ខេត្តសៀមរាប ៖ ភាពជោគជ័យដ៏ត្រចះត្រចង់ក្នុងការដឹកនាំអង្គភាពស្នាក់ការសង្កាត់រដ្ឋបាលព្រៃឈើស្រុកសូទ្រនិគម ខេត្តសៀមរាប លោក ឡៅ សុផល នាយរងសង្កាត់រដ្ឋបាលព្រៃឈើស្រុក សូទ្រនិគម និងជាគណៈពង្រឹងបក្សរបស់គណបក្សប្រជាជនចុះជួយឃុំពពេល បានខិតខំប្រឹងប្រែងយ៉ាងយកចិត្តទុកដាក់ក្នុងការងារដឹកនាំ អង្គភាព និងផ្សារភ្ជាប់បេះដូងខ្លួនបម្រើការងារជូនប្រជាពលរដ្ឋបានយ៉ាងល្អប្រសើរបំផុត។ បន្ទាប់ពីទទួលបាននូវភាពជោគជ័យដ៏ត្រចះត្រចង់លើស្នាដៃការងារបង្កើតបានសមិទ្ធផលនានាជាច្រើនរបស់អង្គភាពស្នាក់ការរដ្ឋបាលព្រៃឈើស្រុកសូទ្រនិគម ខេត្តសៀមរាប ក្រោមការចង្អុលបង្ហាញពីលោកប្រធានមន្ទីរកសិកម្មរុក្ខាប្រម៉ាញ់ និងនេសាទ និងលោកនាយខណ្ឌរដ្ឋបាលព្រៃឈើខេត្តសៀមរាប ។
លោក ឡៅ សុផល គណៈពង្រឹងបក្សចុះជួយឃុំពពេលត្រូវបានប្រជាពលរដ្ឋគោរពកោតសរសើរចំពោះកិច្ចខិតខំប្រឹងប្រែងយកចិត្តទុកដាក់ចុះមូលដ្ឋានជួបសំណេះសំណាលជាមួយបងប្អូនប្រជាពលរដ្ឋមិនគិតពីការនឿយហត់ស្វែងយល់ពីជីវភាព និងការរស់នៅស្គាល់ទុក្ខលំបាករបស់ប្រជាពលរដ្ឋ និងដោះស្រាយរាល់បញ្ហាបានទាន់ពេលវេលា ទើបទទួលបានជោគជ័យជាបន្តបន្ទាប់ធ្វើឲបុគ្គលិកមន្ត្រីក្រោមឱវាទតែងតែគោរពស្រឡាញ់គាំទ្រលើជំហរដឹកនាំដោយមានភាពម៉ឺងម៉ាត់ចំពោះការងារភាពស្មោះត្រង់ ភាពយុត្តិធម៌ដែលមិនអាចកាត់ថ្លៃបានជាពិសេសទឹកចិត្តសប្បុរសធម៌ជួយសណ្តោសប្រោសប្រណីប្រជាពលរដ្ឋដែលកំពុងជួបទុក្ខលំបាក ។
លោក ឡៅ សុផល ដែលប្រជាពលរដ្ឋស្រឡាញ់គាំទ្រលើជំហរដឹកនាំការងារយ៉ាងមោះមុតម៉ឺងម៉ាត់ដាច់ខាត ចំពោះការអនុវត្តច្បាប់ទើបសម្រេចបានស្នាដៃដ៏ធំធេងជូនថ្នាក់ដឹកនាំក៏ដូចជា ស្ថាប័នមន្ទីរក្រសួងសាម៉ីដើម្បីរួមចំណែក ដល់រាជរដ្ឋាភិបាល ជាពិសេសបានធ្វើឱ្យប្រជាពលរដ្ឋកាន់តែមានភាពកក់ក្តៅដោយសារតែការយកចិត្តទុកដាក់ពីសំណាក់ថ្នាក់ដឹកនាំនៅក្នុងមូលដ្ឋានបានជួបជុំគ្នាសំណេះសំណាលជាប់ជាប្រចាំប្រកបដោយប្រជាប្រីយ៍ភាពរបស់លោក ឡៅ សុផល ទទួលបាននូវការជឿជាក់ពីប្រជាពលរដ្ឋធ្វើឱ្យការបោះឆ្នោតជ្រើសរើសតំណាងរាស្ត្រនីតិកាលអាណត្តិទី ៦ នាពេលថ្មីៗកន្លងទៅនេះ ទទួលបានជ័យជំនះទាំងស្រុងនៅក្នុងស្រុកសូទ្រនិគម ខេត្តសៀមរាប ។
ប្រជាពលរដ្ឋបានអះអាងថា លោក ឡៅ សុផល ពិតជាមាសសុទ្ធមិនខ្លាចភ្លើងមិនដូចជា ការចោទប្រកាន់ពីបណ្តាញព័ត៌មានមួយចំនួននោះឡើយ ដែលបានសរសេរថា លោក ឡៅ សុផល នាយរងសង្កាត់រដ្ឋបាលព្រៃឈើស្រុក សូទ្រនិគម ខេត្តសៀមរាប កំពុងរងការចោទប្រកាន់ពីអ្នកដឹកអុសធ្យូង តាមគោយន្តកន្ត្រៃថា បានគំរាមកំហែងយកថ្លៃសេវាដឹកអុសធ្យូងថ្លៃកប់ពពកពេលដឹកឆ្លងកាត់មុខស្នាក់ការរដ្ឋបាលព្រៃឈើរបស់គាត់ទាំងយប់ទាំងថ្ងៃមិនឱ្យរួចខ្លួនបានឡើយ ដែលការចោទ ប្រកាន់បែបនេះ ជារឿងមួលបង្កាច់ទាំងស្រុងពុំមែនជារឿងពិតនោះទេ ។
ចំណែកការិយាល័យនិពន្ធយើងក៏បានទទួលការបញ្ជាក់បំភ្លឺជុំវិញព័ត៌មាននេះថា លោក ឡៅ សុផល សូមបដិសេធចោលនូវរាល់ការផ្សាយរបស់បណ្តាញសង្គម និងគេហទំព័រមួយចំនួន មួលបង្កាច់បង្ខូចកិត្តិយស កេរ្តិ៍ឈ្មោះ និងសេចក្តីថ្លៃថ្នូរ គឺជាការប្រឌិតមិនសមហេតុផលទាល់តែសោះ ព្រោះលោកមិនទៅកាក់ទារលុយពីអ្នកដឹកអុសធ្យូងនោះ សូម្បីតែមួយកាក់មួយសេនក៏គ្មានដែរ។ ក្នុងនាមលោក ជាក្រុមការងារគណៈពង្រឹងបក្សនៅក្នុងមូលដ្ឋាននេះ មិនដល់ថ្នាក់ដាច់ដាបទៅយកលុយពីអ្នកដឹកអុសធ្យូងនោះទេ ផ្ទុយទៅវិញក្រុមការងាររបស់លោកតែងតែបានពាំនាំយកអំណោយដ៏ថ្លៃថ្លារបស់ថ្នាក់ដឹកនាំទៅចែកជូនពួកគាត់ទាំងពេល កន្លងមកក៏ដូចពេលបច្ចុប្បន្ននេះ និងនៅតែបន្តយកចិត្តទុកដាក់ចំពោះពួកគាត់ជាប្រជាពលរដ្ឋដែលកំពុងជួបការលំបាក ដើម្បីដោះស្រាយរំលែកបន្ទុកលំបាកនេះជាមួយនឹងរាជរដ្ឋាភិបាល ៕
ដោយ ៖ រុន សារ៉េត
