សម្ដេចមហាបវរធិបតី ហ៊ុន ម៉ាណែត នាយករដ្ឋមន្រី្តនៃព្រះរាជាណាចក្រកម្ពុជា បានផ្ដល់អនុសាសន៍ណែនាំដ៏ខ្ពង់ខ្ពស់ថា “បើចង់ឲ្យសិស្សទៅរៀនទាន់ម៉ោង លោកគ្រូ អ្នកគ្រូ ត្រូវទៅមុនម៉ោង! វិន័យជារឿងសំខាន់!”

នេះជាការរំលឹកឡើងវិញរបស់ឯកឧត្តម ពេជ សោភ័ន ទេសរដ្ឋមន្រ្តីទទួលបន្ទុកបេសកកម្មពិសេស និងជាប្រធានលេខាធិការដ្ឋាន គ.វ.អ. ថ្លែងក្នុងកិច្ចប្រជុំឆ្លុះបញ្ចាំង និងចែករំលែកបទពិសោធនៃឧត្តមានុវត្តន៍ដល់គណៈគ្រប់គ្រងសាលា និងគ្រូបង្រៀននៅតាមសាលារៀនគោលដៅ គ.វ.អ. តំបន់៣ និងតំបន់៤ ចំនួន ២៦សាលា ក្នុងខេត្តចំនួន ៤ (ខេត្តបន្ទាយមានជ័យ, បាត់ដំបង, ប៉ៃលិន និងខេត្តសៀមរាប) នាព្រឹកថ្ងៃសៅរ៍ ៤រោច ខែជេស្ឋ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី១៤ ខែមិថុនា ឆ្នាំ២០២៥ នៅសាលប្រជុំសាលាខេត្តបន្ទាយមានជ័យ។ ក្នុងពិធីនេះមានការអញ្ជើញចូលរួមពីថ្នាក់ដឹកនាំលេខាធិការដ្ឋាន គ.វ.អ. ឯកឧត្តមប្រតិភូសាលាផ្ការីក មន្ទីរជំនាញពាក់ព័ន្ធ អភិបាលក្រុងសិរីសោភ័ណ ស្រុកមង្គលបូរី ស្រុកព្រះនេតព្រះ ការិយាល័យអប់រំ យុវជន និងកីឡាក្រុង ស្រុក អាជ្ញាធរមូលដ្ឋានពាក់ព័ន្ធ ព្រមទាំងគ្រូបង្គោលប្រចាំតំបន់៣ តំបន់៤ គ្រូបង្គោលប្រចាំខេត្ត នាយក នាយករង លោកគ្រូ អ្នកគ្រូ គ.គ.ស. គ.គ.ថ. មាតាបិតា អាណាព្យាបាល និងសិស្សានុសិស្សនៃសាលារៀនគោលដៅ គ.វ.អ. ទាំង៤ខេត្តផងដែរ។