(កំពត)៖ បច្ចុប្បន្នដោយសារប្រទេសជាតិមានសុខសន្តិភាពពេញលេញ គេសង្កេតឃើញវិស័យសំណង់នៅប្រទេសកម្ពុជា បាននិងកំពុងដើរតួយ៉ាងសំខាន់ ធ្វើឲ្យប្រជាពលដ្ឋដែលមានជំនាញផ្នែកសំណង់នេះ មានលទ្ធភាពរកប្រាក់ចំណូលបានយ៉ាងក្រាស់ក្រែល សម្រាប់ផ្គត់ផ្គង់ជីវភាពប្រចាំថ្ងៃបានធូរធាជាងមុន។
ទន្ទឹមនឹងវិស័យសំណង់កំពុងតែមានការជឿនលឿននេះដែរ ក្រុមហ៊ុនអេសស៊ីជី(SCG)ដែលជាពហុសាជីវកម្មឈានមុខគេមួយនៅក្នុងតំបន់អាស៊ាន បានផ្តល់នូវវគ្គបណ្តុះបណ្តាលដល់ជាងសំណង់លើការបូកស៊ីម៉ង់ត៍ និងការងារប្រក់ដំបូល ដោយការបណ្តុះបណ្តាលនេះប្រព្រឹត្តទៅនៅឯវិទ្យាស្ថានបណ្តុះបណ្តាលវិជ្ជាជីវៈចំនួនពីរ ដែលជាកិច្ចសហប្រតិបតិ្តការជាមួយនឹងវិទ្យាស្ថានពហុបច្ចេកទេសកម្ពុជា(NPIC)និងវិទ្យាស្ថានអភិវឌ្ឍន៍មុខជំនាញកម្ពុជា-ថៃ(CTSD)ដែលបានចាប់ផ្តើមវគ្គបណ្តុះបណ្តាលសម្រាប់ជាងសំណង់ ស្តីពីបច្ចេកទេសសំណង់ដែលសមស្របនិងការប្រើប្រាស់បានត្រឹមត្រូវនូវផលិតផល និងសម្ភារៈសំណង់ទំនើបថ្មីៗ។ជាមួយនេះក្រុមហ៊ុន អេសស៊ីជី មានវត្តមាននៅប្រទេសកម្ពុជាជាង២០ឆ្នាំមកហើយ ដែលរួមបញ្ចូលក្រុមហ៊ុនចំនួន៦ គឺក្រុមហ៊ុនកំពតស៊ីម៉ង់ត៍ ក្រុមហ៊ុន អេសស៊ីជី ខនគ្រីត រូហ្វ ក្រុមហ៊ុន ស៊ីផេក ខេមបូឌា ក្រុមហ៊ុន ស៊ីផេក Plank ខេមបូឌា ក្រុមហ៊ុន ណារ៉ា-ខេម និងក្រុមហ៊ុន អេសស៊ីជី ត្រេឌីង(ខេមបូឌា) ឌី។
ជាមួយនេះនៅរសៀលថ្ងៃទី២២ខែកក្កដា ឆ្នាំ២០១៨ ក្រុមហ៊ុន អេសស៊ីជីបានរៀបចំការប្រកួតប្រជែងលើការបូកស៊ីម៉ង់ត៍ជញ្ជាំង នៅឯក្រុមហ៊ុន K.Cement (កំពតស៊ីម៉ង់ត៍) ក្នុងខេត្តកំពតដែលមានជាងសំណង់ចូលរួមប្រកួតប្រជែងចំនួន១៦នាក់ ចែកជា៨ក្រុម មកពីខេត្តកំពតនិងខេត្តតាកែវ ដើម្បីជ្រើសយកអ្នកមានជំនាញច្បាស់លាស់ ដោយបានជម្រុះ យកអ្នកទទួលបានជ័យលាភី សម្រាប់ទៅចូលរួមនៅក្នុងការប្រកួតថ្នាក់ជាតិ ដែលនឹងប្រព្រឹត្តឡើងនៅឯរាជធានីភ្នំពេញ នាចុងឆ្នាំ២០១៨ខាងមុខនេះ។
លោក ពង់ថាណា ដេវីតាយ៉ាផន (Pongthana Dejvittayaporn)នាយកផ្នែកលក់ និងទីផ្សាររបស់ក្រុមហ៊ុន អេសស៊ីជី បានឲ្យដឹងថា៖ កម្មវិធីនេះគឺជាការឆ្លុះបញ្ចាំងឃើញពីសេចក្តីតាំងចិត្តរបស់ អេសស៊ីជី ដែលមានបំណងជួយគាំទ្រដល់ភាគីពាក់ព័ន្ធសំខាន់ៗ ក្នុងការទទួលបានឱកាសល្អៗក្នុងអាជីពរបស់ខ្លួន និងមានឱកាសអភិវឌ្ឍគុណភាពរបស់ខ្លួនឲ្យកាន់តែប្រសើរឡើងថែមទៀត។
លោកបានបញ្ជាក់ទៀតថា ការប្រកួតសំណង់ គឺជាផ្នែកមួយនៃកម្មវិធីបណ្តុះបណ្តាលជាងសំណង់ ដែលយើងមានបំណងអភិវឌ្ឍជំនាញរបស់ជាងសំណង់ ថែមទាំងផ្តល់ឱកាសដល់ពួកគាត់ ដើម្បីរកប្រាក់ចំណូលឲ្យកាន់តែបានច្រើនជាងមុន ពិសេសពួកគាត់មានឱកាសបង្ហាញពីជំនាញ និងសមត្ថភាពរបស់ខ្លួនឲ្យម្ចាស់លំនៅឋាន ឬក្រុមហ៊ុនអចលនទ្រព្យនានាបានឃើញពីថ្វីដៃប្រកបដោយការបិុនប្រសប់ផងដែរ ហើយជាងសំណង់ទាំងនោះនឹងមានឈ្មោះបោះសំឡេង ដែលធ្វើឲ្យពួកគាត់ទទួលបានការងារកាន់តែច្រើនឡើងថែមទៀត។
តាមរយៈការសហការជាមួយនឹងក្រសួងការងារ និងបណ្តុះបណ្តាលវិជ្ជាជីវៈ ការប្រកួតប្រជែង និងវគ្គបណ្តុះបណ្តាល ក្នុងគោលបំណងអភិវឌ្ឍជំនាញរបស់ជាងសំណង់ លើកកម្ពស់គុណភាពសំណង់ និងអភិវឌ្ឍឧស្សាហកម្មសំណង់។
សូមបញ្ជាក់ថា៖ ជាងសំណង់ចំនួន១៦នាក់ ដែលបែងចែកជា៨ក្រុមនោះ បន្ទាប់ពីបានប្រកួតនៅក្នុងជុំទីមួយ លើផ្នែកបូកជញ្ជាំងនោះ ត្រូវជម្រើសយកតែមួយក្រុមដែលមានចំនួនពីរនាក់ ហើយក្រុមដែលទទួលបានរង្វាន់ជ័យលាភីសម្រាប់ទៅបន្តការប្រកួតថ្នាក់ជាតិនេះ គឺជាក្រុមទី៧ មានឈ្មោះ សាយ វុទ្ធី និងឈ្មោះ ឃុំ ម៉ាញ រស់នៅភូមិតាឌូ សង្កាត់រកាក្រៅ ក្រុងដូនកែវ ខេត្តតាកែវ៕ សេង ណារិទ្ធ
