(ខេត្តកំពត)៖ នៅព្រឹកថ្ងៃសៅរ៍១២កើត ខែអាសាឍ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៣ ខែកក្កដា ឆ្នាំ២០១៩ លោក នៃ គង់ អភិបាលរងខេត្តកំពត និងជាអនុប្រធានក្រុមការងារចុះជួយក្រុងកំពត តំណាងលោក សោម ចិន អ្នកតំណាងរាស្ត្រមណ្ឌលកំពត និងជាប្រធានក្រុមការងារចុះជួយក្រុងកំពតព្រមនិងសហការី បាននាំយកនូវទេយ្យវត្ថុ និងទៀនព្រះវស្សាដែលជាសទ្ធាជ្រះថ្លាផ្ដល់ដោយលោក សោម ចិន ដើម្បីប្រគេនដល់ព្រះសង្ឃគង់ចាំព្រះវស្សា និមន្តមកពីវត្តចំនួន៧ក្នុងក្រុងកំពតខេត្តកំពត។
ពិធីប្រគេនបានធ្វើឡើងនៅវត្តអណ្ដូងព្រេងសង្កាត់អណ្ដូងខ្មែរក្រុងកំពតនិងមានការចូលរួមផងដែរពីអាជ្ញាធរប្រជាពុទ្ធបរិស័ទប្រកបដោយសទ្ធាជ្រះថ្លា។
មានប្រសាសន៍សំណេះសំណាល លោកនៃ គង់បានពាំនាំការផ្ដាំផ្ញើសួរសុខទុក្ខរបស់លោក សោម ចិន និងបានថ្លែងការកោតសរសើរចំពោះ រដ្ឋបាលក្រុងកំពតនិងសហការីរួមពុទ្ធបរិស័ទសប្បុរសជន ដែលបានរួមគ្នាផ្ដើមធ្វើនូវកម្មពិធីនាពេលនេះដោយចាត់ទុកគឺជាបុណ្យកុសលដែលពុទ្ធបរិស័ទខែ្មរយើងតែងមានជំនឿនិងធ្វើទៅតាមទំនៀមទម្លាប់ប្រពៃណីនៃព្រះពុទ្ធសាសនាដែលជាសាសនារបស់រដ្ឋដ៏រុងរឿងនៃយើង ដែលត្រូវរៀបចំឡើងជារៀងរាល់ឆ្នាំពុំដែលអាក់ខានសំដៅជួយផ្គត់ផ្គង់សម្រាលការលំបាកដល់ជីវភាពរបស់ព្រះសង្ឃដែលគង់ចាំព្រះវស្សាក្នុងរយៈពេល៣ខែតាមពុទ្ធបញ្ញត្តិ។
លោកអភិបាលរងខេត្តក៏បានបន្តលើកឡើងទៀតថាបច្ចុប្បន្នព្រះរាជាណាចក្រកម្ពុជាយើងក្រោមការដឹកនាំលើផ្លូវត្រូវប្រកបដោយគតិបណ្ឌិតរបស់សម្ដេច តេជោ ហ៊ុនសែន វិស័យពុទ្ធចក្រនិងអាណាចក្រមានការរីកចម្រើនគួរអោយកត់សម្គាល់។ ហើយវិស័យអាណាចក្រ អាណាចក្ររុងរឿងទៅបានក៏ដោយសារផ្ដើមចេញពីស្រុកទេសយើងមានសុខសន្តិភាពពេញបរិបូរណ៍ ទើបមានសិទ្ធសេរីភាពនិងមានការអភិវឌ្ឍរីកចម្រើនដូចសព្វថ្ងៃនេះ។
ដូច្នេះសូមឲ្យប្រជាពលរដ្ឋទូទៅគ្រប់រូបត្រូវបន្តរួបរួមសាមគ្គីគ្នាធ្លុងមួយនិងត្រូវតែមានជំនឿជឿជាក់លើរាជរដ្ឋាភិបាលក្រោមការដឹកនាំរបស់សម្ដេចតេជោ ហ៊ុន សែនជានាយករដ្ឋមន្ត្រី ដើម្បីថែរក្សាការពារសុខសន្តិភាព និងលទ្ធិប្រជាធិបតេយ្យនៅកម្ពុជាឲ្យបានកាន់តែរឹងមាំថែមទៀត។
ទេយ្យវត្ថុនិងទៀនព្រះវស្សាដែលបានប្រគេនសម្រាប់ព្រះសង្ឃ ទាំង០៧វត្តនាឱកាសនោះក្នុងមួយវត្តមានទៀនព្រះវស្សា១គូរ អង្ករ៥០គីឡូ សាដក១ទឹកក្រូច១កេះ ទឹកសុទ្ធ១កេះមី១កេះរួមនិងគ្រឿងឧបភោគបរិភោគមួយចំនួនទៀតនិង បច្ច័យចំនួន៨៥ម៉ឺនរៀលក្នុងនោះមានបច្ច័យឯកឧត្តមសោម ចិនទាំង៧វត្តក្នុងមួយវត្តបច្ច័យ២០ម៉ឺនរៀលនិងបានប្រគេនស៉ីម៉ង់ត៍ចំនួន៥តោនដែលជាអំណោយលោក សោម ចិន ជូនដល់វត្តអណ្ដូងព្រេងដើម្បីកសាងនូវសមិទ្ធផលក្នុងវត្តបន្តទៀតផងដែរ៕ សេង ណារិទ្ធ
