ខេត្តកំពង់ឆ្នាំង៖ កម្លាំងនគរបាលការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តកំពង់ឆ្នាំងបានចាប់ខ្លួនបុរសម្នាក់ នៅព្រឹកថ្ងៃទី២០ ខែមីនា ឆ្នាំ២០២៥ ពីបទចាប់រំលោភ និងគំរាមសម្លាប់ក្មេងស្រីម្នាក់អាយុ ១៤ឆ្នាំ ដែលជាឈ្នួលបម្រើ។
ជនសង្ស័យមាន ឈ្មោះ ប៉ាង គឹមចាន់ អាយុ ៤០ឆ្នាំ រស់នៅភូមិកំពង់ប្រាសាទ ឃុំសែប ស្រុកកំពង់ត្រឡាច ខេត្តកំពង់ឆ្នាំងត្រូវកម្លាំងនគរបាលចាប់ខ្លួន ដោយអនុវត្តតាមដីការ របស់សាលាដំបូងខេត្តកពង់ឆ្នាំង ពីបទរំលោភ សេពសន្ថវៈ បង្ខាំមនុស្សខុសច្បាប់ និងគំរាមសម្លាប់ កាលពីថ្ងៃទី២៥ ខែតុលា ឆ្នាំ២០២៤ នៅភូមិកំពង់ប្រាសាទ ឃុំសែប ស្រុកកំពង់ត្រឡាច ខេត្តកំពង់ឆ្នាំង។
នៅក្នុងពាក្យបណ្តឹងក្មេងស្រីរងគ្រោះ បានឱ្យដឹងថា ក្មេងស្រីរងគ្រោះជាអ្នកបម្រើការងារនៅផ្ទះរបស់ជនសង្ស័យ ។ ធ្វើការបានរយៈពេលកន្លះខែឈ្មោះ ប៉ាង គឹមចាន់ បានដូរឱ្យក្មេងស្រីរងគ្រោះទៅជួយលក់កាហ្វេគាត់នៅតូប មួយទៀត។ ក្រោយមកក៏បានដកក្មេងស្រីរងគ្រោះ មកឱ្យជួយលក់ភីហ្សានៅផ្ទះស្ថិតនៅភូមិកំពង់ប្រាសាទវិញ។
នៅថ្ងៃទី២៥ ខែតុលា ឆ្នាំ២០២៤ នៅវេលា ម៉ោង ៤ទៀបភ្លឺ ខណៈក្មេងស្រីរងគ្រោះកំពុងតែដេកនៅលើគ្រែក្រៅបន្ទប់ក្នុងផ្ទះ ក៏ស្រាប់តែជនសង្ស័យជាម្ចាស់ផ្ទះ បានចេញមកចរចាឱ្យកុមារីរងគ្រោះ ចំនួន ១០០ដុល្លារ ជាថ្នូរនឹងការំលោភ តែនាងមិនព្រម ទើបជនសង្ស័យចាប់រំលោភរហូតបានសម្រេច។ ពេលរំលោភរួច ជនសង្ស័យបាននិយាយថា កុំនិយាយប្រាប់គេ បើក្មួយមិននិយាយក៏អត់មានអ្នកណាដឹងឡើយ។ តែបើហ៊ាននិយាយ ពូនឹងសម្លាប់ចោល។ រយៈពេល ៥ថ្ងៃក្រោយជនសង្ស័យ ក៏បានរំលោភកុមារីរងគ្រោះលើកទី២ ហើយនិយាយគំរាមដូចលើកមុនដដែរ។ លុះព្រឹកឡើងពេលក្មេងស្រី កំពុងអង្គុយលាងចាន និងកែវ ពេលនោះស្រាប់តែជនសង្ស័យ បានយកលុយមកបោះឱ្យ ក្មេងស្រីរងគ្រោះចំនួន ២០ម៉ឺនរៀល មួយសន្ទុះក្រោយមកប្រពន្ធរបស់ជនសង្ស័យបាត់លុយ ២០ម៉ឺនរៀល ទើបបែករឿងប្តីចាប់រំលោភកូនឈ្នួល។
នៅពេលដែលបានដឹងហើយ, ប្រពន្ធជនសង្ស័យក៏បានហាមជនរងគ្រោះមិនឱ្យនិយាយប្រាប់អ្នកណាឡើយ។ ចំណែកលុយចំនួន២០ម៉ឺនរៀលនោះ ប្រពន្ធជនសង្ស័យ បានដកហូតទៅវិញបាត់ទៅ។ ដោយខ្លាចការគំរាមកំហែង ពីជនខាងលើ កុមារីរងគ្រោះស៊ូទ្រាំបន្តធ្វើការងាររហូតគ្រប់មួយខែ ដើម្បីសុំបើកលុយ។
លុះរហូតដល់ថ្ងៃបើកប្រាក់ខែ គឺថ្ងៃទី៧ ខែវិច្ឆិកា ឆ្នាំ២០២៤ ទើបកុមារីប្រាប់ថៅកែថា សុំឈប់ធ្វើការហើយ។ ពេលមកដល់ផ្ទះ ក៏និយាយពីដំណើររឿងប្រាប់ម្តាយ ហើយម្តាយក៏បានដាក់ពាក្យបណ្តឹងតែម្តង៕
