(ខេត្តកំពត)៖ រដ្ឋបាលខេត្តកំពត បានឲ្យដឹងថា នៅព្រឹកថ្ងៃសុក្រ ៦កើត ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១១ ខែមករា ឆ្នាំ២០១៩ លោក ជាវ តាយ អភិបាល នៃគណៈអភិបាលខេត្ត បានអញ្ជើញជាគណៈអធិបតីភាព ក្នុងកិច្ចប្រជុំដោះស្រាយវិវាទដីធ្លីរវាងកងពលលេខ១១ និងប្រជាពលរដ្ឋ ស្ថិតនៅភូមិព្រៃខ្មៅ ឃុំស្រែក្នុង ស្រុកជុំគីរី ខេត្តកំពត។
សមាសភាពចូលរួម មានលោកអភិបាលរងខេត្ត មេការបញ្ជាការរងកងពលលេខ ១១ កងកម្លាំងទាំង ៣ អង្គភាព សមាជិកគណៈកម្មាធិការគ្រប់គ្រងដីរដ្ឋថ្នាក់ខេត្ត រដ្ឋបាលស្រុកជុំគីរី និងប្រជាពលរដ្ឋមានទំនាស់ដីធ្លី សរុប ចំនួន៦១នាក់។
ជាលទ្ធផល លោកជាវ តាយ មានប្រសាសន៍ថា លោកនឹងរៀបចំកិច្ចប្រជុំគណ:កម្មការ ដើម្បីដោះស្រាយជូន តាមគោលការណ៍ឈ្នះ ឈ្នះ ក្នុងពេលឆាប់ៗខាងមុខនេះ។
ជាមួយនឹងករណីវិវាទដីធ្លីស្ថិតក្នុងភូមិសាស្ត្រខាងលើ តាមសំដីប្រជាពលរដ្ឋទាំង៦១នាក់ បានបញ្ជាក់អះអាងថា ដីដែលក្រុមទាហាមកឈូសឆាយគឺជាដីដែលសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើចំណារសម្រាប់ផ្តល់ជូនពួកគាត់តាំងពីឆ្នាំ២០០៦មកម្លេះ ហើយបានរាំុរ៉ៃគឺឆ្លងកាត់ការគ្រប់គ្រងពីសំណាក់លោកអភិបាលខេត្តពីរជំនាន់មកហើយ។ ដោយឡែកបើតាមការលើកឡើងរបស់កងពលលេខ ១១បានអះអាងថា ការឈូសឆាយដីនេះជាគោលការណ៍របស់រដ្ឋបាលខេត្តកំពត ទើបពួកគេហ៊ានឈូសឆាយដោយគ្មានខ្លាចក្រែងបែបនេះ។
សូមបញ្ជាក់ថា៖ បើយោងតាមប្រសាសន៍របស់អាជ្ញាធរគ្រប់ស្រទាប់ គឺរដ្ឋបាលខេត្តកំពត ពុំបានបញ្ជាឲ្យក្រុមហ៊ុន ឬបុគ្គលណាម្នាក់ ទៅឈូសឆាយដីរបស់ប្រជាពលរដ្ឋស្ថិតនៅតំបន់ខាងលើនេះឡើយ៕
សេង ណារិទ្ធ
