ្រប់ជំនាន់ដែលបានចូលរួមចំណែកក្នុងបុព្វហេតុសង្គមជាតិនិង យុវជនកម្ពុជា៕ សេង ណារិទ្ធ
