(បាត់ដំបង)៖ នាព្រឹកថ្ងៃទី២១ ខែមករា ឆ្នាំ២០២៥ ឯកឧត្តម សុខ លូ ប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង និងលោកស្រី ម៉េត រ៉ាវិចិត្រ សុខ លូ អនុប្រធានកិត្តិយសសាខាកាកបាទក្រហមកម្ពុជា ខេត្តបាត់ដំបង និងសហការី បានចុះប្រគល់សំណង់អនាម័យទឹកស្អាត ជាអំណោយសាខាកាកបាទក្រហមកម្ពុជាខេត្តបាត់ដំបង រួមមាន៖ អណ្តូងស្នប់១ កន្លែង ស្ថានីយ៍លាងដៃ ១កន្លែង បង្គន់អនាម័យថ្មី ១ខ្នង ២បន្ទប់ ជូនលោកគ្រូ អ្នកគ្រូ សិស្សានុសិស្ស ក្នុងសាលាសហគមន៍អូរច្រកថ្លាង និងផ្តល់អំណោយមនុស្សធម៌ដល់ប្រជាពលរដ្ឋងាយរងគ្រោះ ១០០គ្រួសា នៅឃុំព្រៃត្រឡាច ស្រុករយក្ខគីរី ខេត្តបាត់ដំបង។
ពិធីនេះ មានការចូលរួមពី លោក លោកស្រី អនុប្រធានសាខា សមាជិក សមាជិកាគណ:កម្មាធិការសាខា អនុសាខាស្រុក យុវជនអ្នកស្ម័គ្រចិត្តកាកបាទក្រហមកម្ពុជា លោកនាយកសាលារៀន លោកគ្រូ អ្នកគ្រូ សិស្សានុសិស្ស និងប្រជាពលរដ្ឋងាយរងគ្រោះសរុបប្រមាណ ៣៥០នាក់ ។
លោកស្រី ប៉ិច បូឡែន អភិបាលស្រុក និងជាប្រធានអនុសាខាស្រុករុក្ខគីរី បានឲ្យដឹងថា សាលាសហគមន៍អូរច្រកថ្លាងនេះ ជាសាលាឧបសម្ព័ន្ធរបស់សាលាបឋមសិក្សា ហើយពីមុនគឺសិស្សសិក្សាក្រោមសំយាបផ្ទះ របស់អ្នកស្រុកដោយមើលឃើញពីកំណើនសិស្ស មានការកើនឡើង អាជ្ញាធរមូលដ្ឋាន និងអង្គការទស្សនៈពិភពលោកបានសម្រេចរកទីតាំងជើងភ្នំរូង បានកសាងសាលារៀនមួយខ្នងធ្វើអំពីឈើ ប្រក់ស័ង្កសីមានទំហំ ៦ម×៨ម ក្រោយមកដល់មើលឃើញការលំបាកអង្គការខេន និងអង្គការឆែលហ្វាន់អេឌូអូបានសាងសង់អគារមួយខ្នងទៀតមានពីរបន្ទប់ នៅក្នុងឆ្នាំ២០១៧។
បច្ចុប្បន្នសាលាសហគមន៍អូរច្រកថ្លាង មានអគារសិក្សាចំនួន៣ខ្នង មាន៤ បន្ទប់មានសិស្សានុសិស្ស ៦៥នាក់ស្រី ៣១ នាក់ មត្តេយ្យសិក្សាមានចំនួន ៣១ នាក់ស្រី ១៤ នាក់មានគ្រូ៤នាក់ស្រី៤នាក់។
ថ្លែងក្នុងឱកាសនេះដែរ ឯកឧត្តម សុខ លូ បានពាំនាំនូវការផ្ដាំផ្ញើសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្តេចតែងតែយកចិត្តទុកដាក់ខ្ពស់ ចំពោះសុខទុក្ខរបស់ប្រជាពលរដ្ឋរងគ្រោះ និងងាយរងគ្រោះគ្រប់រូប ដោយមិនប្រកាន់ វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ពោលគឺកាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោល។
លោកប្រធាន មានប្រសាសន៍ថា សំណង់អនាម័យទឹកស្អាតទាំងនេះ ជាអំណោយសាខាកាកបាទក្រហមកម្ពុជា ខេត្តបាត់ដំបងតាមរយៈលោកស្រី ម៉េត រ៉ាវិចិត្រ អនុប្រធានកិត្តិយសសាខាកាកបាទក្រហមកម្ពុជា ខេត្តបាត់ដំបង ជូនលោកគ្រូ អ្នកគ្រូ សិស្សានុសិស្ស ដោយផ្តោតលើ ដែលមានតម្រូវការជាអាទិភាពអំពីអនាម័យនិងទឹកស្អាត។ ការផ្តល់អណ្តូងទឹកស្អាត បង្គន់អនាម័យ និងស្ថានីយ៍លាងដៃ ទាំងនេះ ពិតជាមានសារៈសំខាន់ណាស់ សម្រាប់សិស្សានុសិស្ស លោកគ្រូ អ្នកគ្រូ ក៏ដូចជាប្រជាពលរដ្ឋ ដើម្បី ឲ្យពួកគាត់មានទឹកស្អាតប្រើប្រាស់ ហើយការលាងសម្អាតដៃក៏បានរួមចំណែកទប់ស្កាត់ការឆ្លងជម្ងឺរាតត្បាតផ្សេងៗ និង លើកកំពស់សុខភាព អនាម័យ ដល់ក្មួយៗសិស្សានុសិស្ស ផងដែរ។
ជាកិច្ចឆ្លើយតបលោកគ្រូ អ្នកគ្រូ សិស្សានុសិស្ស នៃសាលារៀនគោលដៅទាំង ៧ បានសម្តែងនូវទឹកចិត្តរំភើបបរីករាយឥតឧបមា ដោយបានទទួលនូវសំណង់អនាម័យទឹកស្អាតថ្មី ជាអំណោយសាខាកាកបាទក្រហមកម្ពុជាខេត្ត ហើយសូមប្តេជ្ញាថែរក្សាសមិទ្ធផលនេះឱ្យបានគង់វង្ស យូរអង្វែង តទៅ។
ដោយឡែកគ្រួសារងាយរងគ្រោះមានជនចាស់ជរា ជនមានពិការភាព និងគ្រួសារក្រីក្រចំនួន ១០០គ្រួសារ មកពីភូមិរូង១ ឃុំព្រៃត្រឡាច ដោយមួយគ្រួសារទទួលបានអង្ករ២៥គីឡូក្រាម មី១កេស ទឹកបរិសុទ្ធ១កេស ទឹកត្រី១យួរ ទឹកស៊ីអ៊ីវ១យួរ ផងដែរ ។ ក្នុងនោះលោកគ្រូ អ្នកគ្រូ សិស្សានុសិស្ស ក៏ទទួលបានថវិកាពីលោកប្រធាន និង លោកស្រីមួយចំនួនផងដែរ៕
