ខេត្តបន្ទាយមានជ័យ៖ឯកឧត្ដម ឌិត ទីណា រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ និងជាប្រធានក្រុមការងារ រាជរដ្ឋាភិបាលចុះមូលដ្ឋានខេត្តបន្ទាយមានជ័យ បានអញ្ជើញជាអធិបតីភាព ក្នុងកិច្ចប្រជុំបូកសរុបសកម្មភាព និងលទ្ធផលនៃការងារចុះមូលដ្ឋាន របស់ក្រុមការងារចុះមូលដ្ឋាន ប្រចាំឆ្នាំ ២០២៥ និងលើកទិសដៅអនុវត្តបន្ត២០២៦ ដោយមានការអញ្ជើញចូលរួមពីសំណាក់ ឯកឧត្តម លោកជំទាវសមាជិកព្រឹទ្ធសភា សមាជិករដ្ឋសភា ព្រមទាំងសមាជិកក្រុមការងារចុះមូលដ្ឋានស្រុក ក្រុង ឃុំសង្កាត់ ទូទាំងខេត្ត។
ឯកឧត្តម អ៊ុំរាត្រី អភិបាលខេត្តបន្ទាយមានជ័យបានមានប្រសាសន៍ថា ការផ្តល់សេវាជូនប្រជាពលរដ្ឋតាមយន្តការច្រកចេញចូលតែមួយ ក្រុមការងាររាជរដ្ឋាភិបាល បានយកចិត្តទុកដាក់និងជំរុញ ដល់រដ្ឋបាលថ្នាក់ក្រោមជាតិ រួមមានរដ្ឋបាលខេត្ត ស្រុក ក្រុង ឃុំ សង្កាត់ ឲ្យយកចិត្តទុកដាក់គិតគូរលើការផ្ដល់សេវាជូនដល់បងប្អូនប្រជាពលរដ្ឋឲ្យបានឆាប់រហ័ស មានគុណភាព និងមានប្រសិទ្ធភាពខ្ពស់ ក្នុងនោះនៅថ្នាក់ខេត្តមាន អង្គភាពច្រកចេញចូលតែមួយ ខេត្តផ្តល់សេវាបានចំនួន៧៣.៩១៤ សេវា នៅថ្នាក់ក្រុង ស្រុកមានការិយាល័យច្រកចេញចូលតែមួយ ផ្តល់សេវាបានចំនួន ១៩៧.៦១៨សេវា នៅថ្នាក់ ឃុំសង្កាត់ មានការិយាល័យច្រកចេញចូលតែមួយ ផ្តល់សេវាបានចំនួន ១១៨.១៥៣សេវា។
ឯកឧត្ដ ឌិត ទីណា ប្រធានក្រុមការងាររាជរដ្ឋាភិបាល ចុះមូលដ្ឋានខេត្ត បានបន្តគាំទ្រដល់ការផ្តល់សេវាតម្រូវការរបស់ប្រជាពលរដ្ឋនៅគ្រប់មូលដ្ឋានស្រុកក្រុងទាំង ៩នឹងបន្ត ផ្តល់លទ្ធភាព ដល់រដ្ឋបាលឃុំសង្កាត់ តាមរយៈការបន្ថែមបុគ្គលិកស្ម័គ្រចិត្ត ចំនួនម្នាក់ ក្នុង ១ឃុំសង្កាត់ និងរដ្ឋបាលថ្នាក់ ក្រុង ស្រុកចំនួន ២នាក់ ក្នុង ១ក្រុងស្រុក សរុបចំនួន ៨៥នាក់ ក្នុងម្នាក់ៗ ឧបត្ថម្ភថវិកា ៥០០.០០០រៀល ក្នុងមួយខែ ដើម្បីពន្លឿន ការផ្តល់សេវាអត្រានុកូលដ្ឋាន ទៅតាមប៉ុស្តិ៍នគរបាលរដ្ឋបាលឃុំ សង្កាត់ដែលមានចម្ងាយឆ្ងាយ ពីអធិការដ្ឋានលើសពី ១០គីឡូម៉ែត្រ មានចំនួន ៣៥ បុស្តិ៍ គឺ ឯកឧត្ដម បានឧបត្ថម្ភនៅក្នុងមួយប៉ុស្តិ៍ ថវិកាចំនួន ៣០ ម៉ឺនរៀល ក្នុងមួយខែ ដើម្បីពន្លឿនការផ្តល់សេវា តម្រូវការជូនដល់បងប្អូនប្រជាពលរដ្ឋ ដូចជាសៀវភៅគ្រួសារ សៀវភៅស្នាក់នៅ និងអត្តសញ្ញាណប័ណ្ណសញ្ជាតិខ្មែរ ជូនបងប្អូនប្រជាពលរដ្ឋ ក្នុងគោលបំណងធ្វើយ៉ាងណា បន្ទាយមានជ័យជាខេត្តផ្ដល់សេវាល្អជាងគេ។ បន្ទាប់ពីឯកឧត្តមលោកជំទាវបានឡើងធ្វើបទបង្ហាញអន្តរាគមន៍ ស្ដីពីលទ្ធផលការងាររបស់រាជរដ្ឋាភិបាលចុះមូលដ្ឋានខេត្ត ស្រុក ក្រុង ឃុំសង្កាត់ឆ្នាំ២០២៥កន្លងមក និង ប្តេជ្ញាអនុវត្តបន្តនៅឆ្នាំបន្ទាប់ ។
ឯកឧត្ដម ឌិត ទីណា បានមានប្រសាសន៍កោតសរសើរដោយស្មោះ ចំពោះស្មារតីយកចិត្តទុកដាក់ ចំពោះ ឯកឧត្តមលោកជំទាវ អស់លោក លោកស្រីដែលបាន ខិតខំបំពេញការងារភារកិច្ចជូនបងប្អូនប្រជាពលរដ្ឋឲ្យបានល្អពិសេសសេវា សាធារណៈដើម្បីដោះស្រាយឆ្លើយតប បញ្ហាប្រឈមនិងសំណូមពរ និងកង្វល់របស់ប្រជាពលរដ្ឋសំខាន់ គឺស្មារតី សាមគ្គីភាពរួមសុខរួមទុក្ខជាមួយបងប្អូនប្រជាពលរដ្ឋ។
ឯកឧត្ដម ឌិតទីណា បានបន្តថា តាមរយៈលទ្ធផល បានកត់សម្គាល់ឃើញថា ក្រុមការងារបានបន្តកិច្ចខិតខំជំរុញលើកទឹកចិត្តពីគ្រប់រូបភាព ក្នុងគោលដៅរួមគ្នាដោយធានាបាននូវសុខុមាលភាពរបស់ប្រជាពលរដ្ឋ រក្សាបាននូវលំនឹងសេដ្ឋកិច្ចជីវភាពរស់នៅប្រចាំថ្ងៃ ហើយជាងនេះទៀតសោត បានអនុវត្តវិធីសាស្ត្រប្រើប្រាស់កម្លាំងសរុបមធ្យោបាយសរុប វិធានការសរុប ជាក់ស្ដែង ដោះស្រាយរាល់ការលំបាក របស់បងប្អូនប្រជាពលរដ្ឋ ដោះស្រាយបញ្ហាប្រឈម ក្នុងគ្រាអាសន្ន ជម្លោះព្រំដែន ដែលជាការរំលោភបំពាន ទាំងកម្រោលពីសំណាក់ កងទ័ពថៃ។ ហើយក៏សូមជូនពរ និងអរគុណក្រៃលែងចំពោះ វីរៈកងទ័ព និងកងកម្លាំងប្រដាប់អាវុធកម្ពុជា គ្រប់ប្រភេទដែលបាននិងកំពុងឈរជើង យ៉ាងរឹងមាំដ៏អង់អាចក្លាហានមោះមុត លើការការពារបូរណភាពទឹកដី នៃដែនអធិបតេយ្យភាពរបស់កម្ពុជាបាន ហ្មត់គត់ មកទល់ពេលនេះ៕
