(ខេត្តកែប)៖ នៅព្រឹកថ្ងៃសុក្រ៦រោច ខែមិគសិរ ឆ្នាំច សំរឺទ្ធិស័ក ព.ស២៥៦២ ត្រូវនឹងថ្ងៃទី២៨ខែធ្នូ ឆ្នាំ២០១៨ រដ្ឋបាលខេត្តកែប បានបើកកិច្ចប្រជុំសាមញ្ញលើកទី៥៥របស់ក្រុមប្រឹក្សាខេត្ត អាណត្តិទី២ ក្រោមអធិបតីភាព លោក សំ សារីន ប្រធានក្រុមប្រឹក្សាខេត្ត និងលោក កែន សត្ថា អភិបាល នៃគណៈអភិបាលខេត្តកែប។កិច្ចប្រជុំនេះក៏មានការចូលរួមពីសំណាក់អស់លោក លោកស្រី ជាអភិបាលរងខេត្ត នាយកទីចាត់ការរដ្ឋបាលខេត្ត លោកប្រធាន អនុប្រធានមន្ទីរអង្គភាពជំនាញទូទាំងខេត្តនិងអភិបាលក្រុង ស្រុកផងដែរ។
របៀបវារៈ នៃកិច្ចប្រជុំរួមមាន៖
១/-ពុនិត្យ និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី៥៤របស់ក្រុមប្រឹក្សាខេត្តអាណតិ្តទី២ កាលពីថ្ងៃសុក្រ ៨រោច ខែកក្តិក ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៣០ខែវិច្ឆិកា ឆ្នាំ២០១៨។
២/-សេចក្តីព្រាងរបាយការណ៍ ស្តីពីសកម្មភាពសំខាន់ៗ ដែលបានអនុវត្តន៍ដោយគណៈអភិបាលខេត្តក្នុងចន្លោះកិច្ចប្រជុំសាមញ្ញលើកទី៥៤ ដល់កិច្ចប្រជុំសាមញ្ញលើកទី៥៥របស់រដ្ឋបាលខេត្ត។
៣/-ពិនិត្យ និងអនុម័តលើសេចក្តីព្រាងរបាយការណ៍បូកសរុបលទ្ធផលការងារប្រចាំខែវិច្ឆិកា ឆ្នាំ២០១៨ និងលើកទិសដៅអនុវត្តន៍ខែបន្ទាប់ របស់រដ្ឋបាលខេត្ត។
៤/-ពិនិត្យ និងអនុម័តលើផែនការយុទ្ធសាស្ត្រថវិកា(BSP)សម្រាប់ឆ្នាំ២០១៩-២០២១ និងគម្រោងផែនការចំណូល ចំណាយថវិកាឆ្នាំ២០១៩ របស់រដ្ឋបាលខេត្តកែប។
ក្នុងកិច្ចប្រជុំនេះ លោក កែន សត្ថា អភិបាលខេត្តកែប ក៏បានថ្លែងការកោតសរសើរ ចំពោះការខិតខំប្រឹងប្រែងរបស់លោក លោកស្រី ក្នុងជួរគណៈអភិបាលខេត្ត មន្ទីរអង្គភាពនានា អភិបាលក្រុង ស្រុក ដោយកន្លងមកក៏ដូចពេលបច្ចុប្បន្នបានពុះពារអនុវត្តការងារទទួលបានប្រសិទ្ធភាព ថែមទាំងបានជួយលើកតម្កើងមុខមាត់ខេត្តទេសចរណ៍របស់យើងឱ្យកាន់តែស្រស់បំព្រង និងរីកចម្រើនជាលំដាប់។
ជាមួយគ្នានេះ ក្នុងឱកាសឆ្លងឆ្នាំសកល២០១៨ចូល២០១៩នេះ លោកអភិបាលខេត្ត បានជំរុញដល់មន្ទីរ អង្គភាពនានាត្រូវចូលរួមនិងអនុវត្តការងារឱ្យបានកាន់តែអធិកអធម ដើម្បីញ៉ាំងពិធីនេះឱ្យមានភាពសប្បាយរីករាយលើសឆ្នាំមុនៗ៕
សេង ណារិទ្ធ
