កែប ៖ ផ្លូវជាតិលេខ៣៣ក្នុងភូមិសាស្ត្រខេត្តកែប ក្រោយពីបានរងការខូចខាតជាច្រើនអន្លើដោយសារមានភ្លៀងធ្លាក់ជាប់ៗគ្នាជិត២០ថ្ងៃនេះ ត្រូវបានមន្ត្រីជំនាញនៃមន្ទីរសាធារណការនិងដឹកជញ្ជូនខេត្តកែប មានភាពមមាញឹកដើម្បីជួសជុលឡើងវិញ បើទោះជាមានភ្លៀងធ្លាក់បង្កឧបសគ្គបែបណាក៏ដោយ។
ជាទូទៅផ្លូវជាតិលេខ៣៣ចាប់ពីទីប្រជុំជនស្រុកកំពង់ត្រាច ឆ្ពោះទៅកាន់ទីរួមខេត្តកំពត មានចម្ងាយ៣៦គីឡូម៉ែត្រ ត្រូវរងការខូចខាតជាច្រើនកន្លែង ប៉ុន្តែចំណុចផ្លូវជាតិលេខ៣៣ស្ថិតក្នុងភូមិសាស្ត្រខេត្តកែបចាប់ពីចំណុចភូមិចំការចេក រហូតដល់ភូមិដំណាក់ចំបក់ សង្កាត់អូរក្រសារ ក្រុងកែប ក៏ត្រូវរងការខូចខាតមួយអន្លើ ខណៈមានភ្លៀងធ្លាក់មិនឈប់ឈរជាច្រើនថ្ងៃមកនោះ។ម្លោះហើយទើបក្រុមការងាររបស់មន្ទីរសាធារណការ និងដឹកជញ្ជូនខេត្ត បន្តជួសជុលយ៉ាងសស្រាក់សស្រាំស្ទើរកពេលសម្រាកគ្មាន។
ទន្ទឹមនឹងការងារជួសជុលខាងលើ មន្ត្រីជំនាញបានប្រាប់អ្នកយកព័ត៏មាននៅរសៀលថ្ងៃទី១១ខែសីហា ឆ្នាំ២០១៨នេះថា អំឡុងពេលប៉ុន្មានថ្ងៃនេះ ក្រុមការងារពិតជាជួបការលំបាកបន្តិចបន្តួចដោយសារមានភ្លៀងធ្លាក់មិនឈប់សោះ ប៉ុន្តែទោះជាមានឧបសគ្គបែបណាក្តី ក្រុមការងារនៅតែបន្តខិតខំពុះពារដើម្បីជួសជុលគ្មានរាថយដែរ ដើម្បីបម្រើសេវាជូនអ្នកដំណើរ។ក្រុមមន្ត្រីជំនាញបានឲ្យដឹងផងដែរថា ចំណុចផ្លូវដែលកំពុងប្រឈមខូចខាតខ្លាំងគឺនៅចំណុចខាងកើតផ្សារដំណាក់ចង្អើរ រហូតដល់មុខវិទ្យាល័យចំការដូង និងម្តុំផ្សារពងទឹក នៃភូមិសាស្ត្រស្រុកដំណាក់ចង្អើរ ក្រៅពីនោះគ្រាន់តែខូចខាតមួយអន្លើប៉ុណ្ណោះ។
សូមបញ្ជាក់ថា កាលពីពេលថ្មីៗនេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំក្រុមការងារ និងមន្ត្រីជំនាញ ចុះទៅពិនិត្យស្ថានភាពផ្លូវជាតិលេខ៣៣ ពិសេសផ្លូវក្នុងភូមិសាស្ត្រខេត្តកែប ដោយលោករដ្ឋមន្ត្រីបានជំរុញដល់មន្ត្រីជំនាញឲ្យអនុវត្ត ជួសជុលផ្លូវនេះឲ្យបានឆាប់រួចរាល់សម្រាប់បម្រើសេវាដល់អ្នកដំណើរឲ្យបានទាន់ពេលវេលា ។ ជាមួយនេះដែរ ក្រុមការងារនៃមន្ទីរជំនាញបានខិតខំអនុវត្តភារកិច្ចយ៉ាងមមាញឹកក្រោមភ្លៀងរលឹមស្រិចៗ៕
សេង ណារិទ្ធ
